તુર્કી પછી હવે ચીનનો વારો, ભારત ડ્રેગનને પાઠ ભણાવશે

નવી દિલ્હી, 15 મે, 2025: તુર્કી બાદ હવે ભારત પાકિસ્તાનના એક બીજા દોસ્ત એવા ચીનને પાઠ ભણાવવાની તૈયારીમાં છે. રિપોર્ટના અનુસાર ઓપરેશન સિંદૂર બાદ ભારત સાથેના તણાવમાં પાકિસ્તાને મોટે ભાગે તુર્કી અને ચીનના હથિયારોનો ઉપયોગ કર્યો હતો, ત્યારે પાઠ ભણાવવાનો વારો ભારતનો છે.

ચીન સમર્થિત રોકાણ સોદાઓની કડક સમીક્ષા કરવામાં આવશે

ભારતમાં ચીન સાથે ચાલી રહેલા રોકાણ સોદામાં વિલંબના સમાચાર છે. મીડિયા રિપોર્ટ્સ અનુસાર, વડા પ્રધાન મોદીની સરકાર દેશમાં ઓછામાં ઓછા 6-7 ચીન સમર્થિત રોકાણ સોદાઓની સમીક્ષા કરવા જઈ રહી છે, જેના કારણે તેમની મંજૂરીમાં વિલંબ થઈ શકે છે.

એક અહેવાલ મુજબ, સરકાર ચીનની કંપનીઓ દ્વારા વિદેશી રોકાણ દરખાસ્તો અને સંયુક્ત સાહસોની ચકાસણી વધુ તીવ્ર બનાવી શકે છે. રોકાણ સંબંધિત તમામ દરખાસ્તો કે જેની ચર્ચા થવાની હતી, હવે મંજૂરી મળવામાં વિલંબ થઈ શકે છે કારણ કે તેમની ફરીથી સમીક્ષા થઈ રહી છે. માહિતી અનુસાર, વર્તમાન અને ભવિષ્યમાં, ચીન સમર્થિત સંયુક્ત સાહસોને કડક પાલન આવશ્યકતાઓમાંથી પસાર થવું પડી શકે છે.

2020માં ચીનમાંથી FDI પર પ્રતિબંધ મૂકવામાં આવ્યો હતો

ભારતે અગાઉ એપ્રિલ 2020માં ચીનથી સીધા વિદેશી રોકાણ પર પ્રતિબંધ મૂક્યો હતો, અને કહ્યું હતું કે આવા તમામ પ્રસ્તાવોની તપાસ આ માળખાના આધારે સરકાર દ્વારા કરવામાં આવે અને તેને મંજૂરી આપવામાં આવે.

આ સમય દરમિયાન, કોરોના રોગચાળો ફાટી નીકળ્યા પછી, સ્થાનિક કંપનીઓના તકવાદી ટેકઓવરને રોકવા માટે, ભારતે તેની સાથે લેન્ડ શેર કરતા દેશો પાસેથી વિદેશી રોકાણ માટે સરકારી મંજૂરી મેળવવી ફરજિયાત બનાવી દીધી હતી. તે સમયે, ભારતના આ પગલાથી ચીન ગુસ્સે ભરાયું હતું.

ચીને પાકિસ્તાનને ટેકો આપ્યો

હવે સરકારે આ નવું પગલું એવા સમયે ભર્યું છે જ્યારે ચીને માત્ર એવું જ કહ્યું નથી કે તે પાકિસ્તાનને સાચા મિત્ર તરીકે પડખે રહેશે, પરંતુ એવા પણ સમાચાર સામે આવ્યા છે કે પાકિસ્તાન દ્વારા ભારત વિરુદ્ધ ઉપયોગમાં લેવાતી મિસાઇલો અને હવાઈ સંરક્ષણ પ્રણાલીઓ પણ ચીન દ્વારા પૂરી પાડવામાં આવી હતી.

આ પણ વાંચોઃ ટાટાની ઇલેક્ટ્રિક કાર પર બંપર ડિસ્કાઉન્ટ, 1.85 લાખની મળી રહી છે છૂટ