ખેડૂત આંદોલન અંગે મહત્વપૂર્ણ સમાચાર, જગજીત સિંહ દલ્લેવાલે પૂર્ણ કરી ભૂખ હડતાલ

નવી દિલ્હી, 6 એપ્રિલ : પંજાબના વૃદ્ધ ખેડૂત નેતા જગજીત સિંહ દલ્લેવાલે રવિવારે તેમની 131 દિવસની અનિશ્ચિત ભૂખ હડતાલ સમાપ્ત કરી છે. તેમણે આંદોલનકારી ખેડૂતોની વિવિધ માંગણીઓ માટે ગયા વર્ષે 26 નવેમ્બરે ભૂખ હડતાળ શરૂ કરી હતી. આ માંગણીઓમાં પાક માટે લઘુત્તમ ટેકાના ભાવ (MSP) પર કાનૂની ગેરંટીનો પણ સમાવેશ થાય છે.

કેન્દ્રીય કૃષિ મંત્રી શિવરાજ સિંહ ચૌહાણ અને કેન્દ્રીય રેલ્વે રાજ્ય મંત્રી રવનીત સિંહ બિટ્ટુએ તેમને આમરણાંત ઉપવાસ સમાપ્ત કરવાની અપીલ કર્યાના એક દિવસ પછી, જગજીત સિંહે હડતાળ સમાપ્ત કરવાનો નિર્ણય કર્યો હતો. દલ્લેવાલે પંજાબના ફતેહગઢ સાહિબ જિલ્લાના સરહિંદમાં આયોજિત ‘કિસાન મહાપંચાયત’ દરમિયાન જાહેરાત કરી કે તેઓ તેમની અનિશ્ચિત હડતાલ સમાપ્ત કરી રહ્યાં છે.

આપણે એક મજબૂત ‘ફ્રન્ટ’ બનાવવો પડશેઃ દલ્લેવાલ

ખેડૂતોની સભાને સંબોધતા, ખેડૂત નેતા જગજીત સિંહ દલ્લેવાલે કહ્યું, તમે બધાએ (મને) આમરણાંત ઉપવાસ સમાપ્ત કરવા કહ્યું હતું. મારા માટે ‘સંગત’ (લોકો) ‘રબ્બ દા રૂપ’ (ભગવાનનું સ્વરૂપ) છે. હું તમારા બધાનો આભારી છું કે તમે આંદોલનને મેં જે રીતે કહ્યું હતું તે રીતે સંભાળ્યું. હું તમારી ભાવનાઓનું સન્માન કરું છું.

મજબૂત મોરચો બનાવવાની વાત કરતાં તેમણે કહ્યું, આંદોલન ચાલુ છે. આજે પણ હું અચોક્કસ મુદતની હડતાળને સમાપ્ત કરવા માંગતો નથી, પરંતુ તમે મને વારંવાર (ઉપવાસ સમાપ્ત કરવા) કહ્યું છે અને હું તેનો આદર કરું છું. પરંતુ હું તમને કહેવા માંગુ છું અને ખાતરી પણ માંગુ છું કે અમારે મજબૂત ‘મોરચો’ બનાવવો પડશે. લડત ચાલુ રહેશે.

26મી નવેમ્બરે ભૂખ હડતાળ શરૂ કરી

જગજીત સિંહ દલ્લેવાલ સંયુક્ત કિસાન મોરચા (બિન-રાજકીય) અને કિસાન મઝદૂર મોરચા (KMM) ના સંયુક્ત પ્લેટફોર્મના વરિષ્ઠ નેતા છે. ખેડૂતોની માંગણીઓને લઈને કેન્દ્ર પર દબાણ લાવવા માટે તેમણે ગયા વર્ષે 26 નવેમ્બરે તેમની અનિશ્ચિતકાળની ભૂખ હડતાળ શરૂ કરી હતી. આ વર્ષે જાન્યુઆરીમાં, કેન્દ્ર સરકારે ખેડૂત નેતાઓને વાટાઘાટો માટે બોલાવ્યા પછી, દલ્લેવાલે ખનૌરી વિરોધ સ્થળ પર સારવાર લેવાનું શરૂ કર્યું, પરંતુ તેમની હડતાલ સમાપ્ત કરી ન હતી.

શિવરાજ સિંહે પણ અપીલ કરી હતી

કેન્દ્રીય મંત્રી શિવરાજ સિંહ ચૌહાણે શનિવારે દલ્લેવાલને તેમની ભૂખ હડતાળ સમાપ્ત કરવાની અપીલ કરી હતી. સોશિયલ મીડિયા પ્લેટફોર્મ પર એક પોસ્ટમાં શિવરાજની જેમ કેન્દ્રીય મંત્રી બિટ્ટુએ પણ ગઈ કાલે શનિવારે આવી જ અપીલ કરી હતી. બિટ્ટુએ કહ્યું, તમારું સ્વાસ્થ્ય ખૂબ જ મહત્વપૂર્ણ છે અને તમારું જીવન પંજાબના લોકો માટે કિંમતી છે કારણ કે ખેડૂતો અને ખેતમજૂરોના સંઘર્ષ માટે તમારા નેતૃત્વની જરૂર પડશે.

તેમણે એમ પણ કહ્યું કે બજેટ સત્ર દરમિયાન ભાજપના તમામ મંત્રીઓ અને વરિષ્ઠ નેતાઓએ ખેડૂત નેતા વિશે માહિતી લીધી અને તેમને શુભેચ્છા પાઠવી. બિટ્ટુએ દલ્લેવાલને તેમની ભૂખ હડતાળ સમાપ્ત કરવા અને કેન્દ્ર સરકાર સાથે ચર્ચા માટે આગળ આવવાની પણ અપીલ કરી હતી.

આ પણ વાંચો :- ઓછા વ્યાજે મળશે નવી લોન, EMI પણ થશે સસ્તી, RBI આ સપ્તાહે કરશે મોટી જાહેરાત