આઈપીએલઃ બુમરાહ કરશે વાપસી, આ ટીમ સામે રમશે મેચ
નવી દિલ્હી, તા. 5 એપ્રિલ, 2025: IPL 2025 માં ત્રણ હારનો સામનો કરી ચૂકેલા મુંબઈ ઈન્ડિયન્સ માટે મોટા સારા સમાચાર આવ્યા છે. બુમરાહ ઈન્ડિયન પ્રીમિયર લીગની 18મી સીઝનમાં વાપસી કરવા માટે તૈયાર છે. ઈન્ડિયા ટુડેના રિપોર્ટ મુજબ, બુમરાહ 13 એપ્રિલે દિલ્હી કેપિટલ્સ સામેની મેચમાં રમતા જોવા મળશે. બુમરાહ ઓસ્ટ્રેલિયા પ્રવાસ દરમિયાન ઈજાગ્રસ્ત થયો હતો, ત્યારબાદ તે મેદાનથી દૂર છે.
બુમરાહ વાપસી માટે તૈયાર
જસપ્રીત બુમરાહ અંગે અત્યાર સુધીની સૌથી મોટી અપડેટ આવી છે. બુમરાહ IPL 2025 માં વાપસી કરવા માટે તૈયાર છે. ઇન્ડિયા ટુડેના સમાચાર અનુસાર, બુમરાહ આગામી એકથી બે દિવસમાં મુંબઈ ઇન્ડિયન્સ કેમ્પમાં જોડાશે. 13 એપ્રિલે દિલ્હી કેપિટલ્સ સામેની મેચમાં પણ રમતા જોવા મળશે. બુમરાહને ઓસ્ટ્રેલિયા પ્રવાસ પર રમાયેલી બોર્ડર-ગાવસ્કર શ્રેણીની છેલ્લી ટેસ્ટ મેચમાં આ ઈજા થઈ હતી.
મુંબઈ ચાર મેચમાંથી ફક્ત એક જ મેચ જીતી શક્યું છે
આઈપીએલ 2025 માં મુંબઈ ઈન્ડિયન્સનું પ્રદર્શન અત્યાર સુધી નિરાશાજનક રહ્યું છે. હાર્દિક પંડ્યાના નેતૃત્વમાં, મુંબઈ ઈન્ડિયન્સ અત્યાર સુધીમાં ચાર મેચ રમી છે, જેમાંથી ત્રણમાં ટીમને હારનો સામનો કરવો પડ્યો છે. છેલ્લી મેચમાં ટીમને લખનઉ સુપર જાયન્ટ્સ સામે હારનો સામનો કરવો પડ્યો હતો. પ્રથમ બેટિંગ કરતા લખનઉએ 8 વિકેટ ગુમાવીને 203 રન બનાવ્યા હતા, જેના જવાબમાં મુંબઈ ઈન્ડિયન્સ 5 વિકેટ ગુમાવીને માત્ર 191 રન જ બનાવી શક્યું. છેલ્લી ઓવરમાં ક્રીઝ પર ઊભા રહેવા છતાં, હાર્દિક પંડ્યા ટીમને જીત અપાવવામાં નિષ્ફળ ગયો હતો. જોકે, હાર્દિકનું બોલિંગમાં પ્રદર્શન ઉત્તમ હતું અને તેણે 5 વિકેટ લીધી. હાર્દિક ઈન્ડિયન પ્રીમિયર લીગના ઇતિહાસમાં 5 વિકેટ લેનારો પ્રથમ કેપ્ટન બન્યો હતો.












