Kutch: મુંદ્રાના રામપરમાં પૂર્વ સરપંચના ઘર પર હથિયારોથી ટોળાનો હુમલો, 24ની ધરપકડ
Kutch News: કચ્છ જિલ્લાના મુંદ્રા તાલુકાના રામપર ગામે અંગત અદાવતમાં ફાટી નીકળેલી હિંસાને પગલે સમગ્ર પંથકમાં ભારેલા અગ્નિ જેવી સ્થિતિ સર્જાઈ છે. જૂની દુશ્મનાવટને વેર વાળવાના આશયથી એક ઉશ્કેરાયેલા ટોળાએ ગામના પૂર્વ સરપંચના નિવાસસ્થાનને નિશાન બનાવી હિંસક હુમલો કરતા ચકચાર મચી ગઈ છે. આ ઘટનાના સીસીટીવી ફૂટેજ સોશિયલ મીડિયા પર વાયરલ થતા પોલીસ તંત્ર તાત્કાલિક હરકતમાં આવ્યું હતું.
શું હતી સમગ્ર ઘટના?
મળતી માહિતી મુજબ, રામપર ગામે છેલ્લા કેટલાક સમયથી ચાલી આવતી જૂની અંગત અદાવતને લીધે રાત્રિના સમયે અચાનક 50 થી વધુ લોકોનું ટોળું ઘાતક હથિયારો સાથે પૂર્વ સરપંચના ઘર પાસે એકઠું થયું હતું. ટોળાએ આતંક મચાવતા પૂર્વ સરપંચના મકાન પર ભારે પથ્થરમારો કર્યો હતો અને ઘરની બહાર પડેલા વાહનો તેમજ બારી-બારણામાં તોડફોડ કરી હતી. ભયાનકતા ત્યારે વધી જ્યારે ટોળામાંથી કેટલાક શખ્સોએ હવામાં ફાયરિંગ કર્યું હતું, જેના કારણે આખું ગામ ફફડી ઉઠ્યું હતું. સદનસીબે, ઘરમાં રહેલા સભ્યો સુરક્ષિત રહ્યા હતા, પરંતુ મિલકતને મોટું નુકસાન પહોંચ્યું છે.
પોલીસની ત્વરિત કાર્યવાહી
ઘટનાની જાણ થતા જ કચ્છ પશ્ચિમના ઉચ્ચ પોલીસ અધિકારીઓનો કાફલો મુંદ્રા પોલીસ સાથે ઘટનાસ્થળે દોડી ગયો હતો. પરિસ્થિતિની ગંભીરતા જોઈને ગામમાં તાત્કાલિક ચુસ્ત પોલીસ બંદોબસ્ત તૈનાત કરી દેવામાં આવ્યો હતો. પોલીસે સીસીટીવી ફૂટેજ એકત્ર કરી હુમલાખોરોની ઓળખ કરવાની પ્રક્રિયા હાથ ધરી હતી.
પોલીસની અલગ-અલગ ટીમોએ રાત્રિના સમયે જ દરોડા પાડીને મુખ્ય સૂત્રધારો સહિત કુલ 24 શખ્સોની ધરપકડ કરી લીધી છે. પકડાયેલા આરોપીઓ પાસેથી ગેરકાયદેસર હથિયારો, લાકડીઓ, પાઈપો અને અન્ય તીક્ષ્ણ હથિયારો કબ્જે કરવામાં આવ્યા છે.
ગામમાં પોલીસ છાવણી
હાલમાં રામપર ગામમાં શાંતિ જળવાઈ રહે અને ફરી કોઈ અપ્રિય ઘટના ન બને તે માટે એસ.આર.પી (SRP) સહિતનો કાફલો તૈનાત છે. પોલીસ હજુ પણ ફરાર અન્ય હુમલાખોરોને પકડવા માટે ચક્રો ગતિમાન કરી રહી છે. સ્થાનિક રહીશોએ આ હિંસાને વખોડી કાઢી છે અને માંગ કરી છે કે ગામની સુલેહ-શાંતિ ડહોળવાનો પ્રયાસ કરનાર તત્વો સામે દાખલો બેસે તેવી કડક કાર્યવાહી કરવામાં આવે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આ પણ વાંચો: મમતા બેનર્જીના ભાજપ પર પ્રહાર: બંગાળથી થશે અંત, દિલ્હીમાં મળશે પડકાર
