પાકિસ્તાન દ્વારા કંધારમાં એરસ્ટ્રાઈક, ડ્રોન હુમલાઓ બાદ વધ્યો તણાવ

પાકિસ્તાન, 15 માર્ચ 2026: પાકિસ્તાન અને અફઘાનિસ્તાન વચ્ચે ફરી એકવાર તણાવ વધી ગયો છે. પાકિસ્તાને અફઘાનિસ્તાનના કંધાર વિસ્તારમાં તાલિબાન સાથે જોડાયેલા સૈન્ય ઠેકાણાઓ પર એરસ્ટ્રાઈક કરી હોવાનું જણાવ્યું છે. પાકિસ્તાનનું કહેવું છે કે તાજેતરમાં તેના શહેરો ઉપર દેખાયેલા ડ્રોન હુમલાઓના જવાબમાં આ કાર્યવાહી કરવામાં આવી છે.

પાકિસ્તાની અધિકારીઓના જણાવ્યા મુજબ છેલ્લા કેટલાક દિવસોમાં પાકિસ્તાનના વિવિધ શહેરોના આકાશમાં અનેક ડ્રોન જોવા મળ્યા હતા. સુરક્ષા એજન્સીઓએ સમયસર કાર્યવાહી કરીને આ ડ્રોનને રોકી દીધા હતા, જેના કારણે તેઓ પોતાના નિશાન સુધી પહોંચી શક્યા નહોતા. જોકે કેટલીક જગ્યાએ ડ્રોનના અવશેષો પડવાથી નુકસાન થયું હતું. ક્વેટામાં મलबો પડતાં બે બાળકો ઘાયલ થયા હતા, જ્યારે કોહાટ અને રાવલપિંડીમાં પણ કેટલાક લોકોના ઘાયલ થવાની માહિતી સામે આવી છે.

ડ્રોનની ગતિવિધિ સામે આવતા સાવચેતીના પગલા તરીકે ઇસ્લામાબાદ આસપાસનું હવાઈ ક્ષેત્ર થોડા સમય માટે બંધ કરવામાં આવ્યું હતું. ત્યારબાદ પાકિસ્તાને જણાવ્યું કે નાગરિક વિસ્તારો અને સૈન્ય ઠેકાણાઓને નિશાન બનાવવું “રેડ લાઇન પાર કરવા” જેવું છે.

પાકિસ્તાનનો આરોપ છે કે આ ડ્રોન હુમલાઓની યોજના અફઘાનિસ્તાનના કંધારમાં આવેલા કેટલાક ઠેકાણાઓ પરથી બનાવવામાં આવી હતી. તેથી પાકિસ્તાને ત્યાં એરસ્ટ્રાઈક કરીને ટેકનિકલ સુવિધાઓ અને હથિયારોના ભંડારને નિશાન બનાવ્યા. મીડિયા રિપોર્ટ મુજબ આ ઠેકાણાઓનો ઉપયોગ તાલિબાન સાથે જોડાયેલા લડવૈયાઓ દ્વારા કરવામાં આવતો હતો.

બીજી તરફ અફઘાનિસ્તાનની તાલિબાન સરકારે પણ પાકિસ્તાન પર ગંભીર આરોપો લગાવ્યા છે. કાબુલનું કહેવું છે કે પાકિસ્તાને રાજધાની કાબુલ અને પૂર્વી અફઘાનિસ્તાનના કેટલાક વિસ્તારોમાં હવાઈ હુમલા કર્યા, જેમાં ઓછામાં ઓછા છ સામાન્ય નાગરિકોના મોત થયા અને લગભગ 15 લોકો ઘાયલ થયા.

અફઘાન સરકારના પ્રવક્તા જબીઉલ્લાહ મુજાહિદે આરોપ લગાવ્યો કે પાકિસ્તાની વિમાનો દ્વારા કંધાર એરપોર્ટ નજીક આવેલી ખાનગી એરલાઇન Kam Airના ફ્યુઅલ ડિપોને પણ નિશાન બનાવવામાં આવ્યો. તેમના જણાવ્યા મુજબ આ ઈંધણ નાગરિક અને સંયુક્ત રાષ્ટ્રની ફ્લાઇટ્સ માટે ઉપયોગમાં લેવાતું હતું.

પાકિસ્તાને સામાન્ય નાગરિકોને નિશાન બનાવવાના આરોપોને નકારી કાઢ્યા છે. પાકિસ્તાનનું કહેવું છે કે તેની કાર્યવાહી માત્ર પાકિસ્તાની તાલિબાન (TTP)ના લડવૈયાઓ અને તેમના નેટવર્ક સામે હતી.

આ દરમિયાન પાકિસ્તાનના ઉત્તર-પશ્ચિમ જિલ્લામાં લક્કી મરવતમાં રસ્તા કિનારે થયેલા બોમ્બ વિસ્ફોટમાં સાત પાકિસ્તાની પોલીસકર્મીઓના મોત થયા છે. આ ઘટનાએ બંને દેશો વચ્ચે પહેલાથી ચાલતા તણાવને વધુ વધારી દીધો છે.

અફઘાનિસ્તાનના રક્ષા મંત્રાલયે દાવો કર્યો છે કે પૂર્વી પ્રાંત કુનાર અને નંગરહાર વિસ્તારમાં સરહદ પર તૈનાત તેમની સેનાએ પાકિસ્તાનની એક ચોકી પર કબજો કર્યો અને 14 પાકિસ્તાની સૈનિકોને મારી નાખ્યા. જોકે પાકિસ્તાનના માહિતી મંત્રાલયે આ દાવાને સંપૂર્ણપણે નકારી કાઢ્યો છે અને જણાવ્યું છે કે આવી કોઈ ઘટના બની નથી.

આ પણ વાંચો : LPG Cylinder Rule: ગેસ સંકટ વચ્ચે સરકારનો ધડાકો, હવે આ લોકોને LPG નહીં મળે!