Elon Musk trillionaire: વિશ્વના સૌથી ધનિક વ્યક્તિ એલોન મસ્ક ટૂંક સમયમાં જ એક નવો વૈશ્વિક ઇતિહાસ રચી શકે છે. સ્પેસએક્સ (SpaceX) કંપનીનો આગામી આઈપીઓ (IPO) તેમને $1 ટ્રિલિયનની નેટવર્થ ધરાવતા વિશ્વના સર્વપ્રથમ વ્યક્તિ બનાવવાની ખૂબ જ નજીક લઈ જઈ રહ્યો છે. સત્તાવાર રીતે સ્પેસ એક્સપ્લોરેશન ટેક્નોલોજીસ કોર્પ તરીકે ઓળખાતી આ કંપની વૈશ્વિક ઇતિહાસના સૌથી મોટા IPO દ્વારા $75 બિલિયન એકત્ર કરવા જઈ રહી છે. કંપનીએ પ્રતિ શેર $135ની ઓફરિંગ કિંમત નક્કી કરી છે, જે સ્પેસએક્સનું કુલ બજાર મૂલ્ય આશરે $1.77 ટ્રિલિયન આકે છે. આ ઐતિહાસિક IPOની પ્રાઇસિંગ 11 જૂનના રોજ જાહેર થવાની ધારણા છે અને તેના આગલા દિવસે નાસ્ડેક (Nasdaq) પર તેનું ટ્રેડિંગ શરૂ થશે.

$1 ટ્રિલિયનની નેટવર્થનું સંપૂર્ણ ગણિત

બ્લૂમબર્ગ બિલિયોનેર્સ ઇન્ડેક્સ અનુસાર, એલોન મસ્કની વર્તમાન નેટવર્થ આશરે $716 બિલિયન હોવાનો અંદાજ છે, જેમાંથી સ્પેસએક્સમાં તેમનો હિસ્સો જ આશરે $542 બિલિયન જેટલો છે. મસ્ક આ ઓફરિંગમાં પોતાનો કોઈ પણ શેર વેચી રહ્યા નથી અને લિસ્ટિંગ પછી પણ કંપની પર તેમનું સંપૂર્ણ નિયંત્રણ રહેશે. તેઓ ખાસ ક્લાસના શેર દ્વારા કંપનીમાં આશરે 82.4 ટકા મતદાન શક્તિ (Voting Power) જાળવી રાખશે. મસ્ક પાસે હાલમાં ટેસ્લા (Tesla) કંપનીના આશરે $273 બિલિયનના સ્ટોક અને ઓપ્શન્સ છે. જો સ્પેસએક્સ તેના નિર્ધારિત $1.77 ટ્રિલિયનના મૂલ્યાંકન પર લિસ્ટ થાય છે, તો કંપનીમાં મસ્કનો હિસ્સો વધીને આશરે $841 બિલિયન થઈ જશે, કારણ કે તેઓ કંપનીનો લગભગ અડધો ભાગ ધરાવે છે. આ સ્થિતિમાં, ટેસ્લા અને સ્પેસએક્સ બંનેનું સંયુક્ત મૂલ્ય $1.11 ટ્રિલિયન પર પહોંચી જશે, જે મસ્કને ઇતિહાસના પ્રથમ ટ્રિલિયન-ડોલર વ્યક્તિ બનાવશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સાઉદી અરામકોનો રેકોર્ડ તૂટશે: રોકાણકારોમાં ભારે ઉત્સાહ

સ્પેસએક્સ આ IPOમાં 555.6 મિલિયન શેર વેચવાની યોજના ધરાવે છે. આના દ્વારા એકત્ર થનારી $75 બિલિયનની રકમ, વર્ષ 2019માં સાઉદી અરામકો દ્વારા એકત્ર કરાયેલા રેકોર્ડબ્રેક વળતર કરતાં લગભગ ૩ ગણી વધારે છે. બજારના અહેવાલો અનુસાર, રોકાણકારો તરફથી અત્યાર સુધીમાં $150 બિલિયનની માંગ આવી ચૂકી છે, જે દર્શાવે છે કે આ ઇશ્યૂ અત્યાર સુધીમાં 2 ગણો ઓવરસબ્સ્ક્રાઇબ થઈ ગયો છે. આ ઇશ્યૂની ખાસિયત એ છે કે તે સંપૂર્ણપણે પ્રાથમિક વેચાણ (Primary Sale) છે, એટલે કે આ તમામ રકમ જૂના રોકાણકારોના બદલે સીધી સ્પેસએક્સ કંપનીના વિકાસ માટે જશે. કંપનીએ છૂટક (Retail) રોકાણકારો માટે પણ આ ઓફરનો 30% હિસ્સો અનામત રાખ્યો છે.

નાણાકીય ખોટ છતાં મજબૂત ભવિષ્ય પર દાવ

નાણાકીય વર્ષ 2025માં સ્પેસએક્સે $18.67 બિલિયનની આવક નોંધી હતી, જે અગાઉના વર્ષ કરતા 33% વધુ હતી. જોકે, આ ગાળામાં કંપનીને $4.94 બિલિયનની ચોખ્ખી ખોટ પણ થઈ હતી. આમ છતાં, રોકાણકારો કોમર્શિયલ સ્પેસ લોન્ચમાં કંપનીનો એકચક્રી મોનોપોલી, સ્ટારલિંક (Starlink) સેટેલાઇટ ઇન્ટરનેટનો ઝડપી વિકાસ અને આર્ટિફિશિયલ ઇન્ટેલિજન્સ (AI) માળખામાં રહેલી ભવિષ્યની તકો પર મોટો દાવ લગાવી રહ્યા છે. આ લિસ્ટિંગ સાથે જ સ્પેસએક્સ કંપની અમેરિકાની ટોપ 10 સૌથી મૂલ્યવાન લિસ્ટેડ કંપનીઓમાં સામેલ થઈ જશે, જેમાં તે Nvidia, Microsoft, Apple અને Amazon જેવી દિગ્ગજ કંપનીઓની હરોળમાં સ્થાન મેળવશે. મસ્ક સત્તાવાર રીતે લિસ્ટિંગના દિવસે જ ટ્રિલિયનેર બને છે કે થોડા સમય પછી, તેનો આધાર નાસ્ડેક પર સ્પેસએક્સના શેરના પર્ફોર્મન્સ પર રહેશે.

આ પણ વાંચો: શું હવે વધુ UPI પેમેન્ટ કરવા પર લાગશે ચાર્જ? બેંકોના વધતા બોજ પર RBIએ આપ્યો જવાબ!