આ દિગ્ગજ કંપની આપશે ₹38 ડિવિડેન્ડ, રેકોર્ડ સ્તરે પહોંચ્યો ઓર્ડર બુક અને આવકમાં જોરદાર ઉછાળો

company will pay ₹38 dividend:   ભારતની અગ્રણી એન્જિનિયરિંગ અને કન્સ્ટ્રક્શન કંપની Larsen & Toubroએ 5 મેના રોજ પોતાના ચોથા ત્રિમાસિક પરિણામો જાહેર કર્યા છે. કંપનીએ શેરહોલ્ડરો માટે પ્રતિ શેર ₹38ના અંતિમ ડિવિડેન્ડની ભલામણ કરી છે, જ્યારે રેકોર્ડ તારીખ 22 મે નક્કી કરવામાં આવી છે.

 નફો ઘટ્યો, આવકમાં વધારો

કંપનીનો સંયુક્ત નફો વાર્ષિક ધોરણે 3% ઘટીને ₹5,326 કરોડ રહ્યો છે, જે ગયા વર્ષે આ જ ત્રિમાસિકમાં ₹5,497 કરોડ હતો. બીજી તરફ, કુલ આવકમાં 11%નો વધારો નોંધાયો છે અને તે ₹82,762 કરોડ સુધી પહોંચી છે.

આ સમયગાળામાં આંતરરાષ્ટ્રીય આવક ₹43,747 કરોડ રહી, જે કુલ આવકનો 53% હિસ્સો બને છે. કંપનીનું કામગીરી સ્તર મજબૂત રહ્યું છે અને EBITDA 5% વધીને ₹8,610 કરોડ થયું છે.

ઓર્ડર બુકે બનાવ્યો નવો રેકોર્ડ

માર્ચ ત્રિમાસિક દરમિયાન કંપનીને ₹89,772 કરોડના નવા ઓર્ડર મળ્યા છે. ખાસ વાત એ છે કે તેમાં ₹59,994 કરોડના આંતરરાષ્ટ્રીય ઓર્ડરનો સમાવેશ થાય છે, જે કુલ ઓર્ડરનો 67% છે.

માર્ચ 2026 સુધી કંપનીનો કુલ ઓર્ડર બુક ₹7,40,327 કરોડ સુધી પહોંચી ગયો છે, જે ગયા વર્ષની સરખામણીએ 28% વધારે છે. તેમાં 52% હિસ્સો વિદેશી પ્રોજેક્ટ્સનો છે.

 ઈન્ફ્રાસ્ટ્રક્ચર સેગમેન્ટે આપી ગતિ

કંપનીના ઈન્ફ્રાસ્ટ્રક્ચર વિભાગે ₹43,477 કરોડના ઓર્ડર મેળવ્યા, જે ગયા વર્ષની તુલનામાં 26% વધારે છે. ખાસ કરીને રિન્યુએબલ એનર્જી, ટ્રાન્સમિશન અને સિવિલ ઈન્ફ્રાસ્ટ્રક્ચર ક્ષેત્રે નોંધપાત્ર યોગદાન આપ્યું છે.

વિવિધ સેક્ટરનું પર્ફોર્મન્સ

• આઈટી અને ટેક્નોલોજી સેવાઓ વિભાગની આવક 13% વધી ₹14,078 કરોડ થઈ
• ફાઈનાન્સિયલ સેવાઓ વિભાગે 22% વૃદ્ધિ સાથે ₹4,669 કરોડ સુધી પહોંચ્યો
• હાઈ-ટેક મેન્યુફેક્ચરિંગ વિભાગે સૌથી વધુ 45% વૃદ્ધિ નોંધાવી અને ₹4,861 કરોડની આવક મેળવી

 નોન-કોર બિઝનેસમાંથી બહાર નીકળવાની યોજના

કંપનીના ચેરમેન S N Subrahmanyanએ જણાવ્યું કે કંપની હવે પોતાના મુખ્ય વ્યવસાય પર વધુ ધ્યાન કેન્દ્રિત કરવા માંગે છે. આ માટે 30 જૂન સુધી નાભા પાવર લિમિટેડ અને એલ એન્ડ ટી મેટ્રો રેલ (હૈદરાબાદ)માં પોતાની હિસ્સેદારી વેચવાનો પ્લાન છે.

 ભવિષ્ય માટે નવી યોજના

કંપનીએ આગામી 5 વર્ષ માટે ‘Lakshya 31’ યોજના બનાવી છે. આ યોજના હેઠળ આર્ટિફિશિયલ ઇન્ટેલિજન્સ, ડિજિટલ ઈન્ફ્રાસ્ટ્રક્ચર, ડેટા સેન્ટર, ગ્રીન એનર્જી, ઇન્ડસ્ટ્રીયલ ઇલેક્ટ્રોનિક્સ અને સેમિકન્ડક્ટર જેવા ક્ષેત્રોમાં વધુ ફોકસ કરવામાં આવશે.

આ પણ વાંચો : અમદાવાદ: વટવામાં કૂવાની સાઈઝનો ભૂવો પડ્યો, બાઈક સાથે યુવક અંદર પડ્યો