કોણ છે અલી લારીજાની જેણે ઈઝરાયેલે કર્યો મારવાનો દાવો? ખામેનેઈ બાદ કેમ માનવામાં આવે છે સૌથી શક્તિશાળી વ્યક્તિ
Ali Larijani Killed: ઈઝરાયેલ અને અમેરિકા સાથે ચાલી રહેલા સંઘર્ષ વચ્ચે એક અત્યંત મહત્વના સમાચાર સામે આવી રહ્યા છે. ઈઝરાયેલ ડિફેન્સ ફોર્સિસ (IDF) એ દાવો કર્યો છે કે તેણે ઈરાનની સુપ્રીમ નેશનલ સિક્યુરિટી કાઉન્સિલના ચીફ અલી લારીજાનીને એક ઓપરેશનમાં ખતમ કરી દીધા છે. જોકે, ઈરાન દ્વારા હજુ સુધી સત્તાવાર રીતે આ સમાચારની પુષ્ટિ કરવામાં આવી નથી.
કોણ છે અલી લારીજાની?
67 વર્ષીય અલી આર્દેશિર લારીજાની ઈરાનના સૌથી પ્રભાવશાળી ધાર્મિક અને રાજકીય પરિવારમાંથી આવે છે. છેલ્લા ચાર દાયકાથી દેશના ધાર્મિક, સૈન્ય અને ગુપ્તચર તંત્ર પર તેમની મજબૂત પકડ રહી છે. ઓગસ્ટ 2025 માં, તેમને ઈરાનની સર્વોચ્ચ રાષ્ટ્રીય સુરક્ષા પરિષદના સચિવ તરીકે નિયુક્ત કરવામાં આવ્યા હતા. ઈરાનના સુપ્રીમ લીડર ખામેનેઈ બાદ તેમને દેશના સૌથી શક્તિશાળી વ્યક્તિ માનવામાં આવતા હતા.
રાજકીય અને સૈન્ય કારકિર્દી
IRGC થી શરૂઆત: લારીજાનીએ તેમની કારકિર્દીની શરૂઆત ઈસ્લામિક રિવોલ્યુશનરી ગાર્ડ્સ કોર્પ્સ (IRGC) માં કમાન્ડર તરીકે કરી હતી.
સંસદ અધ્યક્ષ: તેઓ 2008 થી 2020 સુધી સતત ઈરાની સંસદના અધ્યક્ષ રહ્યા હતા, જે તેમની રાજકીય કુશળતા દર્શાવે છે.
મહત્વના હોદ્દા: 1994 માં તેઓ ઈસ્લામિક રિપબ્લિક ઓફ ઈરાન બ્રોડકાસ્ટિંગના વડા બન્યા અને 2004 માં સુપ્રીમ લીડર અલી ખામેનેઈના સલાહકાર તરીકે નિયુક્ત થયા.
શિક્ષણ અને પારિવારિક પૃષ્ઠભૂમિ
લારીજાનીનો જન્મ 3 જૂન 1958 ના રોજ એક પ્રતિષ્ઠિત શિયા મુસ્લિમ પરિવારમાં થયો હતો. તેમણે ઉચ્ચ શિક્ષણ મેળવ્યું છે અને ડોક્ટરેટની ડિગ્રી પણ ધરાવે છે. તેઓ રાષ્ટ્રપતિ મસૂદ પેજેશ્કિયનના કટ્ટર વિરોધી માનવામાં આવતા હતા, જેના કારણે ઈરાનના આંતરિક રાજકારણમાં તેમનું વિશેષ મહત્વ હતું.
કટ્ટરપંથી છબી અને પ્રભાવ
લારીજાનીને ઈરાનના કટ્ટરપંથી ખેમાના મોટા નેતા ગણવામાં આવે છે. 2024 ની ચૂંટણીમાં તેમને અયોગ્ય જાહેર કરવામાં આવ્યા હોવા છતાં, ખામેનેઈ સાથેની નિકટતાને કારણે તેમનો પ્રભાવ યથાવત રહ્યો હતો. તાજેતરમાં તેમણે ઈરાની સેનામાં અનેક મોટા ફેરફારો કર્યા હતા, જેમાં બ્રિગેડિયર જનરલ મોહમ્મદ અકરમિનિયાની નિમણૂકનો પણ સમાવેશ થાય છે.
આ પણ વાંચોઃ “બેંકિંગ સિસ્ટમ ગરીબ હોવાની સજા ન આપે”, મિનિમમ બેલેન્સના નામે બેંકોએ વસૂલ્યા 19,000 કરોડ
આ પણ વાંચોઃ ઈઝરાયલે કર્યો ઈરાનના સૌથી શક્તિશાળી બાસિજ દળના કમાન્ડર ગુલામ રઝા સુલેમાનીના મોતનો દાવો
અમારી WhatsApp ચેનલમાં જોડાવા આ લિંક પર ક્લીક કરો
