સંસદમાં હોબાળો: ‘જો અમે ભાજપની મહિલા સાંસદોને ન રોકી હોત તો…’, કિરેન રિજિજુએ શેર કર્યો સંસદનો ચોંકાવનારો વીડિયો
નવી દિલ્હીઃ 10 ફેબ્રુઆરી, 2026: બજેટ સત્ર દરમિયાન સંસદની અંદર અને બહાર ભારે હોબાળો ચાલુ છે. કેન્દ્રીય મંત્રી કિરેન રિજિજુએ મંગળવારે લોકસભાની અંદરના દ્રશ્યોનો એક વીડિયો શેર કર્યો છે, જે તે દિવસનો છે જ્યારે વડાપ્રધાન નરેન્દ્ર મોદીનું ભાષણ થવાનું હતું. રિજિજુએ X (ટ્વિટર) પર વીડિયો પોસ્ટ કરતા લખ્યું કે, “જો અમે ભાજપના તમામ સાંસદોને રોક્યા ન હોત અને મહિલા સાંસદોને કોંગ્રેસના સાંસદોનો સામનો કરવા દીધો હોત, તો સ્થિતિ અત્યંત અજીબ અને ગંભીર બની ગઈ હોત.”
PM મોદીની ખુરશીને ઘેરી લેવાનો પ્રયાસ
વીડિયોમાં જોવા મળે છે કે, વડાપ્રધાન મોદીના ભાષણના થોડા મિનિટો પહેલા જ વિપક્ષી મહિલા સાંસદોએ હંગામો મચાવ્યો હતો અને તેઓ પીએમની ખુરશી તરફ આગળ વધી રહી હતી. વિપક્ષી સાંસદોના હાથમાં મોટા બેનરો હતા અને તેમણે પીએમની સીટને બ્લોક કરવાનો પ્રયાસ કર્યો હતો. આ સ્થિતિને જોતા સ્પીકર ઓમ બિરલાએ ગૃહને અચાનક સ્થગિત કરવું પડ્યું હતું.
Congress Party is proud of the most degrading behavior by their MPs !! If we had not stopped all BJP MPs and allowed the Women MPs to confront Cong. MPs, it would have led to very ugly scene.
We have very high consideration, to protect the dignity & sanctity of the Parliament. https://t.co/tRj5HjLKFH pic.twitter.com/aTmktk4Y7E— Kiren Rijiju (@KirenRijiju) February 10, 2026
સ્પીકરે બાદમાં ખુલાસો કર્યો હતો કે તેમણે વડાપ્રધાનને સત્રમાં ન આવવાની સલાહ આપી હતી, કારણ કે વિપક્ષી સાંસદો તેમના પર હુમલો કરી શકે તેવી આશંકા હતી.
ગૃહની ગરિમા સર્વોપરી: કિરેન રિજિજુ
4 ફેબ્રુઆરીના આ વીડિયો પર પ્રતિક્રિયા આપતા કિરેન રિજિજુએ જણાવ્યું કે, “સંસદની મર્યાદા અને પવિત્રતાની રક્ષા કરવી એ અમારી મોટી જવાબદારી છે. અમે સંસદની ગરિમાને સર્વોચ્ચ મહત્વ આપીએ છીએ.” તેમણે વિપક્ષના આ વર્તનને સંસદીય લોકશાહી માટે શરમજનક ગણાવ્યું હતું.
સંસદમાં મડાગાંઠ યથાવત
મંગળવારે પણ લોકસભામાં વિપક્ષી સભ્યોના હંગામાને કારણે ગતિરોધ જારી રહ્યો હતો. બપોરે 12 વાગ્યે જ્યારે ગૃહની કાર્યવાહી શરૂ થઈ ત્યારે કોંગ્રેસ અને સાથી પક્ષોએ સૂત્રોચ્ચાર શરૂ કર્યા હતા. વિપક્ષની માંગ છે કે ગૃહમાં વિરોધ પક્ષના નેતા રાહુલ ગાંધીને બોલવાની મંજૂરી આપવામાં આવે. હંગામાને કારણે બેઠક વારંવાર સ્થગિત કરવી પડી રહી છે.
