કેન્દ્ર સરકારે બજાર ઉધાર લક્ષ્યાંકમાં કર્યો મોટો કાપ: ચાલુ નાણાકીય વર્ષ 2026-27 માટે ઉધાર રકમ ₹1.20 લાખ કરોડ ઘટી

Central Government Reduces FY26 Market Borrowing: કેન્દ્ર સરકારે ચાલુ નાણાકીય વર્ષ 2026-27 માટે પોતાના બજાર ઉધાર (Market Borrowing) ના લક્ષ્યાંકમાં નોંધપાત્ર ઘટાડો કરવાનો મહત્વનો નિર્ણય લીધો છે. સરકાર હવે સમગ્ર નાણાકીય વર્ષ દરમિયાન કુલ ₹15.99 લાખ કરોડ ઉધાર લેશે, જે બજેટ વખતે અંદાજવામાં આવેલા ₹17.20 લાખ કરોડ કરતા ઘણો ઓછો છે. આમ, સરકારે પોતાના વાર્ષિક બજાર ઉધારના લક્ષ્યાંકમાં ₹1,20,494 કરોડનો કાપ મૂક્યો છે.
બીજા અર્ધવાર્ષિક ગાળામાં ₹7.86 લાખ કરોડનું ઉધાર
નાણા મંત્રાલય દ્વારા આપવામાં આવેલી માહિતી અનુસાર, સરકાર નાણાકીય વર્ષના બીજા ભાગમાં એટલે કે ઓકટોબર 2026 થી માર્ચ 2027 વચ્ચે બજારમાંથી ₹7.86 લાખ કરોડ ભેગા કરશે. આ રકમ સરકારી બોન્ડ્સ જારી કરીને એકત્ર કરવામાં આવશે. બીજા છ મહિનાનું આ સંપૂર્ણ ઉધાર 23 સાપ્તાહિક હરાજીઓ દ્વારા મેળવવામાં આવશે. આ યોજનામાં ₹15,000 કરોડના સોવરેન ગ્રીન બોન્ડ્સનો પણ સમાવેશ થાય છે.
પ્રથમ છ મહિનામાં નક્કી કરેલા લક્ષ્ય કરતાં ₹13,500 કરોડ વધુ એકત્ર કરાયા
ચાલુ નાણાકીય વર્ષના પ્રથમ છ મહિનામાં, એટલે કે એપ્રિલથી સપ્ટેમ્બર દરમિયાન, સરકારે બજારમાંથી આશરે ₹8.13 લાખ કરોડનું ઉધાર એકત્ર કર્યું છે. આ રકમ અગાઉ નક્કી કરાયેલા ₹8 લાખ કરોડના લક્ષ્ય કરતાં આશરે ₹13,500 કરોડ વધુ છે. નાણા મંત્રાલયે માર્ચમાં જણાવ્યું હતું કે એપ્રિલથી સપ્ટેમ્બરના ગાળામાં પણ ₹15,000 કરોડના સોવરેન ગ્રીન બોન્ડ્સનો સમાવેશ કરાયો હતો. પ્રથમ અને બીજા બંને ગાળાનું મળીને સમગ્ર વર્ષનું સુધારેલું બજાર ઉધાર હવે ₹15,99,506 કરોડ રહેશે.
શું હોય છે સરકારી બજાર ઉધાર અને ગ્રીન બોન્ડ્સ?
જ્યારે સરકારની આવક અને ખર્ચ વચ્ચે ખાધ (તફાવત) ઊભી થાય છે, ત્યારે વધારાના ભંડોળની જરૂરિયાત પૂરી કરવા માટે સરકાર બજારમાંથી નાણાં ઉછીના લે છે. આ માટે સરકાર વિવિધ સિક્યોરિટીઝ અને બોન્ડ્સ જારી કરે છે, જેને બેંકો, મ્યુચ્યુઅલ ફંડ્સ અને વીમા કંપનીઓ ખરીદે છે. સોવરેન ગ્રીન બોન્ડ્સથી મળતા નાણાંનો ઉપયોગ પર્યાવરણ અનુકૂળ અને ગ્રીન પ્રોજેક્ટ્સમાં થાય છે. ઉલ્લેખનીય છે કે, ઉધાર લીધેલી રકમનો મોટો હિસ્સો જૂની લોનનું વ્યાજ ચૂકવવામાં વપરાય છે. નાણા મંત્રાલયના જુલાઈ 2026 સુધીના ડેટા મુજબ, સરકારે વ્યાજ ચુકવણી પર ₹4.27 લાખ કરોડ ખર્ચ્યા હતા, જ્યારે કુલ ખર્ચ ₹17.62 લાખ કરોડ થયો હતો.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
3 થી 50 વર્ષની મુદતના બોન્ડ જારી કરાશે
વર્ષના બીજા ભાગમાં સરકાર અલગ-અલગ મુદતના સરકારી બોન્ડ્સ બહાર પાડશે. આમાં 3, 5, 7, 10, 15, 30, 40 અને 50 વર્ષની મુદતવાળા બોન્ડ્સનો સમાવેશ થાય છે. કુલ ઉધાર રકમમાંથી 10 વર્ષની મુદતવાળા બોન્ડ્સનો હિસ્સો સૌથી વધુ 26% રહેશે. આ સિવાય 15 વર્ષના બોન્ડ્સનો હિસ્સો 17.6% અને 5 વર્ષના બોન્ડ્સનો હિસ્સો 12.1% રાખવામાં આવ્યો છે.
આ પણ વાંચો: નીતિન ગડકરીની જાહેરાત : ઈથેનોલથી ચાલતી કાર ઓક્ટોબરમાં કરાશે લોન્ચ












