દિલ્હી વિસ્ફોટો અંગે પ્રધાનમંત્રી નરેન્દ્ર મોદીએ અમિત શાહ સાથે વાત કરી અને પરિસ્થિતિનો તાગ મેળવ્યો

દિલ્હી 10 નવેમ્બર 2025: દિલ્હી વિસ્ફોટો બાદ, વડા પ્રધાન નરેન્દ્ર મોદીએ કેન્દ્રીય ગૃહમંત્રી અમિત શાહ સાથે ફોન પર વાત કરી. દિલ્હીમાં વિસ્ફોટો પછી પીએમ મોદીએ પરિસ્થિતિનો તાગ મેળવ્યો. સોમવારે સાંજે 6:52 વાગ્યે દિલ્હીના લાલ કિલ્લા મેટ્રો સ્ટેશન પાસે એક ચાલતી કારમાં વિસ્ફોટ થયો. ત્યારબાદ ઘણી કારમાં આગ લાગી ગઈ અને તેને ભારે નુકસાન થયું.

ચાલતી કારમાં વિસ્ફોટ થયો

દિલ્હી વિસ્ફોટો અંગે પોલીસ કમિશનર સતીશ ગોલચાએ પણ એક નિવેદન બહાર પાડ્યું છે. મીડિયા સાથે વાત કરતા, દિલ્હી પોલીસ કમિશનર ગોલચાએ જણાવ્યું હતું કે, “આજે સાંજે લગભગ 6:52 વાગ્યે, એક ધીમી ગતિએ ચાલતી કાર લાલ લાઇટ પર અટકી ગઈ. વાહનમાં વિસ્ફોટ થયો, જેનાથી નજીકના વાહનોને નુકસાન થયું. FSL અને NIA ટીમો સહિત તમામ તપાસ એજન્સીઓ ઘટનાસ્થળે પહોંચી ગઈ છે. આ ઘટનામાં કેટલાક લોકોના મોત થયા છે અને અન્ય ઘાયલ થયા છે. પરિસ્થિતિ પર નજર રાખવામાં આવી રહી છે.”

અમિત શાહ ક્ષણે ક્ષણે પરિસ્થિતિનો તાગ મેળવી રહ્યા છે

ગોલ્ચાએ ઉમેર્યું કે ગૃહમંત્રી અમિત શાહે પણ અમને ફોન કર્યો છે. સમયાંતરે તેમની સાથે માહિતી શેર કરવામાં આવી રહી છે. ઘટના પછી તરત જ, કેન્દ્રીય ગૃહમંત્રી અમિત શાહે દિલ્હી પોલીસ કમિશનર સાથે વાત કરી.

વિસ્ફોટોથી ઘરની બારીઓ ધ્રુજી ગઈ

પ્રત્યક્ષદર્શીઓએ જણાવ્યું કે વિસ્તારમાં ગભરાટ અને અવિશ્વાસનું વાતાવરણ હતું. સ્થાનિક રહેવાસી રાજધર પાંડેએ જણાવ્યું કે તેમણે તેમના ઘરમાંથી આગની જ્વાળાઓ જોઈ. પછી તેઓ શું થયું તે જોવા માટે નીચે આવ્યા. તેમણે તેમના ઘરમાંથી જોરદાર વિસ્ફોટ સાંભળ્યો. વિસ્ફોટ એટલો શક્તિશાળી હતો કે તેનાથી તેમના ઘરની બારીઓ ધ્રુજી ગઈ હતી.

આ પણ વાંચો: લાલ કિલ્લા પાસે કારમાં વિસ્ફોટ 8 લોકોના મોત અનેક ઘાયલ દિલ્હી બાદ ગુજરાત પણ એલર્ટ પર!