આજથી બદલાઈ રહ્યા છે આ 10 મોટા નિયમો, LPGથી લઈને SBI ATM સુધી, જાણો તમારા ખિસ્સા પર શું થશે અસર

Rule Changes Effective From October: ઓક્ટોબર મહિનાની શરૂઆત સાથે જ દેશના સામાન્ય લોકો અને ગ્રાહકોને અસર કરતા અનેક નાણાકીય અને બેંકિંગ નિયમોમાં ફેરફાર થઈ રહ્યા છે. LPG, FD, UPI, NPS, SBI ATM સહિત અનેક સેવાઓના નિયમોમાં બદલાવ જોવા મળશે. આ ઉપરાંત બેંક રજાઓ અને લાઈફ સર્ટિફિકેટ સાથે જોડાયેલા મહત્વના કામ પણ ઓક્ટોબરમાં કરવા પડશે.

ચાલો જાણીએ ઓક્ટોબર 2026થી કયા 10 મોટા ફેરફારો લાગુ થઈ રહ્યા છે.

1. FDના નિયમોમાં ફેરફાર

RBI દ્વારા કોમર્શિયલ બેંકોના બલ્ક ફિક્સ્ડ ડિપોઝિટના વ્યાજદર જાહેર કરવાની પદ્ધતિમાં ફેરફાર કરવામાં આવી રહ્યો છે. નવા નિયમો 1 ઓક્ટોબર 2026થી લાગુ થશે.

બેંકોએ બલ્ક ડિપોઝિટના દર અગાઉથી જાહેર કરવા પડશે. સાથે જ દરરોજ સવારે 10 વાગ્યે લાગુ થતા બલ્ક ડિપોઝિટના દરોની માહિતી પણ આપવી પડશે.

2. UPI ટ્રાન્ઝેક્શન પર MDR

15 ઓક્ટોબર 2026થી પસંદગીના મર્ચન્ટ UPI ટ્રાન્ઝેક્શન પર મર્ચન્ટ ડિસ્કાઉન્ટ રેટ (MDR) લાગુ થવાનો ઉલ્લેખ છે. ₹2,000થી વધુના કેટલાક મર્ચન્ટ ટ્રાન્ઝેક્શન આ માળખા હેઠળ આવી શકે છે.

જોકે ₹2,000 સુધીના પેમેન્ટ અને ઝીરો-MDR હેઠળ આવતા નાના વેપારીઓના ટ્રાન્ઝેક્શન માટે અલગ નિયમો રહેશે.

3. NPSના ચાર્જમાં ફેરફાર

PFRDA દ્વારા NPS અને NPS લાઈટ હેઠળ Point of Presence (POP) મારફતે વસૂલવામાં આવતા ચાર્જમાં ફેરફાર કરવામાં આવ્યો છે.

નવા માળખા મુજબ POP દ્વારા રજીસ્ટ્રેશન કરાવનાર ગ્રાહક માટે દરેક PRAN દીઠ ₹200નો વન-ટાઇમ ઓનબોર્ડિંગ ચાર્જ નક્કી કરવામાં આવ્યો છે.

4. LPG બાયોમેટ્રિક ઓથેન્ટિકેશન

ઘરેલુ LPG ગ્રાહકો માટે બાયોમેટ્રિક આધાર ઓથેન્ટિકેશન મહત્વનું છે. જે ગ્રાહકોએ હજુ સુધી આ પ્રક્રિયા પૂર્ણ કરી નથી, તેમણે સમયસર ઓથેન્ટિકેશન કરાવવું જરૂરી છે.

ઓથેન્ટિકેશન પૂર્ણ થયા બાદ LPG બુકિંગ અને પાત્રતા મુજબ સબસિડીનો લાભ મેળવી શકાય છે.

5. LPG સિલિન્ડરના ભાવમાં ફેરફાર

દર મહિનાની 1 તારીખે ઓઈલ માર્કેટિંગ કંપનીઓ LPGના ભાવની સમીક્ષા કરે છે. તેથી 1 ઓક્ટોબરથી ઘરેલુ અને કોમર્શિયલ LPG સિલિન્ડરના ભાવમાં ફેરફાર થઈ શકે છે.

આંતરરાષ્ટ્રીય ક્રૂડ ઓઈલ અને ગેસના ભાવ સહિતના પરિબળોની અસર LPGના ભાવ પર પડી શકે છે.

6. SBI ATMના મફત ટ્રાન્ઝેક્શન

SBIના કેટલાક સેલેરી પેકેજ એકાઉન્ટ ધારકો માટે અન્ય બેંકોના ATM પર મળતા મફત ટ્રાન્ઝેક્શનની મર્યાદામાં ફેરફાર થશે.

