‘લૂંટેરી દુલ્હન’ની છેતરપિંડી: 40 વર્ષીય યુવક પાસેથી દોઢ લાખ રૂપિયા પડાવી ફરાર
પાટણ, 25 ડિસેમ્બર 2025: ગુજરાતમાં લગ્નના નામે છેતરપિંડીના કેસોમાં વધારો થઈ રહ્યો છે. તાજેતરમાં શંખેશ્વરના એક 40 વર્ષીય યુવક સાથે ‘લૂંટેરી દુલ્હન’ અને તેના સાથીદારોએ લગ્નના બહાને રૂ. 1.50 લાખની ઠગાઈ આચરી છે. આ મામલે શંખેશ્વર પોલીસ સ્ટેશનમાં પાંચ આરોપીઓ વિરુદ્ધ ફરિયાદ નોંધાઈ છે અને પોલીસે તપાસ શરૂ કરી દીધી છે.
પોલીસ ફરિયાદ અનુસાર, પીડિત યુવકની ઉંમર વધી હોવાથી તેના માતાના સગાઓએ ધોળકા તાલુકાની રેખા નામની યુવતીને છોકરી તરીકે બતાવી હતી. યુવકે પોતાના બનેવી અને સગા કલાભાઈ સાથે મળીને ધોળકા ખાતે રેખાને જોઈ અને પસંદ કરી. છોકરી પસંદ પડતાં 12 જુલાઈ 2025ના રોજ રેખાના પાંચ સ્વજનો યુવકના શંખેશ્વર સ્થિત ઘરે આવ્યા હતા. તેમણે યુવકનું ઘર અને પરિવાર પસંદ કરી લગ્ન માટે સંમતિ આપી.
લગ્નની તૈયારીઓ દરમિયાન કલાભાઈએ યુવકને સલાહ આપી કે રેખાના પિતાને લગ્ન ખર્ચ માટે રૂ. 1.50 લાખ રોકડા આપવા. કલાભાઈએ પૈસાની જવાબદારી લેતાં તે જ દિવસે રૂ. 50,000 રોકડા આપવામાં આવ્યા, જ્યારે બાકીના રૂ. 1 લાખ ફુલહાર સમારોહમાં આપવાનું નક્કી થયું. 14 જુલાઈ 2025ના રોજ ધોળકા ખાતે આશાબેનના ઘરે ફુલહાર સમારોહ યોજાયો, જ્યાં યુવકે બાકીના રૂ. 1 લાખ આશાબેનને સોંપ્યા.
ફુલહાર બાદ રેખા યુવક સાથે શંખેશ્વર આવી અને કેટલાક દિવસ રહી. પરંતુ એક મહિના પછી તે પિયર જતી રહી અને પાછી ફરવાનું ટાળવા લાગી. યુવકે તેને પાછા બોલાવવાના પ્રયાસ કર્યા ત્યારે તેણે પરિવારજનોની બીમારી અને કાનના દુખાવાના બહાના કાઢ્યા. થોડા સમય પછી રેખાનો ફોન બંધ થઈ ગયો. યુવકે લગ્ન કરાવનાર કલાભાઈને સંપર્ક કર્યો, પરંતુ તેમણે પણ ટાળટુળ કરી. જ્યારે યુવકે આપેલા પૈસા પરત માંગ્યા ત્યારે કલાભાઈએ સ્પષ્ટ કહ્યું કે “પૈસા પાછા નહીં મળે, તમારાથી થાય તે કરી લો.”
આ પછી યુવકે તપાસ કરતાં જાણવા મળ્યું કે રેખા અને તેના સાથીદારોએ આખી ઘટના આયોજિત છેતરપિંડી હતી. તેણે તરત જ શંખેશ્વર પોલીસ મથકમાં ફરિયાદ નોંધાવી. પોલીસે આરોપીઓ કલા ગગાભાઈ સિંધવ (રહે. ધનોરા, તા. શંખેશ્વર), ધારશી ઠાકોર (રહે. રતનપુરા, તા. શંખેશ્વર), હરેશ ભરવાડ (રહે. ધોળકા), આશાબેન (રહે. ધોળકા) અને રેખાબેન ઠાકોર (રહે. આંબેઠી, તા. ધોળકા, જિ. અમદાવાદ) વિરુદ્ધ ગુનો નોંધી વધુ તપાસ હાથ ધરી છે.
આ પ્રકારની ‘લૂંટેરી દુલ્હન’ની ઘટનાઓ ગુજરાતમાં વધી રહી છે, જેમાં યુવકોને લગ્નની લાલચ આપી પૈસા અને દાગીના પડાવી ફરાર થઈ જવાય છે. નિષ્ણાતોના મતે લગ્ન પહેલાં છોકરી અને તેના પરિવારની પૂર્ણ તપાસ કરવી જરૂરી છે. પોલીસ પણ આવા કેસોમાં તાત્કાલિક કાર્યવાહી કરી રહી છે.
આ પણ વાંચો: હત્યા પહેલાં હમાસના ચીફ ઇસ્માઇલ હાનિયા સાથે નીતિન ગડકરીની મુલાકાત, પોતે જ કર્યો ખુલાસો
