Global Market Alert: ઈરાન યુદ્ધની વૈશ્વિક બજાર પર ‘સર્જિકલ સ્ટ્રાઈક’, તેલથી લઈને સોના સુધી બધું જ મોંઘું થશે!
નવી દિલ્હીઃ 1 માર્ચ, 2026: US-Israel Iran War Impact: અમેરિકા અને ઈઝરાયેલ દ્વારા ઈરાન પર કરવામાં આવેલા ભીષણ હુમલા અને ઈરાની સુપ્રીમ લીડર અયાતુલ્લા ખામેનેઈના નિધને વૈશ્વિક સ્તરે આર્થિક તણાવ વધારી દીધો છે. સોમવારે જ્યારે વિશ્વભરના બજારો ખુલશે, ત્યારે તેની સીધી અસર શેરબજાર, તેલની કિંમતો અને કરન્સી માર્કેટ પર જોવા મળશે. રોકાણકારોમાં ફેલાયેલા ડરને કારણે સોના-ચાંદીના ભાવમાં પણ મોટો ઉછાળો આવવાની શક્યતા છે.
1. ક્રૂડ ઓઇલના ભાવમાં ભડકો (Crude Oil Price Hike)
ઈરાન વિશ્વનો મોટો તેલ ઉત્પાદક દેશ છે. યુદ્ધને કારણે સ્ટ્રેટ ઓફ હોર્મુઝ બંધ થવાના અહેવાલોથી વૈશ્વિક તેલ પુરવઠાનો 20% હિસ્સો અટકી ગયો છે. નિષ્ણાતોના મતે, યુદ્ધ પહેલા જે તેલ 73 ડોલર પ્રતિ બેરલ હતું, તે વધીને 100 ડોલર સુધી પહોંચી શકે છે. જો સંઘર્ષ લાંબો ચાલશે તો જૂન 2025નો 80 ડોલરનો રેકોર્ડ પણ તૂટી શકે છે.
2. શેરબજારમાં ભારે ઉથલપાથલ (Stock Market Crash)
વૈશ્વિક શેરબજારો પહેલાથી જ ટ્રમ્પ ટેરિફ અને આઈટી શેરોમાં વેચવાલીને કારણે દબાણમાં છે. VIX ઇન્ડેક્સમાં 15% નો વધારો થયો છે, જે બજારમાં મોટા કડાકાનો સંકેત આપે છે. આ સિવાય એવિએશન (વિમાન સેવા) અને ડિફેન્સ સેક્ટરના શેરોમાં સોમવારે મોટી હલચલ જોવા મળી શકે છે.
3. કરન્સી માર્કેટમાં ડોલરનો દબદબો
યુદ્ધના સંજોગોમાં અમેરિકી ડોલર વધુ મજબૂત બની શકે છે. અમેરિકા પોતે એનર્જી એક્સપોઝર ધરાવતું હોવાથી તેલના વધતા ભાવ તેને ફાયદો કરાવી શકે છે. જાપાનીઝ યેન અને સ્વિસ ફ્રાન્ક સિવાયની અન્ય તમામ કરન્સી (રૂપિયો, પાઉન્ડ, યુરો) સામે ડોલર મજબૂત થશે.
4. સુરક્ષિત રોકાણ તરીકે સોના-ચાંદીની ચમક વધશે
જ્યારે પણ ગ્લોબલ ટેન્શન વધે છે, ત્યારે રોકાણકારો શેરબજાર છોડીને સોના (Gold) તરફ વળે છે. વર્ષ 2026 માં સોનું અત્યાર સુધીમાં 22% રીટર્ન આપી ચૂક્યું છે. આશ્ચર્યજનક રીતે, બિટકોઈનને હવે સુરક્ષિત રોકાણ માનવામાં આવતું નથી, છેલ્લા બે મહિનામાં તેની વેલ્યુ 25% થી વધુ ઘટી ગઈ છે.
