‘સરદાર જી 3’ને લઈને વિવાદ, બૉયકોટ છતાં દિલજીત સાથે જોવા મળી પાકિસ્તાની હાનિયા આમિર
- ફિલ્મનું ટ્રેલર રિલીઝ થયા પછી, સોશિયલ મીડિયા પર કેટલાક લોકોએ દિલજીત પર રાષ્ટ્ર વિરોધી માનસિકતા હોવાનો આરોપ લગાવ્યો છે
23 જૂન, 2025, મુંબઈઃ પ્રખ્યાત પંજાબી ગાયક અને અભિનેતા દિલજીત દોસાંઝ હાલમાં તેની આગામી ફિલ્મ Sardar Ji 3 માટે ચર્ચામાં છે, પરંતુ આ ફિલ્મને કારણે તેની પ્રશંસા નહીં પણ ટીકા થઈ રહી છે. તેનું કારણ આ ફિલ્મમાં પાકિસ્તાની અભિનેત્રી હાનિયા આમીરની હાજરી છે. ફિલ્મનું ટ્રેલર રિલીઝ થયા પછી, સોશિયલ મીડિયા પર કેટલાક લોકોએ દિલજીત પર રાષ્ટ્ર વિરોધી માનસિકતા હોવાનો આરોપ લગાવ્યો છે.
ફિલ્મના ટ્રેલરમાં દિલજીત અને હાનિયા બંનેને સ્ક્રીન પર એકસાથે બતાવવામાં આવ્યા છે, જ્યાં તેઓ ભૂત ભગાવવાનું કામ કરે છે. જોકે ભારત અને પાકિસ્તાન વચ્ચે વધતા તણાવ વચ્ચે ફિલ્મમાં પાકિસ્તાની કલાકારને સામેલ કરવા પર ઘણા લોકોએ નારાજગી વ્યક્ત કરી છે.
View this post on Instagram
સોશિયલ મીડિયા પર તીવ્ર પ્રતિક્રિયાઓ આવી
રેડિટ જેવા પ્લેટફોર્મ પર યુઝર્સે દિલજીતની ટીકા કરતા કહ્યું કે યુદ્ધ દરમિયાન એક પણ શબ્દ બોલ્યો નહીં… હવે મને સમજાયું કે શા માટે. બીજા યુઝરે લખ્યું, “હવે દિલજીત પાસેથી કોઈ દેશભક્તિની અપેક્ષા નથી, આશા છે કે તેને હવે સેના પર આધારિત ફિલ્મોમાંથી દૂર કરવામાં આવશે.” એક યુઝરે કહ્યું, ‘દિલજીત હંમેશા અલગતાવાદી રહ્યો છે, આ કંઈ નવું નથી.’ ઘણા યુઝર્સે તેને ‘શરમજનક’ અને ‘ભારત વિરોધી’ પણ કહ્યો.
ભારત અને પાકિસ્તાન વચ્ચેની તાજેતરની સ્થિતિ
22 એપ્રિલના રોજ જમ્મુ અને કાશ્મીરના પહેલગામમાં થયેલા આતંકવાદી હુમલામાં 26 લોકોએ જીવ ગુમાવ્યા હતા. આ પછી 7 મેના રોજ ભારતીય સેનાએ ઓપરેશન સિંદૂર હેઠળ પાકિસ્તાનમાં આતંકવાદી છાવણીઓને યોગ્ય જવાબ આપ્યો હતો. જો કે બંને દેશોએ પાછળથી પરસ્પર સંમતિથી લશ્કરી કાર્યવાહી બંધ કરવાનો નિર્ણય લીધો હતો.
હાનિયા અને દિલજીતની જૂની મુલાકાત
દિલજીત દોસાંઝ અને હાનિયા આમિર અગાઉ લંડનના O2 અરિનામાં આયોજિત એક મ્યુઝિક શો દરમિયાન સાથે જોવા મળ્યા હતા. દિલજીતે હાનિયાને સ્ટેજ પર બોલાવી હતી અને બંનેએ મૈત્રીપૂર્ણ વાતચીત કરી હતી.
સરદાર જી ૩ વિશે
‘સરદાર જી ૩’ એક હોરર-કોમેડી ફિલ્મ છે જેમાં દિલજીત અને હાનિયાના પાત્રોને યુકેના એક હવેલીમાંથી આત્મા ભગાડવાની જવાબદારી સોંપવામાં આવે છે. આ ફિલ્મનું દિગ્દર્શન અમર હુંડલ દ્વારા કરવામાં આવ્યું છે અને તેમાં માનવ વિજ, ગુલશન ગ્રોવર, જસ્મીન બાજવા અને સપના પબ્બી પણ મુખ્ય ભૂમિકામાં છે. આ ફિલ્મ 27 જૂને ફક્ત વિદેશમાં જ રિલીઝ થશે.
આ પણ વાંચોઃ બોક્સ ઓફિસ પર છવાઈ આમિર ખાનની સિતારે જમીં પર, 50 કરોડને પાર
