ગુજરાતટોપ ન્યૂઝટ્રેન્ડિંગ

ગુજરાતમાં કાર-બાઈક પર જાતિનું નામ લખવું પડશે ભારે! પાટીદાર-રાજપૂત જેવા લખાણો પર પ્રતિબંધ, સરકારે જાહેર કર્યા નવા નિયમો

Gujarat Motor Vehicle Rules 2026: ગુજરાતમાં પોતાના વાહન પર જ્ઞાતિ કે જાતિની ઓળખ દર્શાવતા શબ્દો અને સ્ટિકર લગાવતા વાહનચાલકો માટે મહત્ત્વના સમાચાર સામે આવ્યા છે. રાજ્ય સરકારે ખાનગી વાહનો પર જાતિસૂચક શબ્દો, ચિહ્નો અને લખાણ પ્રદર્શિત કરવા પર પ્રતિબંધ મૂક્યો છે. હવે કાર, બાઈક, સ્કૂટર, થ્રી-વ્હીલર, બસ કે ટ્રક પર પાટીદાર, રાજપૂત સહિત જાતિ દર્શાવતા લખાણો લગાવનારાઓ સામે નિયમ મુજબ કાર્યવાહી થઈ શકે છે. આ માટે ગુજરાત સરકારના બંદરો અને વાહનવ્યવહાર વિભાગે મોટર વાહન નિયમોમાં મહત્ત્વનો સુધારો કર્યો છે.

વાહનો પર જાતિનું પ્રદર્શન નહીં ચાલે!

ગુજરાતમાં અનેક વાહનોની પાછળ કે આગળના કાચ પર જ્ઞાતિ, સમાજ કે ઓળખ દર્શાવતા શબ્દો અને સ્ટિકર જોવા મળે છે. ખાસ કરીને કેટલાક વાહનચાલકો પોતાની સામાજિક ઓળખ દર્શાવવા માટે વાહનો પર મોટા અક્ષરોમાં વિવિધ નામ અને ચિહ્નો લગાવતા હોય છે. હવે રાજ્ય સરકારે આવી પ્રવૃત્તિઓ પર નિયંત્રણ લાવવા માટે કાયદાકીય જોગવાઈ વધુ સ્પષ્ટ કરી છે. નવા નિયમોમાં જાતિ દર્શાવતા ચિહ્નોનો સીધો ઉલ્લેખ કરવામાં આવ્યો છે. સનાતન અને હિન્દુ જેવા ધાર્મિક ઓળખ દર્શાવતા શબ્દો અંગે પણ ચર્ચા શરૂ થઈ છે. જોકે, જાહેર થયેલા સુધારામાં ખાસ કરીને જાતિસૂચક ચિહ્નોનો ઉલ્લેખ છે. ધાર્મિક લખાણોના દરેક પ્રકાર પર પ્રતિબંધ લાગુ પડે છે કે નહીં તે બાબતે સત્તાવાર સ્પષ્ટતા જરૂરી છે.

17 નવેમ્બરે સરકારે જાહેર કર્યું નવું જાહેરનામું

રાજ્ય સરકારના બંદરો અને વાહનવ્યવહાર વિભાગે 17 નવેમ્બર, 2026ના રોજ ‘ગુજરાત મોટર વાહન (ત્રીજો સુધારો) નિયમો, 2026’ જાહેર કર્યા છે. આ સુધારા દ્વારા ગુજરાત મોટર વાહન નિયમો, 1989ના નિયમ 125 અને નિયમ 138માં ફેરફાર કરવામાં આવ્યા છે. આ ફેરફારનો મુખ્ય હેતુ ખાનગી વાહનો પર જાતિ આધારિત ઓળખ દર્શાવતા ચિહ્નો અને લખાણોના પ્રદર્શનને નિયંત્રિત કરવાનો છે.

નિયમ 125માં શું બદલાયું?

સરકારે નિયમ 125ના પેટાનિયમ (1)માં મહત્ત્વનો ફેરફાર કર્યો છે. અગાઉ આ નિયમમાં ‘No advertising device, figure’ શબ્દોનો ઉલ્લેખ હતો. હવે તેમાં ‘No advertising device, caste signage, figure’ શબ્દોનો સમાવેશ કરવામાં આવ્યો છે. આ ફેરફારથી વાહનો પર જાતિ દર્શાવતા ચિહ્નોને પણ નિયમના દાયરામાં સ્પષ્ટપણે આવરી લેવામાં આવ્યા છે.

