ભણવા બાબતે સાત વર્ષના વિદ્યાર્થી પર ટ્યુશન શિક્ષકે આપ્યા ડામ
હૈદરાબાદથી એક ચોંકાવનારી ઘટના પ્રકાશમાં આવી છે. જેમાં ફિલ્મ નગર પોલીસે ઓયુ કોલોનીમાં સાત વર્ષના છોકરાને ગરમ છાલથી સળગાવી દેવા બદલ ટ્યુશન શિક્ષક વિરુદ્ધ ફોજદારી કેસ દાખલ કર્યો છે. પોલીસે જણાવ્યું હતું કે આ ઘટના ગુરુવારે બની હતી અને ટ્યુટર શ્રીમાંસા વિરુદ્ધ કેસ દાખલ કરવામાં આવ્યો છે.
આ અંગેની મળતી માહિતી પ્રમાણે, છોકરો ચોકીદારનો પુત્ર છે અને આરોપી શિક્ષકની બાજુમાં આવેલા ઘરમાં તેના પરિવાર સાથે રહે છે. પોલીસે જણાવ્યું હતું કે, “ટ્યુશન શિક્ષકે છોકરાને સખત સજા કરી હતી કારણ કે તે યોગ્ય રીતે અભ્યાસ કરતો ન હતો.” આરોપીને કસ્ટડીમાં લેવામાં આવ્યો હતો અને પૂછપરછ કરવામાં આવી હતી ત્યારબાદ તેને છોડી દેવામાં આવ્યો હતો.
પોલીસે તેના વિરુદ્ધ ખતરનાક હથિયારથી ઇજા પહોંચાડવા અને કિશોર ન્યાય અધિનિયમનું ઉલ્લંઘન કરવાનો કેસ દાખલ કર્યો છે. ફિલ્મ નગરના ઇન્સ્પેક્ટર એસ. સંતોષમે જણાવ્યું હતું કે, “ગુરુવારે રાત્રે લગભગ 9:30 વાગ્યે, છોકરાએ તેના માતાપિતાને બતાવ્યું કે તેને સળગાવવાથી ઇજાઓ થઈ છે.”
દીકરાના પગ, હાથ અને ચહેરા પર દાઝી ગયેલા નિશાન જોઈને આઘાત પામેલા માતા-પિતા પોલીસ પાસે ગયા અને ફરિયાદ નોંધાવી. આ દંપતીને બે દીકરા છે, જેમાં નાનો પુત્ર ભોગ બન્યો છે. બંને દીકરાઓ છેલ્લા ત્રણ મહિનાથી શ્રીમાંસાના ઘરે ટ્યુશન ક્લાસમાં ભણી રહ્યા હતા.
ગુરુવારે મોટો દીકરો ઘરે પાછો ફર્યો, પરંતુ નાનો ન આવ્યો. જ્યારે પિતાએ ટ્યુટરને ફોન કર્યો, ત્યારે તેમણે બાળકને લેવા આવવા કહ્યું. પોલીસે જણાવ્યું કે જ્યારે તેઓ છોકરાના ઘરે પહોંચ્યા ત્યારે તેમણે છોકરાને ઇજાઓ સાથે જોયો.
