નવી દિલ્હી, 21 જાન્યુઆરી : સ્ટીલ મંત્રાલયે સ્ટીલ ઓથોરિટી ઓફ ઈન્ડિયા લિમિટેડ (SAIL)ના બે ડિરેક્ટર અને નેશનલ મિનરલ ડેવલપમેન્ટ કોર્પોરેશન (NMDC)ના ડિરેક્ટરને તાત્કાલિક અસરથી સસ્પેન્ડ કર્યા છે. આ ઉપરાંત SAILના અન્ય 26 અધિકારીઓને પણ સસ્પેન્ડ કરવામાં આવ્યા છે. ગેરરીતિના કારણે આ કાર્યવાહી કરવામાં આવી છે.
આચારસંહિતાના ઉલ્લંઘનને કારણે પગલું લેવાયું
SAIL એ ગુરુવારે BSE ને જણાવ્યું હતું કે તેની આચારસંહિતાના ઉલ્લંઘનને કારણે તેણે આ પગલું લીધું છે. SAIL એ કહ્યું કે તેણે તેના ડિરેક્ટર (વાણિજ્ય) વીએસ ચક્રવર્તી અને ડિરેક્ટર (ફાઇનાન્સ) એકે તુલસીયાનીને સસ્પેન્ડ કર્યા છે. આ બંને બોર્ડ લેવલના ઓફિસર છે. અન્ય 26 અધિકારીઓને પણ તાત્કાલિક અસરથી સસ્પેન્ડ કરવામાં આવ્યા છે.
લોકપાલના નિર્દેશો અનુસાર કાર્યવાહી
તેમાં ઇડી (ફાઇનાન્સ એન્ડ એકાઉન્ટ્સ) એસકે શર્મા, ઇડી (કોમર્શિયલ) વિનોદ ગુપ્તા, ઇડી (સેલ્સ એન્ડ આઇટીડી) અતુલ માથુર અને ઇડી (માર્કેટિંગ સર્વિસિસ) આરએમ સુરેશનો પણ સમાવેશ થાય છે. સેલે કહ્યું કે આ મામલો લોકપાલના નિર્દેશો અનુસાર કરવામાં આવી રહેલી કેટલીક તપાસ સાથે સંબંધિત છે.
કંપનીનો કારોબાર સામાન્ય રીતે ચાલશે
આ મુદ્દે SAILના ચેરમેન અમરેન્દુ પ્રકાશે જણાવ્યું હતું કે કંપનીનો કારોબાર સામાન્ય રીતે ચાલી રહ્યો છે અને તેનાથી કંપનીની કામગીરી પર કોઈ અસર થશે નહીં. SAIL દેશની સૌથી મોટી સ્ટીલ બનાવતી કંપની છે, જ્યારે NMDC સૌથી મોટી આયર્ન ઓર ઉત્પાદક એકમ છે.