નિયમ 138માં ઉમેરાઈ નવી જોગવાઈ

નિયમ 138ના પેટાનિયમ (2) પછી નવું પેટાનિયમ (3) ઉમેરવામાં આવ્યું છે. આ જોગવાઈ મુજબ રાજ્ય સરકારના સામાન્ય અથવા વિશેષ હુકમથી મંજૂરી આપવામાં આવી હોય તેવા અપવાદ સિવાય કોઈપણ ખાનગી વાહન પર જાહેરાત સંબંધિત ઉપકરણ, જાતિ દર્શાવતું ચિહ્ન, આકૃતિ કે કોઈપણ પ્રકારનું લખાણ પ્રદર્શિત કરી શકાશે નહીં. આથી વાહન પર સ્ટિકર, જાતિ દર્શાવતું નામ કે અન્ય પ્રકારનું લખાણ લગાવતા પહેલાં વાહનચાલકોએ નવા નિયમો ધ્યાનમાં લેવા પડશે.

કયા વાહનો પર લાગુ પડશે નિયમ?

નવા નિયમોના દાયરામાં ખાનગી વાહનોની વિવિધ શ્રેણીઓનો સમાવેશ થાય છે. તેમાં ટુ-વ્હીલર, થ્રી-વ્હીલર, કાર અને ખાનગી બસ તથા ટ્રક સહિતના વાહનોનો સમાવેશ થાય છે. ખાસ કરીને વાહનના આગળના કે પાછળના ભાગમાં જાતિ દર્શાવતા શબ્દો અને ચિહ્નો લગાવવાની બાબત હવે નિયમન હેઠળ આવી ગઈ છે.

મુસદ્દા સામે 30 દિવસમાં એકપણ વાંધો નહીં

આ નિયમો અચાનક જાહેર કરવામાં આવ્યા નથી. રાજ્ય સરકારે અગાઉ 11 જૂન, 2026ના રોજ ગુજરાત સરકારના અસાધારણ રાજપત્રમાં સુધારાનો મુસદ્દો પ્રસિદ્ધ કર્યો હતો. મુસદ્દા અંગે અસરગ્રસ્ત લોકો પાસેથી 30 દિવસની અંદર વાંધા અને સૂચનો મંગાવવામાં આવ્યા હતા. જોકે આ સમયગાળા દરમિયાન સરકારને કોઈ વાંધો કે સૂચન મળ્યું ન હતું. ત્યારબાદ રાજ્ય સરકારે સુધારાને અંતિમ સ્વરૂપ આપીને 17 નવેમ્બરે નવા નિયમો જાહેર કર્યા હતા.

સરકારની મંજૂરી હોય તો મળી શકે છૂટ

નવા નિયમોમાં કેટલીક પરિસ્થિતિમાં અપવાદની પણ જોગવાઈ રાખવામાં આવી છે. રાજ્ય સરકાર સામાન્ય અથવા વિશેષ હુકમ દ્વારા ચોક્કસ પ્રકારના પ્રદર્શનને મંજૂરી આપી શકે છે. અર્થાત્, નિયમોમાં પ્રતિબંધની જોગવાઈ હોવા છતાં સરકાર દ્વારા અધિકૃત રીતે મંજૂરી આપવામાં આવી હોય તો સંબંધિત પ્રદર્શન માટે છૂટ મળી શકે છે.

વાહનચાલકોએ હવે શું ધ્યાન રાખવું?

જો તમારી કાર, બાઈક કે અન્ય ખાનગી વાહન પર જાતિ દર્શાવતું નામ, સ્ટિકર અથવા ચિહ્ન લગાવેલું હોય તો નવા નિયમોની જોગવાઈ તપાસવી જરૂરી છે. વાહન પર કોઈપણ પ્રકારનું વધારાનું લખાણ કે ચિહ્ન લગાવતાં પહેલાં તે કાયદેસર રીતે માન્ય છે કે નહીં તેની ખાતરી કરવી જોઈએ. નિયમોનું ઉલ્લંઘન કરનાર સામે લાગુ કાયદાકીય જોગવાઈ અનુસાર કાર્યવાહી થઈ શકે છે. જોકે નવા સુધારામાં આ ઉલ્લંઘન બદલ કેટલો ચોક્કસ દંડ વસૂલવામાં આવશે તેની અલગ રકમ જાહેર કરવામાં આવી હોવાની પુષ્ટિ મળી નથી. ગુજરાત સરકારના આ નિર્ણયથી ખાનગી વાહનો પર જાતિ આધારિત ઓળખના પ્રદર્શનને લઈને કાયદાકીય નિયમન વધુ સ્પષ્ટ બન્યું છે.

આ પણ વાંચોઃ નેપાલના PM બાલેન શાહ 22 નવેમ્બરના ભારતની મુલાકાતે, PM મોદી સાથે કરશે દ્વિપક્ષીય વાટાઘાટો
Back to top button