ઈરાન-અમેરિકા તણાવ: ટ્રમ્પની 48 કલાકની ચેતવણી બાદ ઈરાન નરમ પડ્યું? જાણો શું છે નવી શરતો

Iran-US Conflict: વિશ્વના સૌથી મહત્વપૂર્ણ ઓઈલ માર્ગ ‘સ્ટ્રેટ ઓફ હોર્મુઝ’ (Strait of Hormuz) ને લઈને ચાલી રહેલો વિવાદ હવે નિર્ણાયક વળાંક પર આવી ગયો છે. અમેરિકી રાષ્ટ્રપતિ ડોનાલ્ડ ટ્રમ્પની સીધી સૈન્ય કાર્યવાહીની ધમકી બાદ ઈરાનના સૂરમાં નરમાશ જોવા મળી રહી છે.

શું છે સમગ્ર મામલો?

ગઈ ૨૮ ફેબ્રુઆરીથી ઈરાને આ દરિયાઈ માર્ગ બંધ કરવાની જાહેરાત કરી હતી, જેના કારણે વૈશ્વિક તેલ બજારમાં હડકંપ મચી ગયો હતો. દુનિયાનો લગભગ 20% તેલ અને ગેસનો પુરવઠો આ માર્ગેથી પસાર થાય છે. ટ્રમ્પે સ્પષ્ટ ચેતવણી આપી હતી કે જો 48 કલાકમાં આ રસ્તો નહીં ખુલે, તો અમેરિકા ઈરાનના વીજળી મથકો (Power Plants) ને નિશાન બનાવશે.

ઈરાનનું નવું નિવેદન: ‘દુશ્મન’ સિવાય બધા માટે રસ્તો ખુલ્લો

ન્યૂઝ એજન્સી રોયટર્સના જણાવ્યા અનુસાર, ઈરાને હવે શરતી રાહત આપી છે. આંતરરાષ્ટ્રીય દરિયાઈ સંગઠનમાં ઈરાનના પ્રતિનિધિ અલી મૌસાવીએ રવિવારે જણાવ્યું હતું કે, “અમે આ માર્ગને સંપૂર્ણપણે બંધ રાખવા માંગતા નથી. ‘દુશ્મન દેશો’ (અમેરિકા અને ઈઝરાયેલ) ના જહાજો સિવાય, જે જહાજો સુરક્ષા નિયમોનું પાલન કરશે તેમને પસાર થવામાં કોઈ રોકટોક નહીં નડે.”

મુખ્ય મુદ્દાઓ:

• ટ્રમ્પની ડેડલાઈન: 48 કલાકમાં રસ્તો ખોલવા અથવા પરિણામ ભોગવવા ચેતવણી.
• ઈરાનનો તર્ક: ખાડીમાં અશાંતિ માટે અમેરિકા અને ઈઝરાયેલ જવાબદાર છે.
• સંયુક્ત રાષ્ટ્ર સાથે સહકાર: ઈરાને નાવિકોની સુરક્ષા માટે UN સાથે મળીને કામ કરવાની તૈયારી દર્શાવી છે.
• વૈશ્વિક ચિંતા: જો આ વિવાદ વકરશે તો તેલના ભાવ આસમાને પહોંચી શકે છે અને ઉર્જા સંકટ સર્જાઈ શકે છે.

હવે આખી દુનિયાની નજર ડોનાલ્ડ ટ્રમ્પ પર છે. શું અમેરિકા ઈરાનની આ ‘શરતી નરમાશ’ સ્વીકારશે કે પછી 48 કલાક પૂરા થતા જ કોઈ મોટું સૈન્ય પગલું ભરશે?