‘માતાજી આવવા’ના વાયરલ વીડિયો પર સુધા ચંદ્રને તોડી ચુપકી, ટ્રોલર્સને આપ્યો જડબાતોડ જવાબ

નવી દિલ્હીઃ 31 જાન્યુઆરી, 2026: ટીવી જગતનું જાણીતું નામ સુધા ચંદ્રન હાલમાં જ એક સોશિયલ મીડિયા વીડિયોને કારણે ચર્ચામાં આવ્યા હતા. ‘માતાની ચોકી’ના એક કાર્યક્રમમાં તેઓ આધ્યાત્મિક રીતે કોઈ દૈવી શક્તિના વશમાં હોય તેવું જણાતું હતું. હવે એક્ટ્રેસે પારસ છાબડાના પોડકાસ્ટમાં આ ઘટના પાછળનું સત્ય અને પોતાનો અનુભવ શેર કર્યો છે.
શું હતી એ ઘટના?
વાયરલ વીડિયોમાં સુધા ચંદ્રન એક અલગ જ અવતારમાં જોવા મળ્યા હતા. આ અંગે વાત કરતા તેમણે કહ્યું, “ઘણા લોકો કહે છે કે માતાજી તમારી પાસે આવે છે. મને નથી ખબર કે આવું કેવી રીતે કે કેમ થાય છે, પણ હા, માતાજી આવે છે અને મને આશીર્વાદ આપે છે. પહેલા મને પણ આ બાબતે શંકા હતી કે શું ખરેખર કોઈ દૈવી શક્તિ મારી પાસે આવી શકે? પણ જ્યારે પણ આવું થયું, મને હંમેશા આશીર્વાદ મળ્યા છે.”
10 મિનિટમાં 4.5 લિટર પાણી પીવાનો આશ્ચર્યજનક ખુલાસો
સુધા ચંદ્રને ટ્રોલર્સને જવાબ આપતા એક આશ્ચર્યજનક વાત કહી. તેમણે જણાવ્યું, “લોકો મને પૂછે છે કે તે પળે શું અનુભવાયું? સાચું કહું તો મને પણ સમજાયું નહીં. કોઈ સામાન્ય માણસ 10 મિનિટમાં સાડા ચાર લિટર પાણી કેવી રીતે પી શકે? હું આખા દિવસમાં પણ આટલું પાણી નથી પી શકતી. મને નથી ખબર કે તે શું હતું, પણ કંઈક અકલ્પનીય જરૂર હતું.”
ટ્રોલર્સને જડબાતોડ જવાબ
પોતાના પર થતી ટીકાઓ અંગે તેમણે સ્પષ્ટ શબ્દોમાં કહ્યું, “મેં ક્યારેય એવો દાવો નથી કર્યો કે માતાજીની આખી શક્તિ મારામાં આવી ગઈ હતી. જો કંઈ હતું, તો તે માત્ર તેમની હાજરી (Presence) નો એક નાનકડો અંશ હતો. તેમણે મારા શરીરને માધ્યમ તરીકે પસંદ કર્યું. જે લોકો ટ્રોલ કરે છે, તેમને મારે કશું કહેવું નથી. હું કોઈના વિશ્વાસ કે ધર્મ પર સવાલ નથી ઉઠાવતી અને મારે કોઈના સર્ટિફિકેટની જરૂર નથી.”












