બિહાર ચૂંટણી વચ્ચે અમિત શાહે વધાર્યું સસ્પેન્સઃ બિહારમાં મુખ્યમંત્રીના ચહેરા પર કહ્યું- ‘સમય જણાવશે…’

બિહાર, 21 જૂન, 2025: Bihar Election 2025: બિહાર વિધાનસભા ચૂંટણી 2025ના થોડા મહિના પહેલા, કેન્દ્રીય ગૃહમંત્રી અમિત શાહે ફરી એકવાર મુખ્યમંત્રી તરીકે નીતિશ કુમાર પર સસ્પેન્સ વધાર્યું છે. બિહારમાં મુખ્યમંત્રી પદના ઉમેદવારના પ્રશ્ન પર, ભારતીય જનતા પાર્ટી (ભાજપ)ના વરિષ્ઠ નેતા અમિત શાહે કહ્યું કે, બિહારમાં મુખ્યમંત્રી કોણ બનશે તે સમય કહેશે. જોકે, તેમણે સ્પષ્ટ કર્યું કે બિહારની ચૂંટણી નીતિશના નેતૃત્વમાં લડવામાં આવશે. શાહના આ જવાબથી નીતિશની પાર્ટી જેડીયુમાં ગભરાટ ફેલાઈ શકે છે. જેડીયુ સતત ’25 થી 30, ફરી નીતિશ’નો પ્રચાર કરી રહ્યું છે. તે જ સમયે, દિલીપ જયસ્વાલ, સમ્રાટ ચૌધરી જેવા બિહાર ભાજપના નેતાઓએ પણ ‘2025 ફરી નીતિશ’નો દાવો કરી ચૂક્યા છે.

રાજકીય માહોલ ગરમાયો

હકીકતમાં, અમિત શાહે બે દિવસ પહેલાં એક ઈન્ટરવ્યુમાં મુખ્યમંત્રીના ચહેરા વિશે જે જવાબ આપ્યો તેનાથી રાજકીય માહોલ ગરમાયો છે. ઈન્ટરવ્યુમાં તેમને પૂછવામાં આવ્યું હતું કે આગામી બિહાર વિધાનસભા ચૂંટણીનો મુદ્દો વિકાસ હશે કે જાતિ? તેના પર ગૃહમંત્રીએ જવાબ આપ્યો કે ચૂંટણીના મુદ્દાઓ હંમેશા જનતા દ્વારા નક્કી કરવામાં આવે છે. પરંતુ અમારું માનવું છે કે બિહારના લોકો માટે વિકાસ સૌથી મોટો મુદ્દો છે.

ત્યારબાદ, જ્યારે શાહને પૂછવામાં આવ્યું કે બિહારમાં NDAના મુખ્યમંત્રી પદના ઉમેદવાર કોણ છે, ત્યારે તેમણે કહ્યું, ‘બિહારના મુખ્યમંત્રી કોણ હશે તે તો સમય જ કહેશે, પરંતુ અમે મુખ્યમંત્રી તરીકે નીતિશ કુમારના નેતૃત્વમાં ચૂંટણી લડવાના છીએ.’

અમિત શાહે કરી સ્પષ્ટતા

નીતિશ સરકારમાં જળ સંસાધન મંત્રી અને જેડીયુના વરિષ્ઠ નેતા વિજય કુમાર ચૌધરીએ શનિવારે જણાવ્યું હતું કે, કેન્દ્રીય ગૃહમંત્રી અમિત શાહે સ્પષ્ટ કરી દીધું છે કે આગામી વિધાનસભા ચૂંટણી નીતિશ કુમારના નેતૃત્વમાં લડવામાં આવશે. પટનાના સિંચાઈ ભવનમાં પત્રકારો સાથે વાત કરતા એક પ્રશ્નના જવાબમાં મંત્રીએ કહ્યું કે નીતિશ બિહારમાં એનડીએનું નેતૃત્વ કરશે.

આ પહેલાં પણ અમિત શાહે કરી હતી ગોળ-ગોળ વાત

આ પહેલી વાર નથી જ્યારે અમિત શાહે નીતિશ કુમાર અંગે સસ્પેન્સ વધાર્યું હોય. લગભગ 6 મહિના પહેલા પણ એક ઈન્ટરવ્યુ દરમિયાન તેમણે NDAના મુખ્યમંત્રી ઉમેદવારના પ્રશ્નનો અસ્પષ્ટ જવાબ આપ્યો હતો. તેમને પૂછવામાં આવ્યું હતું કે શું ભાજપ નીતિશ કુમારના નેતૃત્વમાં ચૂંટણી લડશે? આના જવાબમાં શાહે જવાબ આપ્યો હતો કે તેઓ પાર્ટીના શિસ્તબદ્ધ કાર્યકર છે. પાર્ટીના નિર્ણયો આવા પ્લેટફોર્મ પર લેવામાં નથી આવતા. આ અંગે પાર્ટી સંસદીય બોર્ડની બેઠકમાં વિચારણા કરવામાં આવશે અને પછી નિર્ણય લેવામાં આવશે.

શાહના આ નિવેદન પછી, એવી અટકળો શરૂ થઈ ગઈ કે, ભાજપ બિહારમાં પણ મહારાષ્ટ્ર મોડેલ લાગુ કરી શકે છે. એટલે કે, જો 2025ના અંતમાં યોજાનારી બિહાર ચૂંટણીમાં NDA સત્તામાં પાછું આવે છે, તો નીતિશની જગ્યાએ કોઈ અન્ય નેતાને મુખ્યમંત્રી બનાવી શકાય છે. ગયા વર્ષે મહારાષ્ટ્રની ચૂંટણી પછી, ભાજપે શિવસેનાના એકનાથ શિંદેને બદલે પોતાની પાર્ટીના દેવેન્દ્ર ફડણવીસને મુખ્યમંત્રી બનાવ્યા હતા.

આ પણ વાંચોઃ બિહાર ચૂંટણી વચ્ચે ચિરાગ પાસવાનના બદલાયા સૂર? પોતાની જ સરકારની વિરોધમાં લખ્યો પત્ર

આ પણ વાંચોઃ 22 વર્ષ જૂની ફિલ્મ વિશે સલમાન ખાને મૌન તોડ્યું, આ વાત વર્ષોથી છુપાવીને રાખી હતી