રાહુલ ગાંધીની મોટી જાહેરાત, મહિલાઓને 50% અનામત અપાશે!

• કોંગ્રેસના સાંસદ રાહુલ ગાંધીએ મોટી જાહેરાત કરી
• સરકારી નોકરીઓમાં મહિલાઓને 50 ટકા અનામત આપવામાં આવશે
• મહાલક્ષ્મી યોજના હેઠળ દર મહિને 8,500 રૂપિયા મળશે.

નવી દિલ્હી,23 મે: ગુરુવારે દિલ્હીમાં આયોજિત ‘મહિલા ન્યાય સંવાદ’માં કોંગ્રેસના સાંસદ રાહુલ ગાંધીએ મોટી જાહેરાત કરી અને કહ્યું કે તેઓ રાજ્યસભા, લોકસભા અને વિધાનસભાઓમાં મહિલાઓને સ્થાન આપશે. તેમણે કહ્યું કે તે ઈચ્છે છે કે અહીં 50 ટકા ઉમેદવાર મહિલાઓ હોય. સરકારી નોકરીઓમાં મહિલાઓને 50 ટકા અનામત આપવામાં આવશે. જ્યાં સુધી મહિલાઓ ભાગ નહીં લે ત્યાં સુધી આ દેશ પ્રગતિ કરી શકશે નહીં.

ઉત્તર-પશ્ચિમ દિલ્હીથી કોંગ્રેસના ઉમેદવાર ઉદિત રાજને વોટ કરવાની અપીલ કરતા રાહુલ ગાંધીએ કહ્યું કે સ્ત્રી અને પુરૂષ બંને કામ પર જાય છે, પરંતુ જ્યારે મહિલા ઘરે પરત ફરે છે ત્યારે તેની બીજી શિફ્ટ શરૂ થાય છે. તે બાળકોને ઉછેરે છે અને જ્યારે તેઓ બીમાર હોય ત્યારે તેમની સંભાળ રાખે છે. તેઓ ઘરે ભોજન રાંધે છે, દરેકનું ધ્યાન રાખે છે અને મહિલાઓને આ માટે ક્યારેય કંઈ આપવામાં આવતું નથી. એક રીતે, તે આ બધું મફતમાં કરે છે.

મહાલક્ષ્મી યોજના હેઠળ દર મહિને 8,500 રૂપિયા મળશે

તેમણે વધુમાં કહ્યું કે એ વાત સાચી છે કે જો ભારતીય પુરુષો 8 કલાક કામ કરે છે તો મહિલાઓ 16 કલાક કામ કરે છે. પૈસા ખર્ચવાની રીત પુરુષો અને સ્ત્રીઓ વચ્ચે અલગ-અલગ હોય છે. મહિલાઓ પૈસા બચાવે છે, બાળકો વિશે વિચારે છે, આગળનું આયોજન કરે છે. સ્ત્રીઓની આર્થિક વિચારસરણી પુરુષો કરતાં વધુ સારી હોય છે. સરકાર આ 8 કલાક માટે મહિલાઓને પૈસા આપશે. અમે નથી ઈચ્છતા કે તમે મફતમાં કામ કરો, તેથી જ અમે ‘મહાલક્ષ્મી યોજના’ લાવ્યા છીએ. મહાલક્ષ્મી યોજના હેઠળ મહિને 8,500 રૂપિયા એટલે કે વર્ષે એક લાખ રૂપિયા મહિલાઓના બેંક ખાતામાં જશે.

ભાજપ સરકાર અને આરએસએસ પર નિશાન સાધ્યું

રાહુલ ગાંધીએ કહ્યું કે ગરીબી રેખા નીચે જીવતી મહિલાઓને આ લાભ મળશે. આ પાછળની વિચારસરણી એ છે કે મહિલાઓ પરિવારને આર્થિક રીતે મજબૂત બનાવી શકે છે. બીજી વાત એ છે કે તમે મફતમાં કામ કરો છો, અમારી વિચારસરણી એવી છે કે તમારે મફતમાં કામ ન કરવું જોઈએ. ત્રીજી વાત એ છે કે જો મહિલાઓને પૈસા આપવામાં આવે તો તેઓ આગળનું વિચારે . આપણે જાણીએ છીએ કે મહિલાઓનો અવાજ દબાવવામાં આવે છે. ઘરમાં હેરાન કરવામાં આવે છે, સમાજમાં દબાવવામાં આવે છે, રસ્તા પર ધમકાવવામાં આવે છે. રાહુલ ગાંધીએ જોરદાર પ્રહાર કરતા કહ્યું કે, ભાજપે સંસદમાં મહિલા અનામત બિલ ખૂબ જ ધામધૂમથી પસાર કર્યું. જેનો ભાજપ 10 વર્ષ પછી અમલ કરશે. એક સર્વે થશે અને પછી જ આ બિલનો અમલ કરવામાં આવશે. રાહુલ ગાંધીએ કહ્યું કે ભાજપ વાળા સર્વે પણ નહીં કરે. 20, 25, 50 વર્ષમાં પણ સર્વે થવાનો નથી. તેમની સૌથી મોટી સંસ્થા RSS છે અને તેઓ RSSમાં મહિલાઓને સ્વીકારતા નથી. અમે આવું નહીં કરીએ, અમે તરત જ મહિલા અનામત આપીશું.

આ પણ વાંચો:  કોલકાતામાં શા માટે બાંગ્લાદેશી સાંસદની હત્યા કરવામાં આવી, કારણ બહાર આવ્યું