બિહારમાં VIP પાર્ટી ચીફ મુકેશ સહાનીના પિતા જીતન સહાનીની હત્યા, ઘરમાંથી મળી લાશ

• હત્યા પાછળનું કારણ હજુ સુધી પોલીસ જાણી શકી નથી, પરંતુ અંગત અદાવતના કારણે આ ઘટનાને અંજામ આપવામાં આવ્યો હોવાનું અનુમાન 

પટના, 16 જુલાઈ: VIP પાર્ટીના વડા અને બિહાર સરકારના પૂર્વ મંત્રી મુકેશ સહાનીના પિતા જીતન સહાનીની હત્યા કરવામાં આવી છે. મળતી માહિતી મુજબ, દરભંગાના ઘરમાં જ તેમની હત્યા કરવામાં આવી છે. જેની દરભંગાના SSPએ પુષ્ટિ કરી છે. દરભંગાના SSP જગુનાથ રેડ્ડીએ જણાવ્યું કે, મુકેશ સહાનીના પિતા જીતન સહાનીની લાશ ઘરની અંદર વિકૃત હાલતમાં મળી આવી હતી. પોલીસ ઘટનાસ્થળે રવાના થઈ ગઈ છે.  જીતન સહાનીનું ઘર દરભંગાના સુપૌલ બજારની અફઝલા પંચાયતમાં છે.

હત્યા પાછળનું કારણ હજુ સુધી પોલીસ જાણી શકી નથી, પરંતુ પોલીસ સૂત્રોમાંથી મળતી માહિતી મુજબ, અંગત અદાવતના કારણે આ ઘટનાને અંજામ આપવામાં આવ્યો હોઈ શકે છે. મુકેશ સહાની બિહારમાં ખલાસીઑના મોટા નેતા હોવાનું કહેવાય છે. તેઓ વિકાસશીલ ઇન્સાન પાર્ટી એટલે કે VIPના વડા પણ છે.

મુકેશ સહાનીના પિતાની હત્યા બિહારમાં બની શકે છે મોટો મુદ્દો 

પછાત સમુદાયમાંથી આવતા હોવાથી મુકેશ સહાનીના પિતાની હત્યા બિહારમાં મોટો મુદ્દો બની શકે છે. આ ઘટનાએ રાજ્યમાં કાયદો અને વ્યવસ્થા પર મોટા સવાલો ઉભા કર્યા છે. આ હત્યાકાંડ પર RJD પ્રવક્તા મૃત્યુંજય તિવારીએ કહ્યું કે, “આ આશ્ચર્યજનક છે. એવું લાગે છે કે, બિહારમાં હવે કોઈ સુરક્ષિત નથી. અહીં હત્યાઓનો સિલસિલો ચાલુ છે. મુકેશ સહાનીના પિતાની આ રીતે હત્યા થઈ શકે છે તો સુરક્ષિત કોણ?”

કોણ છે મુકેશ સહાની?

બિહારમાં, મુકેશ સહાની વિકાસશીલ ઇન્સાન પાર્ટી (VIP)ના વડા છે. તેમની પાર્ટી ચૂંટણી પહેલા જ મહાગઠબંધનમાં સામેલ થઈ ગઈ હતી. લોકસભા ચૂંટણીને ધ્યાનમાં રાખીને આ ડીલ મૂળ તો મુકેશ સહાની અને RJD વચ્ચે થઈ હતી.

મુકેશ સહાનીની એક ઓળખ ‘સન ઑફ મલ્લાહ’ છે. સહાની મૂળભૂત રીતે (મલ્લાહ/નિષાદ) રાજકારણ કરે છે. જો મતોની વાત કરવામાં આવે તો બિહારમાં નાવિકોની વસ્તી લગભગ સાત ટકા છે. તે જ સમયે, સહાનીનો અંદાજ છે કે, આ સમુદાયની સંખ્યા લગભગ 14 ટકા છે.

આ પણ જૂઓ: કાશ્મીરના ડોડામાં આતંકવાદીઓ સાથેની અથડામણમાં અધિકારી સહિત 4 જવાનો શહીદ