અમદાવાદમાં ટ્રાફિક પોલીસની મંજૂરીથી લગાવેલા બેનરો વિવાદમાં, સોશિયલ મીડિયા પર વાયરલ થતાં હટાવાયા

અમદાવાદ 2 ઓગસ્ટ 2025:  અમદાવાદ શહેરમાં સતર્કતા નામની એનજીઓ દ્વારા ટ્રાફિક જાગૃતિ ફેલાવવા માટે ટ્રાફિક પોલીસની મંજૂરીથી લગાવવામાં આવેલા બેનરો અને પોસ્ટરો વિવાદનું કારણ બન્યા. આ બેનરો સાયન્સ સિટી, ડમરુ સર્કલ અને એસ.જી. હાઈવે જેવા વિસ્તારોમાં લગાવવામાં આવ્યા હતા. જોકે, આ બેનરોનું લખાણ વિવાદાસ્પદ હોવાનું ધ્યાને આવતાં તે સોશિયલ મીડિયા પર વાયરલ થયું, જેના કારણે ભારે વિવાદ ઊભો થયો.

આ બેનરોમાં ખાસ કરીને મહિલાઓની સુરક્ષા સાથે સંબંધિત લખાણ હોવાનું જાણવા મળ્યું છે, જેનું ખોટું અર્થઘટન થતાં જનતામાં રોષ ફેલાયો. મળતી વિગતો પ્રમાણે, આ બેનરો શહેરના ચાંદલોડિયા બ્રિજ પાસે પણ લગાવવામાં આવ્યા હતા, જેમાં સુરક્ષા સાથે જોડાયેલા મુદ્દાઓ પર ટિપ્પણી કરવામાં આવી હતી, જેને લઈને રાજકીય ગરમાવો પણ જોવા મળ્યો.

વિવાદ વધતાં અમદાવાદ ટ્રાફિક પોલીસે તાત્કાલિક આ બેનરો અને પોસ્ટરો હટાવી દીધા. સતર્કતા એનજીઓને કડક સૂચના આપવામાં આવી છે કે ભવિષ્યમાં પોલીસની મંજૂરી વિના અને લખાણની પૂર્વ મંજૂરી વિના આવા કોઈ પણ પોસ્ટર કે બેનર લગાવવામાં ન આવે. ટ્રાફિક પોલીસે સ્પષ્ટપણે જણાવ્યું છે કે આવા વિવાદાસ્પદ લખાણથી ખોટો સંદેશ જાય છે, જે જાહેર જનતા અને શહેરની સુરક્ષાની છબીને અસર કરે છે.

આ ઘટનાએ શહેરમાં ચર્ચાનો વિષય બની રહેલા સુરક્ષા અને જાગૃતિ અભિયાનોની પ્રક્રિયા પર પણ સવાલો ઉભા કર્યા છે. અધિકારીઓએ જણાવ્યું કે આગળ જતાં આવા અભિયાનોમાં વધુ સાવચેતી રાખવામાં આવશે.

આ પણ વાંચો: અમદાવાદમાં પોલીસે બાળ તસ્કરીના રેકેટનો કર્યો પર્દાફાશ