શોર્ટ સેલિંગ અને SLB ફ્રેમવર્કની સમીક્ષા કરવા માટે SEBI કાર્યકારી જૂથ બનાવશે
નવી દિલ્હી, 8 નવેમ્બર, 2025: સિક્યોરિટીઝ એન્ડ એક્સચેંજ બોર્ડ ઓફ ઇન્ડિયા (SEBI)ચેરમેન તુહન કાંત પાંડેએ શુક્રવારે ઘોષણા કરી હતી કે માર્કેટ રેગ્યુલેટર જલ્દી શોર્ટ સેલિંગ અને સિક્યોરિટીઝ લેન્ડિંગ એન્ડ બોરોઇંગ- SLB)ફ્રેમવર્કની વ્યાપક સમીક્ષા માટે એક કાર્યકારી જૂથની રચના કરશે.
‘શોર્ટ સેલિંગ’ શું છે?
‘શોર્ટ સેલિંગ’ એ શેરબજારમાં એક ટ્રેડિંગ સ્ટ્રેટેજી છે જેમાં રોકાણકારો સંભવિત શેરના ભાવ ઘટાડામાંથી નફો મેળવવાનો પ્રયાસ કરે છે. જો રોકાણકારો માને છે કે કંપનીનો શેર ઘટશે, તો તેઓ શેર ઉધાર લે છે અને વેચે છે, પછી તેને ઓછા ભાવે પાછા ખરીદે છે. નેશનલ સ્ટોક એક્સચેન્જ (NSE)એ 2007માં ‘શોર્ટ સેલિંગ’ ફ્રેમવર્ક રજૂ કર્યું હતું, જે આજ સુધી મોટાભાગે યથાવત છે.
SLB સિસ્ટમ શું છે?
SLB સિસ્ટમ હેઠળ, રોકાણકારો અથવા સંસ્થાઓ તેમના ડીમેટ ખાતામાં રાખેલા શેર અન્ય રોકાણકારોને ફી માટે ઉછીના આપી શકે છે. આ વ્યવહાર સ્ટોક એક્સચેન્જ પ્લેટફોર્મ દ્વારા કરવામાં આવે છે. ક્લિયરિંગ કોર્પોરેશન આ પ્રક્રિયામાં સુરક્ષા અને સમાધાનની ગેરંટી પૂરી પાડે છે.
ઉધાર લીધેલા શેરનો ઉપયોગ ઘણીવાર શોર્ટ સેલિંગ અથવા સેટલમેન્ટ નિષ્ફળતાઓ સામે રક્ષણ માટે થાય છે. નિષ્ણાતોના મતે, SLB રોકાણકારોને તેમના નિષ્ક્રિય શેરમાંથી વધારાની આવક મેળવવાની મંજૂરી આપે છે અને બજારની તરલતા અને કાર્યક્ષમતા વધારવામાં પણ મદદ કરે છે.
સમીક્ષા શા માટે જરૂરી છે?
શોર્ટ સેલિંગ ફ્રેમવર્ક 2007થી અપડેટ કરવામાં આવ્યું નથી. 2008માં રજૂ કરાયેલ SLB સિસ્ટમ, ઘણી વખત સુધારવામાં આવી હોવા છતાં, વૈશ્વિક ધોરણોનું સંપૂર્ણ પાલન કરતી નથી. તેથી, SEBI હવે બંને સિસ્ટમોનું સંપૂર્ણ પુનઃમૂલ્યાંકન કરવાનો ઇરાદો ધરાવે છે.
તુહિન કાંત પાંડેએ જણાવ્યું હતું કે સ્ટોકબ્રોકર અને મ્યુચ્યુઅલ ફંડ નિયમોની વ્યાપક સમીક્ષા પહેલાથી જ ચાલી રહી છે. SEBI રોકાણકારોના હિતોનું રક્ષણ કરવા અને બજાર પારદર્શિતા વધારવા પર ધ્યાન કેન્દ્રિત કરે છે. વિદેશી પોર્ટફોલિયો રોકાણકાર (FPI) દ્વારાની વેચવાલીના પ્રશ્નના જવાબમાં, SEBI ચેરમેને જણાવ્યું હતું કે, “FPIsને ભારતની વિકાસ વાર્તામાં મજબૂત વિશ્વાસ છે. વૈશ્વિક રોકાણકારો ભારતના અર્થતંત્ર અને તેના લાંબા ગાળાના વિકાસમાં વિશ્વાસ રાખે છે.”
આ પણ વાંચોઃ હવે દરેક પેમેન્ટ પર મળશે સોનું! Paytmએ શરુ કર્યુ દમદાર ફીચર, જાણો રિડીમ કરવાની તરકીબ
