Vadodara News: ગુજરાતના ઔદ્યોગિક અને પરિવહન કેન્દ્ર ગણાતા વડોદરા શહેરમાં આજે સવારે એક ચોંકાવનારી અને ગંભીર દુર્ઘટના સર્જાઈ હતી. 114 કરોડના ખર્ચે બનેલા વડોદરા સેન્ટ્રલ બસ સ્ટેશનના ઉપરના સ્ટ્રક્ચરનો અચાનક મોટો ભાગ ધરાશાયી થતાં સમગ્ર વિસ્તારમાં અફરાતફરી મચી ગઈ હતી. આ અકસ્માતમાં એક વ્યક્તિનું ઘટનાસ્થળે જ મોત નીપજ્યું છે, જ્યારે એક વ્યક્તિ ગંભીર રીતે ઈજાગ્રસ્ત થયો છે.
સ્થાનિક લોકોના જણાવ્યા મુજબ, ઘટના અચાનક બની હતી. બસ સ્ટેશનના ઉપરના ભાગમાંથી મોટો કૉન્ક્રિટ અને સ્ટીલનો ભાગ તૂટીને નીચે પડતાં મુસાફરો અને સ્ટાફમાં દોડધામ મચી ગઈ હતી. અનેક લોકો જીવ બચાવવા માટે બસ સ્ટેન્ડમાંથી બહાર દોડી ગયા હતા, જેના કારણે થોડા સમય માટે સંપૂર્ણ બસ વ્યવહાર ઠપ થઈ ગયો હતો.
બચાવ કામગીરી તાત્કાલિક શરૂ
ઘટનાની જાણ થતાં જ ફાયર બ્રિગેડ, પોલીસ અને ઇમરજન્સી રેસ્ક્યુ ટીમો તાત્કાલિક સ્થળ પર પહોંચી ગઈ હતી. બચાવ દળોએ કાટમાળ નીચે કોઈ વ્યક્તિ ફસાઈ ગઈ છે કે નહીં તેની તપાસ શરૂ કરી છે. સમગ્ર વિસ્તારને કોર્ડન કરી દેવામાં આવ્યો છે અને સુરક્ષાના કારણોસર બસ સ્ટેશનને ખાલી કરાવવામાં આવ્યું છે.
આ ઘટનાને પગલે 108 એમ્બ્યુલન્સની ચાર ટીમો પણ તાત્કાલિક સ્થળે પહોંચી હતી. ઈજાગ્રસ્ત વ્યક્તિને સારવાર માટે તાત્કાલિક હોસ્પિટલ ખસેડવામાં આવ્યો છે, જ્યારે મૃતદેહને પોસ્ટમોર્ટમ માટે મોકલવામાં આવ્યો છે.
ઈજાગ્રસ્ત વ્યક્તિને નજીકની સયાજી હોસ્પિટલમાં દાખલ કરવામાં આવ્યો છે, જ્યાં ડૉક્ટરો તેની હાલત પર નજર રાખી રહ્યા છે. હોસ્પિટલ તંત્રએ જણાવ્યું છે કે દર્દીની સ્થિતિ ગંભીર છે પરંતુ સ્થિર રાખવા માટે જરૂરી તમામ સારવાર આપવામાં આવી રહી છે.
મુસાફરોમાં નાસભાગ, બસ સેવા ખોરવાઈ
ઘટના સમયે બસ સ્ટેશનમાં મોટી સંખ્યામાં મુસાફરો હાજર હતા. અંદાજ મુજબ અહીં દૈનિક હજારો મુસાફરો આવન-જાવન કરે છે અને અનેક બસોનું નિયમિત સંચાલન થાય છે. અચાનક થયેલા સ્ટ્રક્ચર ફોલ્ડને કારણે મુસાફરોમાં ભયનો માહોલ સર્જાયો અને લોકો પોતાની સલામતી માટે દોડતા જોવા મળ્યા હતા.
પ્રશાસને તાત્કાલિક અસરથી બસોનું રૂટ ડાયવર્ટ કરી દીધું છે. તમામ બસોને સ્ટેશનની અંદર પ્રવેશ ન આપતાં બહારથી જ વૈકલ્પિક રૂટ પર મોકલવામાં આવી રહી છે, જેના કારણે શહેરની પરિવહન વ્યવસ્થામાં ભારે વિક્ષેપ પડ્યો છે.
આ બસ સ્ટેશનનું ઉદ્ઘાટન વર્ષ 2014ના ફેબ્રુઆરીમાં તત્કાલીન મુખ્યમંત્રી અને વર્તમાન પ્રધાનમંત્રી નરેન્દ્ર મોદીના હસ્તે કરવામાં આવ્યું હતું. ચૂંટણી સમયગાળાની નજીક બનેલી આ દુર્ઘટનાએ હવે રાજકીય વર્તુળોમાં પણ ચર્ચાનો વિષય ઉભો કર્યો છે.
સ્થાનિક સ્તરે લોકોમાં આક્ષેપો અને પ્રશ્નો ઉઠી રહ્યા છે કે માત્ર થોડા વર્ષોમાં જ આટલી મોટી અને આધુનિક ઇન્ફ્રાસ્ટ્રક્ચર ધરાવતી ઇમારતનો ભાગ કેવી રીતે ધરાશાયી થયો. કેટલાક લોકો ગુણવત્તા અને મેન્ટેનન્સને લઈને પણ સવાલો ઉઠાવી રહ્યા છે.
તપાસના આદેશની શક્યતા
પ્રારંભિક માહિતી મુજબ પ્રશાસન દ્વારા ટેકનિકલ તપાસની શક્યતા વ્યક્ત કરવામાં આવી છે. ઇજનેરી વિભાગના અધિકારીઓ પણ સ્થળ પર પહોંચી ગયા છે અને સ્ટ્રક્ચર ફેલ્યરનું મૂળ કારણ શોધવાની પ્રક્રિયા શરૂ કરી છે.
હાલ સમગ્ર વિસ્તાર સુરક્ષાના દૃષ્ટિકોણથી સીલ કરવામાં આવ્યો છે અને કાટમાળ હટાવવાની કામગીરી ચાલી રહી છે. અધિકારીઓએ જણાવ્યું છે કે તમામ પાસાઓની વિગતવાર તપાસ બાદ જ સાચું કારણ સામે આવશે.
