સૂવા પણ ન દે અને જાસૂસોની જેમ ટોર્ચર કરે, પાકિસ્તાનથી પરત ફરેલા BSF જવાનની આપવીતી
પાકિસ્તાન, 16 મે 2025 : 21 દિવસ પછી પાકિસ્તાનથી મુક્ત થયા બાદ ભારત પરત ફરેલા બીએસએફ જવાન પૂર્ણમ કુમાર શોએ તેમની પત્ની રજની સાથે ટેલિફોનિક વાતચીતમાં તેમના કેદ દરમિયાનના અનુભવો શેર કર્યા. તેમણે તેમની પત્નીને કહ્યું કે પાકિસ્તાનમાં તેની કેદ દરમિયાન તેને રાત્રે સૂવા પણ દેવામાં આવતા ન હતા. સતત પૂછપરછ થતી રહી. પાકિસ્તાનીઓ એવું વર્તન કરતા હતા જાણે પીકે શો જાસૂસ હોય.
23 એપ્રિલના રોજ, પંજાબના ફિરોઝપુર સેક્ટરમાં ફરજ પર હતા ત્યારે પૂર્ણમ કુમાર શો આકસ્મિક રીતે પાકિસ્તાની સરહદમાં પ્રવેશી ગયા. આ ઘટના કાશ્મીરના પહેલગામમાં થયેલા આતંકવાદી હુમલાના બીજા જ દિવસે બની હતી. પાકિસ્તાની સેનાએ તેમને કસ્ટડીમાં લીધા હતા અને ત્યારથી તેમની સાથે કોઈ સંપર્ક થયો નથી. ભારત સરકારે રાજદ્વારી માધ્યમો દ્વારા દબાણ લાવવાનું શરૂ કર્યું, જેના કારણે તેમને પાકિસ્તાનમાંથી મુક્ત કરવામાં આવ્યા.
બુધવારે પોતાના પતિ સાથે વાત કર્યા પછી, રજની શોએ ટાઇમ્સ ઓફ ઇન્ડિયાને જણાવ્યું કે “તેમને શારીરિક રીતે ત્રાસ આપવામાં આવ્યો ન હતો, પરંતુ માનસિક રીતે થાકી ગયા હતા. તેમને દરરોજ રાત્રે પૂછપરછ માટે જગાડવામાં આવતા હતા. તેમણે કહ્યું કે તેમને ખાવાનું આપવામાં આવતું હતું, પરંતુ દાંત સાફ કરવાની પણ મંજૂરી નહોતી. તેમના અવાજમાં થાક સ્પષ્ટ દેખાતો હતો.”
ત્રણ અલગ અલગ સ્થળોએ રાખવામાં આવ્યા
રજનીએ એમ પણ કહ્યું કે પૂર્ણમ શોને ત્રણ અલગ અલગ જગ્યાએ લઈ જવામાં આવ્યા હતા. તેમાંથી એક જગ્યા કદાચ એરબેઝની નજીક હતી, કારણ કે ત્યાં વિમાનોના અવાજો સંભળાતા હતા. આ બધો અનુભવ એવો હતો જેણે તેના માનસિક તણાવમાં વધુ વધારો કર્યો.
રજની શોએ ગર્વથી કહ્યું, “તેઓ છેલ્લા 17 વર્ષથી દેશની સેવા કરી રહ્યા છે અને આગળ પણ કરતા રહેશે. અમને બધાને તેમના પર ગર્વ છે. તેઓ ફરીથી ફરજ પર પાછા ફરશે.” જો શોને જલ્દી રજા નહીં મળે, તો રજની પોતે પઠાણકોટ જઈને તેને મળવાનું આયોજન કરી રહી છે.
બુધવારે સાંજે પૂર્ણમ કુમાર શોને અટારી-વાઘા બોર્ડર દ્વારા ભારત લાવવામાં આવ્યા હતા, જ્યાં તેમની તબીબી તપાસ કરવામાં આવી હતી અને તેમની પૂછપરછ કરવામાં આવી હતી.
આ પણ વાંચો : ઈરાકની શિપ પર સવાર થઈને ભારત પહોંચ્યો પાકિસ્તાની, અધિકારીઓએ પાછો ભગાડ્યો
