પોરબંદરમાં મહેર સમાજના પરંપરાગત મણિયારો રાસનું આયોજન, સોનાના દાગીના અને પારંપરિક પોશાકમાં ઝળકી સંસ્કૃતિ
પોરબંદર, તા. 27 સપ્ટેમ્બર, 2025: નવરાત્રિના પવિત્ર પર્વના પાંચમા નોરતે પોરબંદરના ચોપાટી મેળા ગ્રાઉન્ડ ખાતે મહેર સમાજે પોતાની આગવી સાંસ્કૃતિક પરંપરાને જાળવી રાખતું ભવ્ય રાસ-ગરબાનું આયોજન કર્યું. શ્રી ઈન્ટરનેશનલ મહેર સુપ્રીમ કાઉન્સિલ દ્વારા છેલ્લા 25 વર્ષથી આયોજિત આ નવરાત્રી ઉત્સવમાં મહેર સમાજની મહિલાઓ લાખો રૂપિયાના સોનાના દાગીનાઓથી શણગારેલા પારંપરિક વસ્ત્રોમાં રાસ રમે છે, જ્યારે પુરુષો મહેરના પરંપરાગત પોશાકમાં મણિયારો રાસ રજૂ કરે છે. આ રાસનું દૃશ્ય ગુજરાતની સમૃદ્ધ સંસ્કૃતિની ઝાંખી કરાવે છે, જે દેશ-વિદેશમાં પણ પ્રખ્યાત છે.
મહેર સમાજની આ પરંપરા વર્ષોથી પોરબંદરમાં અડગ રહી છે. દર વર્ષે પાંચમા નોરતે આયોજિત આ ખાસ રાસમાં મહિલાઓ અને પુરુષો ફક્ત પરંપરાગત વસ્ત્રોમાં જ ભાગ લે છે. મહિલાઓ ભારે ભરતકામવાળા ચણિયાચોળી અને સોનાના ઘરેણાંઓથી શણગારેલી હોય છે, જેમાં નાકની નથ, કાનના ઝૂમખાં અને ગળાના હારનો સમાવેશ થાય છે. પુરુષો પરંપરાગત કેડિયું અને ધોતી પહેરીને મણિયારો રાસ રજૂ કરે છે, જે મહેર સમાજની ઓળખનું પ્રતીક છે. આ મણિયારો રાસ પોરબંદર જિલ્લાની વિશેષતા છે અને હવે તે રાષ્ટ્રીય તેમજ આંતરરાષ્ટ્રીય કાર્યક્રમોમાં પણ લોકપ્રિય બન્યો છે.
શ્રી ઈન્ટરનેશનલ મહેર સુપ્રીમ કાઉન્સિલના આયોજનમાં આ વર્ષે પણ હજારો મહેર સમાજના લોકોએ ભાગ લીધો. ચોપાટી મેળા ગ્રાઉન્ડ ખાતે યોજાયેલા આ રાસમાં પરંપરાગત ગરબા ગીતો અને ઢોલની તાલે યુવાનો અને વડીલોએ ઉત્સાહભેર ભાગ લીધો. આયોજકોએ જણાવ્યું કે આ ઉત્સવ મહેર સમાજની એકતા અને સાંસ્કૃતિક વારસાને જાળવવાનો એક પ્રયાસ છે. આ રાસમાં આધુનિક ફિલ્મી ગીતોને બદલે ફક્ત પરંપરાગત ગરબા અને ભક્તિગીતો વગાડવામાં આવે છે, જેનાથી આયોજનની પવિત્રતા જળવાઈ રહે છે.
આ પણ વાંચો: બરેલી રમખાણો પછી મોટી કાર્યવાહી: મૌલાના તૌકીર રઝા અને આઠ અન્ય લોકોની ધરપકડ, 40 આરોપીઓની અટકાયત
