લગ્ન પ્રસંગમાં જમવાનુ બનાવતી વખતે રસોઈયો ઉકળતા તેલમાં પડ્યો, પાંચ દિવસની સારવાર બાદ મોત

લખનૌ: લગ્ન સમારંભમાં એક રસોઈયો એક દર્દનાક અકસ્માતનો ભોગ બન્યો છે. શહેરના ઠાકુરગંજ વિસ્તારમાં આ ઘટના બની હતી. એક રસોઈયો અહીં પકવાન બનાવી રહ્યો હતો ત્યારે અચાનક તે લપસી પડ્યો અને સંતુલન ગુમાવી બેઠો અને ગરમ તેલના તપેલામાં પડ્યો. ગંભીર રીતે દાઝી ગયેલા રસોઈયાને તાત્કાલિક હોસ્પિટલમાં લઈ જવામાં આવ્યો હતો પરંતુ લગભગ પાંચ દિવસ બાદ તેનું મૃત્યુ થયું.

પગ લપસી જતા ઉકળતા તેલથી ભરેલા તપેલામાં પડી

પરિવારના સભ્યોના જણાવ્યા અનુસાર, 23 નવેમ્બરની રાત્રે, મલ્લાપુરના રહેવાસી પ્રદીપ કુમાર (30) ઠાકુરગંજમાં લાલ મસ્જિદ પાસે બનેલા એક લૉનમાં લગ્ન માટે ભોજન બનાવવા ગયો હતો. પુરીઓ તળતી વખતે, અચાનક તેનો પગ લપસી ગયો અને તે સીધો ઉકળતા તેલથી ભરેલા તપેલામાં પડી ગયો. દુર્ઘટનામાં પ્રદીપ ગંભીર રીતે દાઝી ગયો હતો. તેના સાથીઓએ તેને ઝડપથી બહાર કાઢ્યો અને કિંગ જ્યોર્જ મેડિકલ યુનિવર્સિટી (KGMU) માં દાખલ કર્યો. પરંતુ પાંચ દિવસની સારવાર બાદ, શનિવારે મોડી રાત્રે પ્રદીપનું મૃત્યુ થયું.

પ્રદીપ અપરિણીત હતો અને પરિવારની આર્થિક જવાબદારીઓમાં મદદ કરતો હતો. તેના ભાઈ દિલીપે જણાવ્યું કે પ્રદીપના મૃત્યુથી સમગ્ર પરિવારમાં ઊંડા શોક અને આઘાતની લાગણી છવાઈ ગઈ છે.

આ ઘટના અંગે ઠાકુરગંજના ઇન્સ્પેક્ટર ઓમવીર સિંહે જણાવ્યું કે ઠાકુરગંજ વિસ્તારમાં થયેલા અકસ્માતમાં એક કેટરિંગ વર્કર દાઝી ગયો હતો અને હોસ્પિટલમાં સારવાર દરમિયાન તેનું મૃત્યુ થયું હતું. પોલીસે આ મામલાની વધુ તપાસ હાથ ધરી છે.

આ પણ વાંચો: “ઓનલાઈન ઠગાઈનો આંતરરાષ્ટ્રીય ખેલ: ઓસ્ટ્રેલિયનોને નિશાનો બનાવી કરોડો ઉડાવ્યા”