સિદ્ધુ મૂસેવાલાની હત્યા કયા કારણે થઈ? પંજાબ સરકારે SCમાં કર્યો ખુલાસો

• સિદ્ધુ મૂસેવાલાની હત્યા 29 મે, 2022ના રોજ તેમના ગામ માનસામાં કરવામાં આવી હતી. હવે આ હત્યા મામલે પંજાબ સરકારે SCમાં ખુલાસો કરતા કહ્યું કે સિદ્ધુની હત્યા સુરક્ષાના અભાવે થઈ હતી

દિલ્હી, 4 મે: પંજાબ સરકારે સુપ્રીમ કોર્ટમાં સ્વીકાર્યું છે કે પંજાબી ગાયક સિદ્ધુ મૂસેવાલાની સુરક્ષાના અભાવે હત્યા થઈ હતી. પંજાબ સરકારના વકીલ એડવોકેટ જનરલ ગુરમિંદર સિંહ ગેરીએ સુપ્રીમ કોર્ટમાં દાખલ કરેલા સોગંદનામામાં આ વાત સ્વીકારી છે. સુપ્રીમ કોર્ટમાં કબૂલાત કર્યા બાદ મૂસેવાલાના પિતા બલકૌર સિંહે સરકાર સામે આકરા પ્રહારો કર્યા હતા. શિરોમણી અકાલી દળે પણ સિંગરની હત્યા પર સરકારને ઘેરી છે.

સિદ્ધુ મૂસેવાલાના પિતાએ FIRની કરી માંગ

એક રિપોર્ટ અનુસાર, મૂસેવાલાના પિતા બલકૌર સિંહે કહ્યું છે કે તેમના કબૂલાત બાદ સરકારે તે લોકો વિરુદ્ધ FIR દાખલ કરવી જોઈએ જેમના કારણે સુરક્ષામાં ઘટાડો કરવામાં આવ્યો હતો. જવાબદારો સામે કાર્યવાહીની માંગ કરતાં તેમણે કહ્યું કે સત્ય જીભ પર આવે છે. આ હત્યામાં આરોપીઓની ભૂમિકા કરતાં પંજાબ સરકારની ભૂમિકા વધુ છે. લોરેન્સ બિશ્નોઈએ દોઢ વર્ષ પહેલા જેલમાંથી ઈન્ટરવ્યુ આપ્યો હતો, પરંતુ સરકાર હજુ સુધી કંઈ શોધી શકી નથી.

પંજાબમાં કાયદો અને વ્યવસ્થા ખૂબ જ ખરાબ: સિદ્ધુના પરિવારના સભ્યો

શિરોમણી અકાલી દળના વરિષ્ઠ નેતા બિક્રમ સિંહ મજીઠિયાએ કહ્યું છે કે મૂસેવાલાની હત્યાના મામલામાં સરકાર સામે પણ કેસ નોંધવો જોઈએ. તેમણે કહ્યું કે સુરક્ષા કવચ પાછું ખેંચાયાના બે દિવસમાં સિદ્ધુની હત્યા કરવામાં આવી હતી. મૂસેવાલાના પરિવારના સભ્યો પણ આ જ વાત કહી રહ્યા હતા. તેમણે કહ્યું કે સરકારે ન માત્ર સિંગરની સુરક્ષા ઓછી કરી, પરંતુ બિશ્નોઈને જેલમાંથી ઈન્ટરવ્યુ લેવાની પણ મંજૂરી પણ આપી હતી. તેનાથી સ્પષ્ટ થાય છે કે મુખ્યમંત્રી ભગવંત માનના નેતૃત્વમાં પંજાબમાં કાયદો અને વ્યવસ્થાની સ્થિતિ બગડી છે.

સરકારે મૂસેવાલાની સુરક્ષામાં ઘટાડો કર્યો હતો

વાસ્તવમાં, પંજાબ સરકારે સિદ્ધુ મૂસેવાલાની સુરક્ષા માટે 4 સુરક્ષા કર્મચારીઓ તૈનાત કર્યા હતા, જે ઘટાડીને બે કરવામાં આવ્યા હતા. આનો ફાયદો ઉઠાવીને ગોલ્ડી બ્રારે સિદ્ધુની હત્યા કરવા માટે તેના શૂટર્સ મોકલ્યા હતા. પોલીસે ચાર્જશીટમાં પણ આ વાત સ્વીકારી છે. પોલીસે 26 મેના રોજ સુરક્ષામાં ઘટાડો કર્યો હતો અને ત્યારબાદ 29 મે, 2022ના રોજ સિદ્ધુ મૂસેવાલાની હત્યા કરવામાં આવી હતી. તે સમયે પંજાબ સરકારે મૂસેવાલા સહિત 424 VIPની સુરક્ષામાં ઘટાડો કર્યો હતો.

આ પણ વાંચો: કેનેડાએ ખાલિસ્તાની આતંકી નિજ્જરની હત્યામાં શંકાસ્પદોની કરી ધરપકડ: રિપોર્ટ