ગૌતમ અદાણીને અન્ય ઉદ્યોગપતિઓ કરતાં કેટલું ઓછું વેતન મળે છે! જાણો

• ‘બ્લૂમબર્ગ બિલિયોનેર ઇન્ડેક્સ’ અનુસાર, અદાણીની કુલ સંપત્તિ 106 અરબ અમેરિકન ડોલર છે. તે એશિયાના સૌથી ધનિક વ્યક્તિ બનવા માટે અંબાણી સાથે સ્પર્ધા કરી રહ્યો છે

મુંબઈ, 23 જૂન: ભારતના બીજા સૌથી ધનિક વ્યક્તિ ગૌતમ અદાણીને 31 માર્ચ, 2024 ના રોજ પૂરા થતા નાણાકીય વર્ષમાં કુલ પગાર (પરિશ્રમ) રૂ. 9.26 કરોડ મળ્યો છે, જે ઉદ્યોગમાં તેમના અન્ય સમકક્ષો કરતાં નોંધપાત્ર રીતે ઓછો છે. દેશના સૌથી અમીર ભારતીય મુકેશ અંબાણી કોવિડ-19 પછી કોઈ પગાર નથી લઈ રહ્યા. અગાઉ તેમનો પગાર વાર્ષિક 15 કરોડ રૂપિયા સુધી મર્યાદિત હતો. અદાણીનો પગાર ટેલિકોમ ક્ષેત્રના દિગ્ગજ સુનીલ ભારતી મિત્તલ (2022-23માં રૂ. 16.7 કરોડ), રાજીવ બજાજ (રૂ. 53.7 કરોડ), પવન મુંજાલ (રૂ. 80 કરોડ), L&Tના ચેરમેન એસએન સુબ્રમણ્યમ અને ઇન્ફોસિસના ચીફ એક્ઝિક્યુટિવ ઓફિસર (CEO) સલિલ એસ પારેખના પગારથી ઘણો ઓછો છે. અદાણીનો પગાર ભારતના લગભગ તમામ મોટા પરિવારની માલિકીના જૂથોના વડાઓ કરતાં ઓછો છે.

બે કંપનીઓમાંથી અદાણીને મળ્યો પગાર

અદાણી ગ્રૂપની 10 લિસ્ટેડ કંપનીઓના વાર્ષિક અહેવાલો દર્શાવે છે કે અદાણીએ પોર્ટ-ટુ-એનર્જી સેક્ટરમાં કાર્યરત 10 ગ્રૂપ કંપનીઓમાંથી માત્ર બેમાંથી જ પગાર લીધો હતો. તેમને ગ્રૂપની ફ્લેગશિપ કંપની અદાણી એન્ટરપ્રાઇઝ લિમિટેડ (AEL) તરફથી 2023-24માં પગાર તરીકે રૂ. 2.19 કરોડ અને લાભો અને અન્ય ભથ્થાં તરીકે રૂ. 27 લાખ મળ્યા હતા. AELના વાર્ષિક અહેવાલ મુજબ, તેમનો કુલ પગાર રૂ. 2.46 કરોડ અગાઉના નાણાકીય વર્ષ 2022-23 કરતાં ત્રણ ટકા વધુ છે. આ સિવાય અદાણીને અદાણી પોર્ટ્સ એન્ડ SEZ લિમિટેડ (APSEZ) તરફથી રૂ. 6.8 કરોડનો પગાર મળ્યો હતો.

મુકેશ અંબાણી સાથે ટક્કર

‘બ્લૂમબર્ગ બિલિયોનેર ઇન્ડેક્સ’ અનુસાર, અદાણીની કુલ સંપત્તિ 106 અરબ અમેરિકન ડોલર છે. તે એશિયાના સૌથી ધનિક વ્યક્તિ બનવા માટે અંબાણી સાથે સ્પર્ધા કરી રહ્યો છે. તેઓ 2022માં એશિયાના સૌથી ધનિક બનવાના હતા, પરંતુ યુએસ શોર્ટ-સેલર હિંડનબર્ગ રિસર્ચના અહેવાલ બાદ ગયા વર્ષે તેમની ગ્રૂપ કંપનીઓના શેરનું મૂલ્ય 150 અરબ ડોલર સુધી ઘટી ગયું હતું. આ વર્ષે તેમણે અંબાણીને બે વખત પાછળ છોડી દીધા હતા. જોકે હવે તે ફરી બીજા સ્થાને આવી ગયા છે.

વિશ્વના સૌથી અમીર લોકોની યાદીમાં 12મા નંબર પર

અંબાણી 111 અબજ ડોલરની સંપત્તિ સાથે વિશ્વના સૌથી ધનિક લોકોની યાદીમાં 12મા સ્થાને છે. આ યાદીમાં અદાણી 14મા સ્થાને છે. વાર્ષિક અહેવાલ મુજબ અદાણીના નાના ભાઈ રાજેશને AEL તરફથી નફા પરના કમિશન રુપે 4.71 કરોડ રુપિયા સહિત 8.37 કરોડનો પગાર મળ્યો હતો. જ્યારે તેમના ભત્રીજા પ્રણવ અદાણીને રૂ. 4.5 કરોડના કમિશન સહિત કુલ રૂ. 6.46 કરોડનું મહેનતાણું મળ્યું હતું.

આ પણ વાંચો: રેલવે પ્લેટફોર્મ ટીકીટ GSTમાંથી બાકાત, જાણો બીજા ક્યાં નિર્ણયો લેવાયા