નવા નિયમ મુજબ અન્ય બેંકોના ATM પર મફત ટ્રાન્ઝેક્શનની સંખ્યા મહિનામાં 10થી ઘટાડીને 5 કરવામાં આવશે.

BSBD ખાતા માટે મહિનામાં 4 રોકડ ઉપાડ મફત રહેશે. ત્યારબાદ દરેક ટ્રાન્ઝેક્શન પર ₹15 + GST ચાર્જ લાગશે.

7. NRI પાસેથી પ્રોપર્ટી ખરીદવા TDS પ્રક્રિયામાં ફેરફાર

NRI પાસેથી અચલ મિલકત ખરીદતી વખતે TDS સંબંધિત પ્રક્રિયામાં પણ ફેરફાર કરવામાં આવી રહ્યો છે.

1 ઓક્ટોબરથી ચોક્કસ પાત્રતા ધરાવતા રહેવાસી વ્યક્તિઓ અને HUFને NRI પાસેથી મિલકત ખરીદતી વખતે TDS માટે અલગથી Tax Deduction Account Number (TAN) મેળવવાની જરૂર નહીં રહે. તેઓ પોતાના PANનો ઉપયોગ કરીને સંબંધિત TDS પ્રક્રિયા પૂર્ણ કરી શકશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

8. પેન્શનરો માટે લાઈફ સર્ટિફિકેટ

પેન્શનરો માટે ઓક્ટોબરથી લાઈફ સર્ટિફિકેટ (જીવન પ્રમાણપત્ર) જમા કરાવવાનો સમય શરૂ થાય છે.

પેન્શન ચાલુ રાખવા માટે પાત્ર પેન્શનરોએ નક્કી કરેલી સમયમર્યાદામાં ઓનલાઈન અથવા ઓફલાઈન જીવન પ્રમાણપત્રની પ્રક્રિયા પૂર્ણ કરવી જરૂરી છે.

9. ઓક્ટોબરમાં બેંકોમાં અનેક રજાઓ

ઓક્ટોબરમાં ગાંધી જયંતિ, દશેરા અને અન્ય તહેવારો ઉપરાંત સાપ્તાહિક રજાઓના કારણે બેંક શાખાઓ ઘણા દિવસો બંધ રહેશે.

બેંકનું કોઈ મહત્વનું કામ હોય તો બહાર નીકળતા પહેલાં તમારા રાજ્ય માટે લાગુ પડતી RBIની બેંક હોલિડે યાદી તપાસવી યોગ્ય રહેશે. બેંક શાખા બંધ હોવા છતાં સામાન્ય રીતે ઓનલાઈન બેંકિંગ અને ATM જેવી સેવાઓ ઉપલબ્ધ રહી શકે છે.

10. TV, ફ્રિજ અને AC મોંઘા થઈ શકે

તહેવારોની સિઝનમાં TV, ફ્રિજ, AC સહિતના હોમ ઇલેક્ટ્રોનિક્સ ખરીદવાનું આયોજન કરી રહેલા ગ્રાહકો માટે પણ મહત્વના સમાચાર છે.

કાચા માલની કિંમતો અને ઉત્પાદન ખર્ચમાં વધારો થાય તો કંપનીઓ દ્વારા કેટલાક ઇલેક્ટ્રોનિક્સ ઉત્પાદનોની કિંમતોમાં વધારો થઈ શકે છે. જોકે દરેક પ્રોડક્ટની કિંમતમાં વધારો થશે જ એવું જરૂરી નથી.

તમારા ખિસ્સા પર ક્યાં પડશે સીધી અસર?

ઓક્ટોબરથી લાગુ થતા આ ફેરફારોમાં કેટલાક સીધા તમારા ખર્ચ સાથે જોડાયેલા છે, જ્યારે કેટલાક બેંકિંગ અને રોકાણની પ્રક્રિયાને અસર કરશે. ખાસ કરીને LPG, ATM ચાર્જ, NPS, FD અને UPI સાથે જોડાયેલા નિયમો ગ્રાહકો અને વેપારીઓ માટે મહત્વના બની શકે છે.

તેથી નવા નિયમો લાગુ થાય તે પહેલાં તમારા બેંક ખાતા, LPG કનેક્શન, NPS અને અન્ય નાણાકીય સેવાઓ સાથે જોડાયેલી વિગતો તપાસી લેવી ફાયદાકારક રહેશે.

આ પણ વાંચો: તહેવાર ટાણે મોંઘવારીનો મોટો ઝટકો: ગેસ સિલિન્ડરના ભાવમાં 62.50 રુપિયાનો વધારો, જાણઓ નવા ભાવ