વિનોદ કાંબલી હેલ્થ અપડેટ : બોલવામાં તકલીફ, નાના ભાઈ વીરેન્દ્રએ ચાહકોને કરી ખાસ અપીલ

નવી દિલ્હી, 21 ઓગસ્ટ 2025:  પૂર્વ ભારતીય ક્રિકેટર વિનોદ કાંબલીની તબિયત અંગે તેમના નાના ભાઈ વીરેન્દ્ર કાંબલીએ એક મોટું અપડેટ આપ્યું છે. વીરેન્દ્રએ ચાહકો સાથે આ માહિતી શેર કરી છે, જેમાં તેમણે જણાવ્યું કે હાલમાં વિનોદ કાંબલી તેમના ઘરે છે અને વિવિધ બીમારીઓમાંથી સાજા થઈ રહ્યા છે. ગયા વર્ષે અચાનક તબિયત લથડતાં વિનોદ કાંબલીને થાણેની એક ખાનગી હોસ્પિટલમાં દાખલ કરવામાં આવ્યા હતા. તેમને યુરિન ઇન્ફેક્શન અને માંસપેશીઓમાં ખેંચાણની ફરિયાદ હતી. ત્યારથી તેમની સારવાર ચાલી રહી છે.

વીરેન્દ્ર કાંબલીએ વિનોદની તબિયત વિશે શું કહ્યું?

વિનોદ કાંબલીના નાના ભાઈ વીરેન્દ્ર કાંબલીએ વિક્કી લાલવાણીના યૂટ્યૂબ ચેનલ પર વાતચીત દરમિયાન જણાવ્યું, “વિનોદ હાલમાં ઘરે છે. તેમની હાલત સ્થિર છે, પરંતુ સારવાર ચાલુ છે. તેમને બોલવામાં તકલીફ થઈ રહી છે. સાજા થવામાં તેમને સમય લાગશે. પરંતુ તેઓ ચેમ્પિયન છે અને તેઓ પાછા ફરશે. આશા છે કે તેઓ ટૂંક સમયમાં ચાલવા અને દોડવાનું શરૂ કરશે. મને તેમનામાં સંપૂર્ણ વિશ્વાસ છે. હું ઈચ્છું છું કે તમે તેમને ફરી મેદાન પર જોઈ શકો.”

ચાહકો માટે ખાસ અપીલ

વીરેન્દ્ર કાંબલીએ ચાહકોને ખાસ અપીલ કરતાં કહ્યું કે બધા લોકો તેમના ભાઈના ઝડપથી સાજા થવા માટે પ્રાર્થના કરે. તેમણે વધુમાં જણાવ્યું કે વિનોદ કાંબલીએ 10 દિવસ સુધી રિહેબિલિટેશન પ્રોગ્રામમાં ભાગ લીધો હતો. તેમના આખા શરીરની તપાસ કરવામાં આવી, જેમાં બ્રેઈન સ્કેન અને યુરિન ટેસ્ટનો પણ સમાવેશ થાય છે. આ બધા ટેસ્ટના પરિણામો સામાન્ય હતા, અને તે સમયે તેમને ખાસ મુશ્કેલી નહોતી. જોકે, તેઓ ચાલી શકતા ન હતા, એટલે તેમને ફિઝિયોથેરાપી કરવાની સલાહ આપવામાં આવી હતી. તેઓ હજી પણ બોલતી વખતે લડખડાઈ રહ્યા છે, પરંતુ તેમની તબિયતમાં ધીમે-ધીમે સુધારો થઈ રહ્યો છે. વીરેન્દ્રએ ચાહકોને કહ્યું, “તેમને તમારા પ્રેમ અને સમર્થનની જરૂર છે.”

વિનોદ કાંબલીની તબિયતનો ઇતિહાસ

ગયા વર્ષે ઓક્ટોબરમાં વિનોદ કાંબલીની તબિયત અચાનક બગડી હતી, જેના કારણે તેમને થાણેની એક હોસ્પિટલમાં દાખલ કરવામાં આવ્યા હતા. તેમને યુરિન ઇન્ફેક્શન અને માંસપેશીઓમાં ખેંચાણની સમસ્યા હતી. સારવાર દરમિયાન ડોક્ટરોને તેમના મગજમાં બ્લડ ક્લોટની પણ જાણકારી મળી હતી, જેના કારણે તેમનો હોસ્પિટલમાં રોકાણ લંબાયું હતું. 1 જાન્યુઆરી, 2025ના રોજ તેમને હોસ્પિટલમાંથી રજા આપવામાં આવી, અને હવે તેઓ બાંદ્રામાં પોતાના ઘરે સાજા થઈ રહ્યા છે. આ ઉપરાંત, વિનોદ કાંબલીએ 2013માં બે હૃદયરોગના હુમલા પણ સહન કર્યા હતા, અને તેઓ લાંબા સમયથી આર્થિક મુશ્કેલીઓ અને અન્ય વ્યક્તિગત સમસ્યાઓનો સામનો કરી રહ્યા છે.

ચાહકો અને ક્રિકેટર્સની ચિંતા

વિનોદ કાંબલીની તબિયત અંગેના સમાચારે ચાહકો અને ક્રિકેટ સમુદાયમાં ચિંતા ફેલાવી છે. તાજેતરમાં સચિન તેંડુલકર સાથેનો એક વાયરલ વીડિયો, જેમાં તેઓ તેમના બાળપણના કોચ રમાકાંત આચરેકરના એક કાર્યક્રમમાં જોવા મળ્યા હતા, તેમાં તેમની નબળી શારીરિક સ્થિતિએ ચાહકોને ચોંકાવી દીધા હતા. 1990ના દાયકામાં ભારતના શ્રેષ્ઠ બેટ્સમેનમાંના એક ગણાતા વિનોદ કાંબલીની ક્રિકેટ કારકિર્દી ઈજાઓ અને અન્ય સમસ્યાઓને કારણે ટૂંકી રહી હતી. તેમણે ભારત માટે 17 ટેસ્ટ અને 104 વનડે મેચો રમી હતી, જેમાં તેમણે અનુક્રમે 1,084 અને 2,477 રન બનાવ્યા હતા.

ક્રિકેટર્સનું સમર્થન

વિનોદ કાંબલીને તેમના મુશ્કેલ સમયમાં ક્રિકેટ સમુદાયનું સમર્થન મળ્યું છે. સચિન તેંડુલકર, સુનીલ ગાવસ્કર અને કપિલ દેવ જેવા દિગ્ગજ ક્રિકેટરોએ તેમની મદદ કરી છે. ખાસ કરીને, સચિન તેંડુલકરે તેમના બાળપણના મિત્રને આર્થિક અને ભાવનાત્મક સમર્થન આપ્યું છે. આ ઉપરાંત, પાકિસ્તાનના પૂર્વ ક્રિકેટર બાસિત અલીએ પણ તેમના યૂટ્યૂબ ચેનલ પર વિનોદ કાંબલીના સ્વાસ્થ્ય માટે પ્રાર્થના કરવા અપીલ કરી હતી.

આ પણ વાંચો : ના-પાક આતંકી સંગઠન જૈશ-એ-મોહમ્મદે ભંડોળ એકત્ર કરવા અને ભારતની નજરથી બચવા અપનાવ્યો આ માર્ગ!