ગુજરાત ATSએ ઝડપેલા આતંકીઓના રિમાન્ડ પુરા થતા કરાયા જેલ હવાલે
ગાંધીનગર, 17 નવેમ્બર 2025: ગુજરાત એન્ટી ટેરરિઝમ સ્ક્વૉડ (ATS)એ નવેમ્બરની શરૂઆતમાં ઝડપી પાડેલા ત્રણ આતંકવાદીઓને આજે ગાંધીનગર કોર્ટે જ્યુડિશિયલ કસ્ટડીમાં મોકલી દીધા છે. આરોપીઓના પોલીસ રિમાન્ડની મુદત પૂરી થતાં ATSએ વધુ રિમાન્ડની માંગણી ન કરી, જેના પગલે કોર્ટે તેમને જેલ હવાલે કરવાનો આદેશ આપ્યો.
ધરપકડ કરાયેલા આરોપીઓમાં મુખ્ય આરોપી ડૉ. અહેમદ મોહિયુદ્દીન સૈયદ (35, હૈદરાબાદ)નો સમાવેશ થાય છે, જેને 7 નવેમ્બરે ગાંધીનગરના અડાલજ ટોલનાકા પાસેથી પકડવામાં આવ્યો હતો. બીજા બે આરોપીઓ આઝાદ સુલેમાન શેખ અને મોહમ્મદ સુહેલ રણજીત મોહમ્મદ (બંને ઉત્તર પ્રદેશના)ને 8 નવેમ્બરે બનાસકાંઠાના દાંતા તાલુકામાંથી ઝડપી પાડવામાં આવ્યા હતા.
તપાસમાં ખુલ્યું છે કે આ ત્રણેય આરોપીઓ આંતરરાષ્ટ્રીય આતંકવાદી સંગઠન ISIS તથા તેની શાખા ISKP (ઇસ્લામિક સ્ટેટ ખોરાસાન પ્રોવિન્સ) સાથે સીધા જોડાયેલા છે. તેઓ ગુજરાત, મહારાષ્ટ્ર, દિલ્હી અને ઉત્તર પ્રદેશમાં મોટા આતંકી હુમલાઓનું ષડયંત્ર રચી રહ્યા હતા. આરોપીઓ પાસેથી રિસિન (એક ઘાતક રાસાયણિક ઝેર), હથિયારો બનાવવાની સામગ્રી, ISISના ઝંડા, પ્રતિબંધિત સાહિત્ય તથા ઇલેક્ટ્રોનિક ઉપકરણો મળી આવ્યા હતા.
ATSના જણાવ્યા મુજબ, મુખ્ય આરોપી અહેમદ મોહિયુદ્દીન પાકિસ્તાન અને અફઘાનિસ્તાનમાંથી ISIS હેન્ડલર્સના સીધા સંપર્કમાં હતો અને તેની પાસેથી ભારે માત્રામાં નાણાં પણ મળ્યા છે. આ કેસમાં હજુ વધુ ધરપકડો થઈ શકે છે. ગુજરાત પોલીસની આ કાર્યવાહીએ રાજ્યમાં મોટો આતંકી હુમલો નિષ્ફળ બનાવ્યો છે.
આ પણ વાંચો: મહિલા આતંકવાદી શાહીનના 7 બેંક ખાતાઓમાં કેટલા પૈસા? સાત વર્ષમાં કુલ 15500000ના વ્યવહારો!
