દબદબા હૈં, દબદબા રહેગા: 20 વર્ષ પછી ઠાકરે બ્રધર્સ એક સાથે જોવા મળશે, ઉદ્ધવ-રાજ એક સાથે મિટિંગ કરશે
મુંબઈ, 1 જૂલાઈ 2025: મહારાષ્ટ્ર સરકારે ત્રિભાષાવાળો GR રદ કરી દીધો છે. રાજ ઠાકરે અને ઉદ્ધવ ઠાકરે સરકારના આ નિર્ણયને પોતાની જીત તરીકે જોઈ રહ્યા છે. હવે આ નિર્ણય પછી, રાજ ઠાકરેની પાર્ટી MNS અને ઉદ્ધવ ઠાકરેની પાર્ટી શિવસેના (UBT) સંયુક્ત જાહેર સભા કરવા જઈ રહી છે. આ જાહેર સભા મહારાષ્ટ્રના રાજકારણ પર પણ મોટી અસર કરી શકે છે. અહીં ઉલ્લેખનિય છે કે છેલ્લા કેટલાક સમયથી એવી અટકળો ચાલી રહી છે કે રાજ ઠાકરે અને ઉદ્ધવ ઠાકરે એક સાથે આવી શકે છે.
ઠાકરે બંધુઓ ક્યારે અને ક્યાં ભેગા થશે?
રાજ-ઉદ્ધવની સંયુક્ત જાહેર સભાનું સ્થળ નક્કી થઈ ગયું છે. જાહેર સભા 5 જુલાઈના રોજ મુંબઈના વરલી ડોમ ઓડિટોરિયમમાં યોજાશે. આ જાહેર સભાને ‘મરાઠી વિજય દિન’ નામ આપવામાં આવ્યું છે. જોકે, આ જાહેર સભા દરમિયાન કોઈપણ પક્ષના ધ્વજ કે પોસ્ટર લગાવવામાં આવશે નહીં. 20 વર્ષ પછી, રાજ અને ઉદ્ધવ ઠાકરે એક જ મંચ પર જોવા મળશે. તેથી, આ જાહેર સભાને ભવ્ય બનાવવા માટે પૂરજોશમાં તૈયારીઓ કરવામાં આવી રહી છે. આ જાહેર સભાને સફળ બનાવવા માટે, MNS અને શિવસેના (UBT) ના અગ્રણી નેતાઓની સંયુક્ત સભાઓ યોજાઈ રહી છે જેથી સંકલનનો અભાવ ન રહે.
રાજ ઠાકરેએ જાહેર સભા વિશે શું કહ્યું?
રાજ ઠાકરેએ સોમવારે MNS અને શિવસેના (UBT) ની સંયુક્ત જાહેર સભા અંગે એક નિવેદન બહાર પાડ્યું હતું. તેમણે કહ્યું- “ગઈકાલે, સરકારનો નિર્ણય રદ થયા પછી, મને સંજય રાઉતનો ફોન આવ્યો. તેમણે મને પૂછ્યું કે આગળ શું કરવું? મેં તેમને કહ્યું કે હવે કૂચ રદ કરવી પડશે. તેમણે કહ્યું કે શું આપણે 5 જુલાઈએ વિજય સભા યોજી શકીએ? મેં કહ્યું હા, આપણે કરી શકીએ છીએ. મેં કહ્યું કે આપણે 5 જુલાઈએ વિજય ઉત્સવ સભા યોજીશું પરંતુ હમણાં સભાનું સ્થળ જાહેર ન કરો. મારે મારા નેતાઓ સાથે વાત કરવી પડશે, અમે તેમની સાથે વાત કર્યા પછી નિર્ણય લઈશું. વિજય સભા થશે પણ કોઈ રાજકીય બેનર લગાવશો નહીં. આ રાજકીય સભા નહીં હોય, તે બિન-રાજકીય સભા હશે. મરાઠી માનુષની એકતા જીતી છે, આ મરાઠીની જીત છે.”
આ પણ વાંચો: હિમાચલમાં આભ ફાટવાથી ભયંકર સ્થિતિ, 8 મકાન તણાઈ ગયા, 9 લોકો ગુમ થયા
