સિંગતેલના ભાવમાં ફરી ભડકો: 15 કિલોના ડબ્બે ₹20નો વધારો, જાણો હવે કેટલામાં પડશે ડબ્બો

રાજકોટના તેલ બજારમાં સિંગતેલના ભાવમાં ફરી એકવાર વધારો નોંધાયો છે. સિંગતેલના 15 કિલોના ડબ્બે ₹20નો વધારો થતાં નવો ભાવ વધીને ₹3,130 પર પહોંચ્યો છે. ખાદ્યતેલના ભાવમાં સતત થઈ રહેલા વધારાને કારણે સામાન્ય જનતા અને ખાસ કરીને ગૃહિણીઓના ઘરખર્ચના બજેટ પર વધુ બોજ પડી રહ્યો છે. ચાલુ વર્ષે સિંગતેલ સહિત અન્ય ખાદ્યતેલો પણ મોંઘા રહેવાના સંકેતો મળી રહ્યા છે.
ગૃહિણીઓના રસોડાના બજેટ પર મોંઘવારીનો વધુ માર
મોંઘવારીનો સામનો કરી રહેલા સામાન્ય પરિવારો માટે ખાદ્યતેલના વધતા ભાવ ચિંતાનો વિષય બન્યા છે. સૌરાષ્ટ્રના મુખ્ય તેલ બજાર ગણાતા રાજકોટમાં સિંગતેલના ભાવમાં ફરી વધારો ઝીંકાયો છે. 15 કિલોના ડબ્બે ₹20નો વધારો થતાં સિંગતેલનો નવો ભાવ ₹3,130 થયો છે.
રોજિંદા રસોઈમાં ખાદ્યતેલનો ઉપયોગ અનિવાર્ય હોવાથી ભાવવધારાની સીધી અસર ગૃહિણીઓના માસિક બજેટ પર પડી રહી છે. ખાસ કરીને મધ્યમ અને ગરીબ વર્ગના પરિવારો માટે વધતો ઘરખર્ચ વધુ મુશ્કેલી ઊભી કરી રહ્યો છે.
ચાલુ વર્ષે અન્ય ખાદ્યતેલો પણ મોંઘા રહેવાની શક્યતા
તેલ બજારના વેપારીઓ અને સૂત્રોના જણાવ્યા અનુસાર, બજારની વર્તમાન સ્થિતિને જોતા ચાલુ વર્ષ દરમિયાન સિંગતેલના ભાવ ઊંચા રહેવાની શક્યતા છે. સિંગતેલ ઉપરાંત કપાસિયા અને પામોલિન સહિતના અન્ય ખાદ્યતેલોના ભાવ પણ આગામી દિવસોમાં ઊંચા રહેવાના સંકેતો મળી રહ્યા છે.
ખાદ્યતેલના ભાવમાં સતત વધારાને કારણે ગ્રાહકોના ખિસ્સા પર વધારાનો બોજ પડી રહ્યો છે. જો ભાવમાં આવી જ તેજી ચાલુ રહેશે તો આગામી દિવસોમાં સામાન્ય પરિવારોના રસોડાનું બજેટ વધુ ખોરવાઈ શકે છે.
આ પણ વાંચો: અમદાવાદના નરોડામાં નશામાં ધૂત કારચાલકનો આતંક! અનેક વાહનોનો કચ્ચરઘાણ, એક યુવક ગંભીર












