પ્રેમ પ્રસંગથી પરેશાન યુવક આત્મહત્યા કરવા જતો હતો, સોશિયલ મીડિયાની સતર્કતાએ બચાવી લીધી જિંદગી

 નવી દિલ્હી, 23 જાન્યુઆરી 2026:   આજના સમયમાં સોશિયલ મીડિયા માત્ર મનોરંજન પૂરતું નથી રહ્યું, પરંતુ અનેક વખત લોકોની જિંદગી બચાવવાનું મહત્વનું સાધન પણ બની રહ્યું છે. આવો જ એક ચોંકાવનારો અને રાહત આપતો કિસ્સો દેશની રાજધાની દિલ્હીમાંથી સામે આવ્યો છે, જ્યાં પ્રેમ પ્રસંગથી પરેશાન 19 વર્ષીય યુવક આત્મહત્યા કરવા જતો હતો, પરંતુ સોશિયલ મીડિયા અને દિલ્હી પોલીસની ઝડપી કાર્યવાહીથી તેનો જીવ બચી ગયો.

શું છે સમગ્ર મામલો?

આ સમગ્ર ઘટના 21 જાન્યુઆરી 2026ની સાંજની છે. સોશિયલ મીડિયા પ્લેટફોર્મ ‘એક્સ’ (X) પર એક યુઝરે દિલ્હી પોલીસને ટૅગ કરીને જાણકારી આપી હતી કે તેનો એક ઓળખીતો યુવક ટેલિગ્રામ પર ચેટ દરમિયાન આત્મહત્યાની વાતો કરી રહ્યો છે. યુવકે પ્રેમ સંબંધમાં ચાલી રહેલી મુશ્કેલીઓથી કંટાળી રેલવે ટ્રેક પર જઈને આત્મહત્યા કરવાની વાત કરી હતી.

પોલીસએ તરત જ એક્શન લીધું

માહિતી મળતાની સાથે જ દિલ્હી પોલીસના મુખ્યાલયમાં આવેલ સોશિયલ મીડિયા કંટ્રોલ રૂમની ટીમે મામલાની ગંભીરતા સમજીને તરત કાર્યવાહી શરૂ કરી. યુવકનું નામ અને મોબાઇલ નંબર મળ્યા બાદ આ માહિતી ન્યૂ દિલ્હી રેલવે સ્ટેશન પોલીસ સ્ટેશનને મોકલવામાં આવી.

તપાસ દરમિયાન ખુલાસો થયો કે યુવક ન્યૂ દિલ્હી રેલવે સ્ટેશન નહીં પરંતુ હઝરત નિઝામુદ્દીન રેલવે સ્ટેશન પર હાજર હતો. ત્યારબાદ કંટ્રોલ રૂમે તાત્કાલિક આ જાણકારી હઝરત નિઝામુદ્દીન રેલવે સ્ટેશન પોલીસને આપી.

મોટી અનહોની ટળી

માહિતી મળતા જ થાણા પ્રભારી ઇન્સ્પેક્ટર શંભૂ નાથ પોતાની ટીમ સાથે તાત્કાલિક ઘટનાસ્થળે પહોંચ્યા અને સમયસર યુવકને સુરક્ષિત રીતે બચાવી લીધો. પોલીસની સતર્કતા અને ઝડપી કાર્યવાહીના કારણે એક મોટી દુર્ઘટના ટળી ગઈ.

બાદમાં યુવકની યોગ્ય કાઉન્સેલિંગ કરવામાં આવી અને તેને સુરક્ષિત રીતે તેના ચાચાના હવાલે સોંપવામાં આવ્યો, જે દિલ્હીના જૈતપુર વિસ્તારના રહેવાસી છે.

આ ઘટના ફરી એકવાર સાબિત કરે છે કે સોશિયલ મીડિયા જો સકારાત્મક રીતે ઉપયોગમાં લેવાય તો તે જીવન બચાવવાનું શક્તિશાળી માધ્યમ બની શકે છે.

આ પણ વાંચો : કરણ જોહરના સરપ્રાઇઝથી રાની મુખર્જી થઈ ભાવુક, દીકરી આદિરાની ચીઠ્ઠી જોઈ આંખોમાં આવ્યા આંસુ