Junagadh news: જૂનાગઢ જિલ્લાના માણાવદર તાલુકાના નાનડીયા ગામમાંથી વ્યાજખોરીના દૂષણને લઈને અત્યંત ગંભીર અને હૃદયદ્રાવક ઘટના સામે આવી છે. આર્થિક તંગી અને સતત માનસિક ત્રાસથી કંટાળી 30 વર્ષીય યુવકે ઝેરી દવા પી આપઘાત કર્યો હોવાની ઘટનાએ સમગ્ર વિસ્તારમાં શોક અને રોષનું વાતાવરણ સર્જી દીધું છે. આત્મહત્યા પહેલાં યુવકે બનાવેલો વીડિયો વાયરલ થતાં સમગ્ર કેસે નવો વળાંક લીધો છે અને ચાર વ્યાજખોરો સામે પોલીસ કાર્યવાહી શરૂ થઈ છે.
મૃતક યુવક ગુંજન ઉર્ફે મેરકા ખેતીકામ સાથે જોડાયેલો હતો. પરિવારની સામાન્ય આર્થિક સ્થિતિ અને ખેતી માટેની જરૂરિયાતને કારણે તેણે બાંટવા ગામના કેટલાક શખ્સો પાસેથી લગભગ પાંચ લાખ રૂપિયા વ્યાજે લીધા હતા. શરૂઆતમાં વ્યવહાર સામાન્ય લાગતો હતો, પરંતુ સમય જતા વ્યાજખોરો દ્વારા ભારે દબાણ શરૂ થયું હોવાનું સામે આવ્યું છે.
પરિવારના જણાવ્યા મુજબ યુવક નિયમિત રીતે વ્યાજ ચૂકવતો હતો, છતાં પણ આરોપીઓએ “વ્યાજ પર વ્યાજ” ચઢાવીને પઠાણી ઉઘરાણી શરૂ કરી હતી. ધીમે ધીમે આર્થિક દબાણ એટલું વધી ગયું કે યુવક માનસિક રીતે તૂટી ગયો હતો. આ વચ્ચે સૌથી ગંભીર આરોપ એ છે કે આરોપીઓએ માત્ર વ્યાજ વસૂલવા સુધી જ નહીં પરંતુ યુવકની કિંમતી ખેતીની જમીનનો દસ્તાવેજ બળજબરીપૂર્વક પોતાના નામે કરાવી લીધો હતો. પરિવારનો દાવો છે કે આ જમીન વેચાણ માટે નહોતી, પરંતુ દબાણ અને ધમકી આપી હડપ કરી લેવામાં આવી હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
યુવક પર સતત ધમકી, દબાણ અને અપમાનજનક વર્તન થતું હોવાનું પણ સામે આવ્યું છે. પરિવારનું કહેવું છે કે આરોપીઓ દ્વારા વારંવાર જાનથી મારી નાખવાની ધમકીઓ આપવામાં આવતી હતી, જેના કારણે યુવક સતત ડર અને તણાવમાં જીવતો હતો. આ ઉપરાંત અન્ય કેટલાક લોકો પણ આ સમગ્ર મામલામાં જોડાયેલા હોવાનું સામે આવ્યું છે. એક આરોપી દ્વારા ચેક રિટર્નનો કેસ દાખલ કરીને યુવકને કોર્ટમાં ફસાવવાનો પ્રયાસ કરવામાં આવ્યો હતો. બીજી તરફ અન્ય વ્યક્તિ દ્વારા ઊંચા વ્યાજદરે નાણાં આપી વધુ દબાણ ઊભું કરવામાં આવ્યું હતું.
ફરિયાદ મુજબ યુવકને વારંવાર ફોન અને વોટ્સએપ મેસેજ દ્વારા ગાળો આપવામાં આવતી હતી અને માનસિક રીતે તોડી નાખવાનો પ્રયાસ કરવામાં આવ્યો હતો. આ સતત ત્રાસના કારણે યુવક સંપૂર્ણ રીતે માનસિક રીતે ભાંગી પડ્યો હતો. ઘટનાના થોડા દિવસ પહેલાં યુવક વધુ તણાવમાં આવી ગયો હતો અને ત્યારબાદ તેણે પોતાની વાડી ખાતે જઈ ઝેરી દવા પી લીધી હતી. સારવાર દરમિયાન તેનું મોત નિપજ્યું હતું, જેના કારણે પરિવારમાં ભારે શોક ફેલાઈ ગયો હતો.
આત્મહત્યા પહેલાં યુવકે મોબાઈલમાં બનાવેલો વીડિયો હવે આ કેસનો મહત્વનો પુરાવો બની ગયો છે. વીડિયોમાં યુવકે સ્પષ્ટ રીતે જણાવ્યું છે કે તેણે માત્ર પાંચ લાખ રૂપિયા લીધા હતા, જેની સામે તેની લાખોની જમીનનો દસ્તાવેજ બળજબરીથી કરાવી લેવામાં આવ્યો હતો. વીડિયો વાયરલ થતાં પોલીસ હરકતમાં આવી અને શરૂઆતમાં નોંધાયેલ અકસ્માત મોતનો ગુનો હવે ગંભીર કેસમાં ફેરવવામાં આવ્યો છે. ચાર વ્યાજખોરો સામે આત્મહત્યા માટે પ્રેરણા, ખંડણી અને ધમકી સહિતની ગંભીર કલમો હેઠળ ગુનો નોંધાયો છે.
પોલીસ અધિકારીઓના જણાવ્યા મુજબ આ સમગ્ર કેસમાં ટેકનિકલ પુરાવા, વીડિયો અને નાણાકીય વ્યવહારોની વિગતવાર તપાસ કરવામાં આવી રહી છે. જમીનના દસ્તાવેજો કઈ પરિસ્થિતિમાં થયા તેની પણ તપાસ હાથ ધરાઈ છે. કેસના મુખ્ય આરોપીઓ બાંટવા ગામના હોવાનું સામે આવ્યું છે, જ્યારે અન્ય કેટલાક શખ્સોની પણ સંડોવણીની શક્યતા તપાસ હેઠળ છે. પોલીસનું કહેવું છે કે તમામ પાસાઓને ધ્યાનમાં રાખીને આગળની કાર્યવાહી કરવામાં આવશે. આ ઘટનાએ ફરી એકવાર વ્યાજખોરીના કાળા દૂષણ અને તેના કારણે ઊભા થતા સામાજિક-આર્થિક પ્રશ્નો પર ગંભીર ચર્ચા ઉભી કરી છે.
આ પણ વાંચો: નોકરી ગુમાવ્યા બાદ યુવાને ઝેરી દવા પી જીવન ટૂંકાવ્યું, પરિવાર માટે છોડી ચેતવણીભરી ચિઠ્ઠી
