ગુજરાતમાં ₹3,000 કરોડના ઔદ્યોગિક પ્રોજેક્ટને મંજૂરી, હજારો નવી નોકરીઓનું સર્જન થશે

thousands of new jobs will be created: ગુજરાત સરકારે વિવિધ પ્રોત્સાહન યોજનાઓ હેઠળ અંદાજે ₹3,000 કરોડના ઔદ્યોગિક પ્રોજેક્ટોને મંજૂરી આપી છે. આ પ્રોજેક્ટો દ્વારા રાજ્યમાં ઉત્પાદન ક્ષેત્ર, ઔદ્યોગિક માળખાકીય વિકાસ અને રોજગારીને વધુ પ્રોત્સાહન મળશે. આ અંગે રાજ્ય સરકાર દ્વારા સોમવારે સત્તાવાર માહિતી આપવામાં આવી હતી.
ઉદ્યોગ વિભાગનો કાર્યભાર સંભાળતા નાયબ મુખ્યમંત્રી હર્ષ સંઘવીએ અધ્યક્ષસ્થાને યોજાયેલી ઉચ્ચસ્તરીય સમિતિની બેઠકોમાં આ મંજૂરી આપવામાં આવી હતી.
32 મોટા ઔદ્યોગિક પ્રોજેક્ટને મંજૂરી
રાજ્યની મોટી ઔદ્યોગિક એકમોને અંતિમ પાત્રતા પ્રમાણપત્ર આપવા માટેની સમિતિએ 32 અરજીઓને મંજૂરી આપી છે. આ પ્રોજેક્ટોમાં કુલ ₹1,978 કરોડનું રોકાણ થશે અને તેનાથી અંદાજે 4,739 સીધી રોજગારીની તકો ઊભી થશે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આ રોકાણ અમદાવાદ, કચ્છ, ગાંધીનગર, ભરૂચ, મહેસાણા, મોરબી, વડોદરા, સાબરકાંઠા અને સુરત સહિતના જિલ્લાઓમાં થશે.
₹649 કરોડના વધુ એક મોટા પ્રોજેક્ટને લીલી ઝંડી
કેપિટલ સબસિડી ટુ લાર્જ ઇન્ડસ્ટ્રીઝ એન્ડ થ્રસ્ટ સેક્ટર યોજના હેઠળ પણ સમિતિએ ₹649.23 કરોડના એક મોટા પ્રોજેક્ટને મંજૂરી આપી છે. આ પ્રોજેક્ટ દ્વારા અંદાજે 871 લોકોને સીધી રોજગારી મળશે.
ટેક્સટાઇલ ક્ષેત્રને પણ પ્રોત્સાહન
Scheme for Assistance to Strengthen Specific Segments in the Textile Value Chain-2019 હેઠળ ત્રણ ટેક્સટાઇલ યુનિટને સહાય મંજૂર કરવામાં આવી છે. આ ત્રણેય પ્રોજેક્ટમાં કુલ ₹165 કરોડનું રોકાણ થશે અને આશરે 500 નવી સીધી નોકરીઓનું સર્જન થશે.
ઔદ્યોગિક પાર્ક માટે ₹371 કરોડથી વધુનું રોકાણ
ગુજરાત ઔદ્યોગિક નીતિ-2020 હેઠળ ઇન્ડસ્ટ્રીયલ પાર્ક સહાય યોજના અંતર્ગત ચાર પ્રોજેક્ટોને મંજૂરી આપવામાં આવી છે. આ પ્રોજેક્ટો માટે ₹371.70 કરોડથી વધુનું રોકાણ થશે, જે રાજ્યના ઔદ્યોગિક ઇન્ફ્રાસ્ટ્રક્ચરને વધુ મજબૂત બનાવશે અને રોકાણ માટે અનુકૂળ વાતાવરણ ઉભું કરશે.
ઔદ્યોગિક વિકાસમાં ગુજરાત આગળ
સરકારે જણાવ્યું કે ગુજરાત ઔદ્યોગિક નીતિ-2015 હેઠળ અત્યાર સુધીમાં રાજ્યમાં ₹1,48,336.35 કરોડનું રોકાણ આકર્ષવામાં સફળતા મળી છે. આ રોકાણોથી 1,65,053થી વધુ સીધી રોજગારીનું સર્જન થયું છે. ઉપરાંત, આ વિકાસના કારણે રાજ્યમાં માઇક્રો, સ્મોલ અને મિડિયમ એન્ટરપ્રાઇઝિસ (MSMEs)ને પણ વેગ મળ્યો છે અને ઉદ્યોગમૈત્રી ઇકોસિસ્ટમ વધુ મજબૂત બની છે.












