મોરબી અને સુરેન્દ્રનગરમાં વરસાદે મચાવી તબાહી, અનેક ગામોમાં પાણી ભરાયા
Meghtandav in Gujarat: ગુજરાતમાં સતત વરસી રહેલા ભારે વરસાદને કારણે અનેક જિલ્લાઓમાં જનજીવન પ્રભાવિત બન્યું છે. ખાસ કરીને સૌરાષ્ટ્ર અને ઉત્તર ગુજરાતના વિસ્તારોમાં વરસાદે ભારે તારાજી સર્જી છે. હવામાન વિભાગે આજે રાજ્યના આઠ જિલ્લાઓમાં ભારે વરસાદની શક્યતાને ધ્યાનમાં રાખીને યલો એલર્ટ જાહેર કર્યું છે અને લોકોને સાવચેતી રાખવા અપીલ કરી છે.
ગામોમાં પાણી ભરાવાની સ્થિતિ સર્જાઈ
મોરબી જિલ્લામાં સૌથી વધુ વરસાદ નોંધાતા અનેક વિસ્તારોમાં પાણી ભરાઈ ગયા છે. ભારે વરસાદના કારણે નીચાણવાળા વિસ્તારોમાં જનજીવન ખોરવાયું છે અને અનેક માર્ગો પર વાહનવ્યવહાર પ્રભાવિત થયો છે. સુરેન્દ્રનગર જિલ્લામાં પણ ભારે વરસાદના કારણે અનેક ગામોમાં પાણી ભરાવાની સ્થિતિ સર્જાઈ છે, જ્યારે ભોગાવો-2 ડેમ ઓવરફ્લો થતાં તંત્ર સતત નજર રાખી રહ્યું છે.
તંત્ર તાત્કાલિક બચાવ કામગીરીમાં જોડાયું
હળવદ તાલુકાના જૂના માલણીયાદ ગામ નજીક રણ વિસ્તારમાં વરસાદી પાણીના ભારે પ્રવાહ વચ્ચે મહિલાઓ અને બાળકો સહિત 12 લોકો ફસાઈ જતાં તંત્ર તાત્કાલિક બચાવ કામગીરીમાં જોડાયું હતું. શરૂઆતમાં સ્થાનિક ટીમોએ પ્રયાસ કર્યો હતો, પરંતુ પરિસ્થિતિ ગંભીર બનતાં SDRF અને બાદમાં NDRFની ટીમોને પણ સ્થળ પર મોકલવામાં આવી છે. જિલ્લા વહીવટી તંત્ર દ્વારા તમામ લોકોને સલામત સ્થળે પહોંચાડવા યુદ્ધના ધોરણે કામગીરી હાથ ધરવામાં આવી છે.
રાજ્યના અન્ય અનેક જિલ્લાઓમાં પણ ભારે વરસાદના કારણે રસ્તાઓ પર પાણી ભરાયા, કેટલાક વિસ્તારોમાં ડેમો ઓવરફ્લો થયા અને સ્થાનિક સ્તરે અવરજવર પર અસર જોવા મળી છે. વરસાદી પરિસ્થિતિને કારણે કેટલાક ગામોનો સંપર્ક પણ અસ્થાયી રીતે પ્રભાવિત બન્યો છે.
હવામાન વિભાગના જણાવ્યા અનુસાર રાજ્યમાં હાલ વિવિધ હવામાન પ્રણાલીઓ સક્રિય હોવાથી આગામી દિવસોમાં પણ કેટલાક વિસ્તારોમાં વરસાદી માહોલ યથાવત રહી શકે છે. દરિયાકાંઠાના વિસ્તારોમાં માછીમારોને દરિયો ન ખેડવાની સલાહ આપવામાં આવી છે, જ્યારે નદી કિનારા અને નીચાણવાળા વિસ્તારોમાં રહેતા લોકોને ખાસ સાવચેતી રાખવા તંત્ર દ્વારા અપીલ કરવામાં આવી છે.
