શેરબજારમાં ભારે ઉતાર-ચઢાવ: સેન્સેક્સ 479 અંક તૂટ્યો, નિફ્ટી 23,900ની નજીક

ups and downs in the stock market:   વૈશ્વિક ભૂરાજકીય તણાવ અને ઈરાન પર અમેરિકાના હુમલાની અસર વચ્ચે બુધવારે ભારતીય શેરબજારની શરૂઆત ભારે ઉતાર-ચઢાવ સાથે થઈ હતી. રોકાણકારો અમેરિકા અને ઈરાન વચ્ચેની સ્થિતિ પર નજીકથી નજર રાખી રહ્યા હોવાથી બજારમાં સાવચેતીભર્યો માહોલ જોવા મળ્યો હતો.

બજાર ખુલતાની સાથે જ મુખ્ય સૂચકાંકો લાલ નિશાનમાં જોવા મળ્યા હતા. બોમ્બે સ્ટોક એક્સચેન્જ (BSE)નો મુખ્ય સૂચકાંક સેન્સેક્સ 479.26 અંક અથવા 0.62 ટકાના ઘટાડા સાથે 76,009.70ના સ્તરે કારોબાર કરતો જોવા મળ્યો હતો. બીજી તરફ, નેશનલ સ્ટોક એક્સચેન્જ (NSE)નો નિફ્ટી 118 અંક અથવા 0.49 ટકાના ઘટાડા સાથે 23,913.70ના સ્તરે પહોંચી ગયો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

વ્યક્તિગત શેરોની વાત કરીએ તો બેંકિંગ ક્ષેત્રની અગ્રણી કંપની HDFC Bankના શેરમાં લગભગ 2 ટકાનો ઘટાડો નોંધાયો હતો. જ્યારે Eternalના શેરમાં 1 ટકાથી વધુનો વધારો જોવા મળ્યો હતો, જેના કારણે કેટલાક રોકાણકારોને રાહત મળી હતી.

વિશ્લેષકોના જણાવ્યા અનુસાર, હાલ બજારમાં દબાણનું મુખ્ય કારણ વૈશ્વિક અનિશ્ચિતતા છે. ઈરાન પર અમેરિકાની કાર્યવાહી બાદ મધ્યપૂર્વમાં તણાવ વધવાની શક્યતાઓ વચ્ચે રોકાણકારો સાવચેતીપૂર્વક નિર્ણય લઈ રહ્યા છે. ખાસ કરીને કાચા તેલના ભાવમાં સંભવિત વધારાની આશંકાએ પણ બજારના સેન્ટિમેન્ટ પર અસર કરી છે.

જોકે, બજાર નિષ્ણાતોનું માનવું છે કે ભારતીય અર્થવ્યવસ્થાના મજબૂત મૂળભૂત પરિબળોને કારણે લાંબા ગાળે બજારમાં તેજીનો માહોલ જળવાઈ શકે છે. પરંતુ તે માટે કાચા તેલના ભાવ સ્થિર રહેવા અને વૈશ્વિક સ્તરે શાંતિપૂર્ણ વાતાવરણ સર્જાવું જરૂરી રહેશે.

અત્યારે, રોકાણકારો અમેરિકા-ઈરાન સંબંધિત ઘટનાઓ અને વૈશ્વિક બજારના સંકેતો પર નજર રાખીને આગળની સ્ટ્રેટેજી બનાવી રહ્યા છે.

આ પણ વાંચો : TMCના 50 ધારાસભ્યો અને 20 સાંસદો ભાજપમાં જોડાવા માટે તૈયાર, ભાજપના આ સાંસદે દાવો કર્યો