Nashik Conversion Racket: મહારાષ્ટ્રના નાસિકમાં આવેલી એક મલ્ટીનેશનલ કંપનીમાં ચાલતા યૌન શોષણ અને ધાર્મિક દબાણના ગંભીર કેસનો મોટો ખુલાસો થયો છે. આ સમગ્ર મામલો ત્યારે સામે આવ્યો જ્યારે 7 મહિલા પોલીસકર્મીઓએ અંડરકવર એજન્ટ બની ત્રણ મહિના સુધી ગુપ્ત ઓપરેશન ચલાવી આરોપીઓને રંગેહાથ પકડી લીધા. એસઆઈટીની તપાસમાં છેલ્લા 4 વર્ષથી ચાલતા શોષણનો પર્દાફાશ થયો છે, જેમાં અત્યાર સુધી 9 એફઆઈઆર નોંધાઈ ચૂકી છે અને અનેક આરોપીઓની ધરપકડ કરવામાં આવી છે.
કેસ પોલીસ સુધી કેવી રીતે પહોંચ્યો?
આ મામલો ત્યારે બહાર આવ્યો જ્યારે કેટલીક મહિલા કર્મચારીઓએ હિંમત બતાવી અને પોતાના પર થતા શોષણ વિશે ફરિયાદ કરી. ફરિયાદોમાં આરોપ મૂકાયો હતો કે ઓફિસમાં તેમના પર અશ્લીલ ટિપ્પણીઓ કરવામાં આવતી, જબરદસ્તી નજીક આવવાની કોશિશ થતી, લગ્નના ખોટા વચનો આપવામાં આવતા અને સાથે ધાર્મિક દબાણ તથા અપમાન કરવામાં આવતું હતું. ફરિયાદોની સંખ્યા વધતા કેસ પોલીસ સુધી પહોંચ્યો.
SITની રચના અને તપાસ
કેસની ગંભીરતા ધ્યાનમાં રાખીને નાસિક પોલીસ કમિશનરે તાત્કાલિક કાર્યવાહી કરી અને એસીપી (ક્રાઇમ)ના નેતૃત્વ હેઠળ સ્પેશિયલ ઇન્વેસ્ટિગેશન ટીમ (SIT) રચી. તપાસમાં સૌથી મોટો પડકાર હતો પૂરતા પુરાવા એકત્ર કરવાના અને આરોપીઓને રંગેહાથ પકડવાના.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
7 મહિલા પોલીસકર્મીઓનું અંડરકવર મિશન
પોલીસે અનોખો નિર્ણય લઈને 7 મહિલા પોલીસકર્મીઓને અંડરકવર એજન્ટ તરીકે કંપનીમાં મોકલ્યા. કોઈ નવી કર્મચારી બની જોડાઈ, તો કોઈ ટ્રેનિંગના બહાને અંદર પહોંચી. કેટલાક મીટિંગમાં પણ સામેલ થયા. ધીમે ધીમે તેમણે ઓફિસના વાતાવરણને સમજવાનું શરૂ કર્યું.
સત્ય સામે આવવા લાગ્યું
જેમ જેમ દિવસો પસાર થયા તેમ અંડરકવર ટીમે ફરિયાદોમાં જણાવેલી હકીકતો પોતાની આંખે જોઈ. ઓફિસમાં મહિલાઓ સાથે અયોગ્ય વર્તન, મીટિંગ દરમિયાન અશ્લીલ ઈશારા અને વ્યક્તિગત જીવન વિશે ભદ્દા સવાલો પુછાતા હોવાની પુષ્ટિ થઈ.
રંગેહાથ કેવી રીતે પકડાયા આરોપીઓ?
એક મીટિંગ દરમિયાન જ્યારે આરોપીએ ફરી એક વખત અયોગ્ય હરકત કરી ત્યારે અંડરકવર ટીમે તરત જ એક્શન લઈને આરોપીને રંગેહાથ પકડી લીધો. આ ઘટના સમગ્ર ઓપરેશનનો ટર્નિંગ પોઇન્ટ સાબિત થઈ.
પુરાવા એકત્ર કરવાની મોટી કાર્યવાહી
આ પછી પોલીસે 40થી વધુ CCTV ફૂટેજ ચકાસ્યા, પીડિતાઓના નિવેદનો નોંધ્યા અને કંપનીના આંતરિક સિસ્ટમની પણ તપાસ કરી. તપાસમાં ખુલ્યું કે છેલ્લા 4 વર્ષથી આ પ્રકારનું શોષણ ચાલતું હતું.
FIR અને ધરપકડ
આ કેસમાં અત્યાર સુધી 9 એફઆઈઆર નોંધાઈ છે. જેમાં ટીમ લીડર અને HR અધિકારીઓનો પણ સમાવેશ થાય છે. આરોપોમાં યૌન શોષણ, લગ્નના ખોટા વચનો, જબરદસ્તી ધર્મપરિવર્તનની કોશિશ અને ધાર્મિક અપમાન જેવા ગંભીર ગુનાઓ સામેલ છે. પોલીસે અનેક આરોપીઓને ધરપકડ કરી છે અને કોર્ટ દ્વારા તેમને કસ્ટડીમાં મોકલવામાં આવ્યા છે.
કંપનીની ભૂમિકા પણ સવાલોમાં
આ કેસમાં સૌથી ચોંકાવનારી બાબત એ છે કે અનેક ફરિયાદો હોવા છતાં કંપનીના વરિષ્ઠ અધિકારીઓએ કોઈ પગલાં લીધા નહોતા. આરોપ છે કે તેમણે આ ઘટનાઓને અવગણેલી. હવે પોલીસે અન્ય પીડિત મહિલાઓને આગળ આવવા અપીલ કરી છે અને સંપર્ક માટે વોટ્સએપ નંબર પણ જાહેર કર્યો છે. આ કેસ હવે દેશભરમાં કાર્યસ્થળ પર મહિલાઓની સુરક્ષા અને કોર્પોરેટ જવાબદારી અંગે ગંભીર પ્રશ્નો ઊભા કરી રહ્યો છે.
