ભારતનું પ્રથમ ખાનગી રોકેટ ‘વિક્રમ-1’ સફળતાપૂર્વક લોન્ચ, PM મોદીએ સ્કાયરૂટ ટીમને અભિનંદન આપ્યા
Science News: ભારતે અવકાશ ક્ષેત્રે વધુ એક ઐતિહાસિક સિદ્ધિ હાંસલ કરી છે. દેશનું પ્રથમ ખાનગી રીતે વિકસિત રોકેટ ‘વિક્રમ-1’ આંધ્ર પ્રદેશના શ્રીહરિકોટાથી સફળતાપૂર્વક લોન્ચ કરવામાં આવ્યું છે. બપોરે 12:05 વાગ્યે રોકેટે ઉડાન ભરી અને પ્રથમ જ પ્રયાસમાં સફળતાપૂર્વક પોતાની નિર્ધારિત કક્ષામાં સ્થાપિત થયો. આ સફળતા સાથે ભારતના ખાનગી અવકાશ ક્ષેત્ર માટે નવો યુગ શરૂ થયો છે.
આ ઐતિહાસિક સિદ્ધિ બદલ પ્રધાનમંત્રી નરેન્દ્ર મોદીએ સ્કાયરૂટ એરોસ્પેસના સહ-સ્થાપક પવન કુમાર ચંદનાને ફોન કરીને અભિનંદન પાઠવ્યા હતા. વાતચીત દરમિયાન તેમણે ટીમના તમામ વૈજ્ઞાનિકો અને ઇજનેરોના પ્રયાસોની પ્રશંસા કરી અને તેને આત્મનિર્ભર ભારત તરફનું મહત્વપૂર્ણ પગલું ગણાવ્યું હતું.
‘વંદે માતરમ’ સંદેશ કેમ મોકલ્યો?
વાતચીત દરમિયાન સ્કાયરૂટના સહ-સ્થાપક પવન કુમાર ચંદનાએ પ્રધાનમંત્રીને પૂછ્યું કે તેમણે રોકેટ સાથે અવકાશમાં મોકલવા માટે ‘વંદે માતરમ’ સંદેશ જ કેમ પસંદ કર્યો? તેના જવાબમાં પ્રધાનમંત્રીએ જણાવ્યું કે આ વર્ષે દેશ ‘વંદે માતરમ’ના 150મા વર્ષને યાદ કરી રહ્યો છે. આ ગીતે સ્વાતંત્ર્ય આંદોલન દરમિયાન દેશના યુવાનોમાં દેશભક્તિ અને બલિદાનની ભાવના જગાવી હતી. આજના આત્મનિર્ભર ભારતના સંકલ્પને પણ આ સંદેશ પ્રેરણા આપે છે, તેથી જ તેમણે ‘વંદે માતરમ’નો સંદેશ મોકલ્યો છે.
આત્મનિર્ભર ભારતની દિશામાં મોટી સિદ્ધિ
પ્રધાનમંત્રીએ જણાવ્યું કે જ્યારે તેમણે આત્મનિર્ભર ભારતની વાત કરી હતી ત્યારે ઘણા લોકો તેની મજાક ઉડાવતા હતા, પરંતુ આજે ભારત અનેક ક્ષેત્રોમાં આત્મનિર્ભર બની રહ્યું છે. અવકાશ ક્ષેત્રમાં પણ હવે દેશની ખાનગી કંપનીઓ વિશ્વસ્તરની ટેક્નોલોજી વિકસાવી રહી છે અને વિક્રમ-1ની સફળતા તેનું જીવંત ઉદાહરણ છે.
સ્કાયરૂટની ટીમને મળવાનું આમંત્રણ
પ્રધાનમંત્રી મોદીએ વિક્રમ-1 મિશનને સફળ બનાવનારી સ્કાયરૂટ એરોસ્પેસની સમગ્ર ટીમને દિલ્હી આવીને મળવાનું આમંત્રણ પણ આપ્યું છે. તેમણે જણાવ્યું કે દેશના યુવા વૈજ્ઞાનિકો અને સ્ટાર્ટઅપ્સ ભારતને અવકાશ ક્ષેત્રમાં નવી ઊંચાઈએ પહોંચાડી રહ્યા છે અને સરકાર તેમને સતત પ્રોત્સાહન આપતી રહેશે.
