Vadodara: બાથરૂમમાં મહિલાનો વીડિયો ઉતારતા પકડાઈ જવાના ડરે મોબાઈલ ફેંકી ફરાર

Dipti Solanki વડોદરાLast Updated: એપ્રિલ 10, 2026

1 minute read

Vadodara News: સંસ્કારી નગરી વડોદરામાં એક શ્રમિક દ્વારા મહિલાની પ્રાઈવસી ભંગ કરવાની ચોંકાવનારી ઘટના સામે આવી છે. ઘરની બાજુમાં કડિયા કામ કરવા આવેલા એક શખ્સે બાથરૂમમાં કપડાં ધોતી અને સ્નાન કરતી મહિલાનો મોબાઈલમાં વીડિયો ઉતાર્યો હતો. જોકે, મહિલાની સતર્કતાને કારણે આ પાપી મનસૂબો નિષ્ફળ રહ્યો હતો.

વાવાઝોડાનો ફાયદો ઉઠાવી આચરી હરકત

પીડિત મહિલાના જણાવ્યા અનુસાર, તે સવારે પોતાના ઘરના બાથરૂમમાં કપડાં ધોઈ રહી હતી. તાજેતરમાં આવેલા વાવાઝોડાને કારણે બાથરૂમની ઉપરની સુરક્ષા નેટ ઉડી ગઈ હતી, જેનો ફાયદો બાજુમાં કડિયા કામ કરવા આવેલા શખ્સે ઉઠાવ્યો હતો. મહિલા જ્યારે સ્નાન કરવા બેઠી ત્યારે તેની નજર ઉપર ગઈ અને જોયું તો એક વ્યક્તિ મોબાઈલ વડે છુપાઈને વીડિયો બનાવી રહ્યો હતો.

પરિવારજનો સાથે અભદ્ર વર્તન અને ફરાર

મહિલાએ બુમાબુમ કરતા જ પરિવારના સભ્યો દોડી આવ્યા હતા. જ્યારે તેઓ આરોપી પાસે જવાબ માંગવા ગયા, ત્યારે તેણે પસ્તાવો કરવાને બદલે અભદ્ર ભાષામાં ગાળાગાળી કરી હતી. પકડાઈ જવાની બીકે આરોપી પોતાનો મોબાઈલ ફોન ત્યાં જ ફેંકીને સ્થળ પરથી નાસી છૂટ્યો હતો.

અભયમ ટીમની ત્વરિત કામગીરી

ઘટનાની જાણ થતાં જ ૧૮૧ અભયમ મહિલા હેલ્પલાઈનની ટીમ તાત્કાલિક સ્થળ પર પહોંચી હતી.

તપાસ: અભયમ ટીમે આરોપીના ઘરે તપાસ કરી પરંતુ ત્યાં તાળું લટકતું હતું.
પુરાવો: આરોપીએ ફેંકી દીધેલો મોબાઈલ પોલીસને સોંપવામાં આવ્યો છે, જે આ કેસમાં સૌથી મોટો પુરાવો સાબિત થશે.
માર્ગદર્શન: ટીમે પીડિત મહિલાનું કાઉન્સેલિંગ કર્યું અને તેમને પોલીસ સ્ટેશનમાં વિધિવત ફરિયાદ નોંધાવવા માટે કાયદાકીય માર્ગદર્શન પૂરું પાડ્યું હતું.

પોલીસ તપાસ તેજ

હાલમાં પોલીસે આરોપીનો મોબાઈલ કબજે કરી તેની ઓળખ મેળવવાની તજવીજ હાથ ધરી છે. મોબાઈલમાં રહેલા ડેટા અને લોકેશનના આધારે ફરાર કડિયાને પકડવા માટે ચક્રો ગતિમાન કર્યા છે.