અમેરિકામાં 9.4 અબજ ડોલરના મોબાઇલ મોકલાયા, સપ્ટેમ્બરમાં નિકાસમાં 95 ટકાનો વધારો

નવી દિલ્હી, 15 ઓક્ટોબર, 2025: ભારતની મોબાઇલ ફોનની નિકાસ વાર્ષિક આધાર પર 95 ટકા વધીને 1.8 અબજ ડોલરને પાર થઇ ગઇ છે. ઇન્ડિયા સેલ્યુલર ઇલેક્ટ્રોનીક્સ એસોયિસેશન (આઇસીએ)એ જણાવ્યું છે કે ઉત્પાદન ગોઠવણો અને મોસમી પુરવઠા ચક્રને કારણે ઓગસ્ટ અને સપ્ટેમ્બર પરંપરાગત રીતે નિકાસ માટે ધીમા મહિના માનવામાં આવે છે. જોકે, આ વર્ષનું મજબૂત પ્રદર્શન દેશમાં વિકસિત થયેલા મજબૂત મોબાઇલ ફોન ઉત્પાદન ઇકોસિસ્ટમને પ્રતિબિંબિત કરે છે.

ICEAએ જણાવ્યું હતું કે, એપ્રિલ-સપ્ટેમ્બર દરમિયાન મોબાઇલ ફોનની નિકાસ 60 ટકાથી વધુ વધીને 13.5 અબજ ડોલરની થઈ ગઈ છે. એક વર્ષ પહેલાના સમાન સમયગાળામાં આ આંકડો 8.5 અબજ ડોલર હતો. આ દર્શાવે છે કે ભારતનું મોબાઇલ ફોન ઉત્પાદન ક્ષેત્ર વૈશ્વિક સ્પર્ધા માટે તૈયાર છે, જે સ્કેલ, કાર્યક્ષમતા અને વિશ્વસનીયતાના ત્રણ સ્તંભો પર આધારિત છે. ચાલુ નાણાકીય વર્ષ 2025-26માં ભારતની મોબાઇલ ફોન નિકાસ લગભગ 35 અબજ ડોલર સુધી પહોંચી શકે છે.

અમેરિકામાં નિકાસમાં 200%નો ઉછાળો

ભારતમાં ઉત્પાદિત મોબાઇલ ફોન મુખ્યત્વે અમેરિકા, સંયુક્ત આરબ અમીરાત, ઑસ્ટ્રિયા, નેધરલેન્ડ અને યુકેમાં નિકાસ કરવામાં આવે છે. ચાલુ નાણાકીય વર્ષના પ્રથમ છ મહિનામાં (એપ્રિલ-સપ્ટેમ્બર), આશરે 9.4 અબજ ડોલરના મોબાઇલ ફોન અમેરિકામાં નિકાસ કરવામાં આવ્યા હતા. આ એક વર્ષ પહેલા 3.1 અબજ ડોલરની સરખામણીમાં લગભગ 200%નો વધારો દર્શાવે છે. આ સમયગાળા દરમિયાન, કુલ મોબાઇલ ફોન નિકાસમાં અમેરિકાનો હિસ્સો આશરે 70% હતો.

આ પણ વાંચોઃ ધનતેરસ પર ગુરુનું ગોચર, આ રાશિઓને થશે લાભ, જાણો તમારી રાશિના હાલ