ચરોતર પંથકના આણંદ જિલ્લામાંથી પસાર થતા નેશનલ હાઈવે પર આજે વહેલી સવારે એક એવી હૃદયદ્રાવક દુર્ઘટના ઘટી, જેણે સમગ્ર પંથકને ધ્રુજાવી મૂક્યો છે. આણંદ નજીક આવેલા અડાસ ગામની સીમમાં વડોદરા-અમદાવાદ રાષ્ટ્રીય ધોરીમાર્ગ પર એક બેકાબૂ કારે માર્ગ કિનારે ઉભેલા પાંચ લોકોને કચડી નાખ્યા હતા. આ ગમખ્વાર અકસ્માતમાં બે વ્યક્તિઓના ઘટનાસ્થળે જ કમકમાટીભર્યા મોત નીપજ્યા છે. આ અકસ્માત સામાન્ય નથી, કારણ કે અકસ્માત સર્જનાર કાર રાજ્યના ઉચ્ચ પોલીસ અધિકારી એટલે કે બોટાદના ડીવાયએસપી (DySP) એ.એ. સૈયદની હોવાનું સામે આવતા જ પોલીસ બેડા સહિત સમગ્ર પંથકમાં ભારે ચકચાર મચી ગઈ છે.
શેરડીનો રસ પી રહ્યા હતા અને કાળ ત્રાટક્યો
મળતી વિગત અનુસાર, બોટાદના DySP એ.એ. સૈયદ પોતાની કાર લઈને વડોદરા તરફથી આણંદ તરફ આવી રહ્યા હતા. વહેલી સવારનો સમય હોવાથી હાઈવે પર ટ્રાફિક પ્રમાણમાં હળવો હતો. આ દરમિયાન અડાસ ગામ નજીક હાઈવેના કિનારે એક ખેડૂતે શેરડીના રસનું કોલુ (ચીંચોડો) લગાવેલું હતું. ગરમીની મોસમ હોવાના કારણે વહેલી સવારે હાઈવે પરથી પસાર થતા કેટલાક વાહનચાલકો અને સ્થાનિક લોકો ત્યાં ઉભા રહીને તાજો શેરડીનો રસ પી રહ્યા હતા.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
બરાબર એ જ સમયે DySPની કાર પૂરપાટ ઝડપે ત્યાંથી પસાર થઈ રહી હતી. અચાનક આ કાર પરથી ચાલકે કાબૂ ગુમાવી દીધો હતો અને બેકાબૂ બનેલી કાર હાઈવે છોડીને સીધી જ શેરડીના રસના કોલુ પર ઉભેલા નિર્દોષ લોકો પર ચઢી ગઈ હતી. કારની ઝડપ અને ટક્કર એટલી પ્રચંડ હતી કે શેરડીનો આખો ચીંચોડો હવામાં ફંગોળાઈને રોડ પર દૂર જઈ પડ્યો હતો અને ત્યાં ઉભેલા લોકો લોહીલુહાણ હાલતમાં રસ્તા પર પટકાયા હતા.
બે લોકોના ઘટનાસ્થળે જ મોત, ત્રણની હાલત નાજુક
આ કાળમુખી ટક્કરમાં કારની સીધી અડફેટે આવેલા પાંચ લોકોમાંથી બે વ્યક્તિઓને માથાના તેમજ શરીરના અન્ય ભાગોમાં એટલી ગંભીર ઇજાઓ થઈ હતી કે તેઓને હોસ્પિટલ પહોંચાડવાનો પણ મોકો ન મળ્યો અને તેમણે ઘટનાસ્થળે જ દમ તોડી દીધો હતો. જ્યારે અન્ય ત્રણ લોકો લોહીથી લથપથ હાલતમાં ચીસાચીસ કરી રહ્યા હતા. અકસ્માત થતાં જ હાઈવે પરથી પસાર થતા અન્ય વાહનચાલકો અને આસપાસના ગ્રામજનો તાત્કાલિક મદદ માટે ઘટનાસ્થળે દોડી આવ્યા હતા. સ્થાનિક લોકોએ તુરંત જ 108 ઇમરજન્સી એમ્બ્યુલન્સને ફોન કર્યો હતો. ઘટનાસ્થળે પહોંચેલી એમ્બ્યુલન્સ મારફતે ત્રણેય ગંભીર ઇજાગ્રસ્તોને તાત્કાલિક નજીકની હોસ્પિટલમાં ખસેડવામાં આવ્યા છે, જ્યાં તેમની સ્થિતિ અત્યંત નાજુક હોવાનું તબીબો જણાવી રહ્યા છે.
વાહન ચલાવતી વખતે ઝોકું આવી ગયું હોવાની આશંકા
હાઈવે પર આટલી મોટી હોનારત અને તેમાં પણ રાજ્યના એક ક્લાસ-1 પોલીસ અધિકારીની કાર સંડોવાયેલી હોવાની માહિતી મળતા જ ઉચ્ચ પોલીસ અધિકારીઓ સહિત વાસદ પોલીસ સ્ટેશનનો મોટો કાફલો ઘટનાસ્થળે દોડી ગયો હતો. પોલીસે તાત્કાલિક કાર્યવાહી કરીને બંને મૃતકોના શબને પોસ્ટમોર્ટમ (PM) અર્થે સરકારી હોસ્પિટલમાં મોકલી આપ્યા હતા અને અકસ્માતગ્રસ્ત કારને હાઈવે પરથી હટાવી ટ્રાફિક વ્યવસ્થા પૂર્વવત કરી હતી.
પ્રાથમિક તપાસ અને ઘટનાસ્થળે હાજર લોકોના દાવા અનુસાર, વહેલી સવારે લાંબી ડ્રાઇવિંગના કારણે DySP એ.એ. સૈયદને અચાનક ઊંઘનું જોકું આવી ગયું હોવાની પ્રબળ આશંકા સેવાઈ રહી છે. ઝોકું આવી જવાને કારણે સ્ટેયરીંગ પરથી કાબૂ હટી ગયો હતો અને કાર સીધી રોડ કિનારે ઉતરીને અકસ્માત સર્જી બેઠી હતી.
વિસ્તારમાં ભારે રોષ અને શોકનો માહોલ
આ અકસ્માતને પગલે અડાસ ગામ અને આસપાસના વિસ્તારમાં ભારે અરેરાટી વ્યાપી ગઈ છે. માર્ગ કિનારે ઉભા રહીને માત્ર રસ પીતા નિર્દોષ લોકો કાળનો કોળિયો બની જતાં સ્થાનિક રહીશોમાં વહીવટી તંત્ર અને હાઈવે પર બેફામ દોડતા વાહનો સામે ભારે રોષની લાગણી જોવા મળી રહી છે. હાલમાં વાસદ પોલીસે આ મામલે અકસ્માતે મોતના ગુના હેઠળ કાયદેસરની ફરિયાદ નોંધીને અકસ્માતના ચોક્કસ કારણો જાણવા એફએસએલ (FSL)ની મદદ લેવાની તજવીજ પણ હાથ ધરી છે.
આ પણ વાંચો: Tharad: ખેત તલાવડીમાં ડૂબ્યા બે યુવાન, એકને બચાવવા જતાં બીજો પણ ગરકાવ
