સુરતમાં કૂરતાપૂર્વક હત્યાનો વીડિયો સામે આવ્યો, જાહેરમાં યુવકને લાકડાના ફટકા મારી મોતને ઘાટ ઉતાર્યો

સુરતઃ સુરતના લાલગેટ વિસ્તારમાં મોડી રાત્રે એક યુવકની લાકડાના ફટકા મારી ક્રૂરતાપૂર્વક હત્યા કર્યાની ઘટના સામે આવી છે. આ ક્રૂર હત્યાના દ્રશ્યો નજીકના CCTV કેમેરામાં કેદ થઈ ગયા છે. પોલીસે CCTV ના આધારે ગુનો નોંધી તપાસ હાથ ધરી છે.

ભિક્ષુકની ક્રૂરતાપૂર્વક હત્યા
સુરતના લાલગેટ ખાતે એક ભિક્ષુકની લાકડાના ફટકા મારી હત્યા કરી દેવાઈ છે. ગત મોડી રાત્રે લગભગ બેથી ચાર વાગ્યાના સમયની આસપાસ ફૂટપાથ પર રહેતા ભિક્ષુકને અન્ય કોઈ ફૂટપાથ પર રહેતા યુવકે લાકડાના ફટકા મારી ક્રૂરતાપૂર્વક હત્યા કરી નાખી છે.

હત્યા કરી કર્યા બાદ કોઈપણ જાતના ડર વગર ચાલ્યો ગયો
ભિક્ષુક રસ્તા પર ખુલ્લેઆમ જઈ રહ્યો હતો એ દરમિયાન તેને માથાના ભાગે લાકડાના ફટકા મારી ઘટનાસ્થળે જ મોત નીપજાવી કાઢ્યું હતું. મારનાર હત્યા કરી બિનધાસ્ત રીતે ત્યાંથી ચાલ્યો ગયો હતો. ઘટનાની જાણ વહેલી સવારે પોલીસને થતાં પોલીસ ઘટનાસ્થળે પહોંચી તપાસ હાથ ધરી હતી. ફૂટપાથ પર રહેતો હોવાથી મરનારની ઓળખ થઈ શકી નથી. જેથી પોલીસ તેની ઓળખ કરી રહી છે. લાલગેટ પોલીસે આ અંગે હત્યાનો ગુનો નોંધી હત્યા કરનારને પણ પકડવા તપાસ કરી રહી છે.​​​​​​

હત્યાના CCTV હચમચાવનાર
શહેરના લાલગેટ વિસ્તારમાં ફૂટપાટ પર રહેતા ભિક્ષુકની જાહેરમાં ક્રૂરતાપૂર્વક હત્યા કરી દેવાની ઘટના નજીકમાં લાગેલા CCTVમાં કેદ થઈ ગઈ હતી. હત્યાના આ દૃશ્યો કોઈને પણ હચમચાવી દે તેવા છે. ક્રૂરતાપૂર્વકની આ હત્યાના CCTV સામે આવ્યા છે, જેમાં મોડી રાત્રે ભિક્ષુક રસ્તા પર એકલો ચાલી રહ્યો હતો. દરમિયાન અચાનક જ તેને યુવક લાકડાના ફટકા વડે મારવા માંડ્યો હતો. ભિક્ષુકને માથાના ભાગમાં ઉપરાછાપરી 4થી 5 લાકડાના ફટકા મારી ઘટનાસ્થળે જ તેને મોતને ઘાટ ઉતારી દીધો હતો. લાલગેટ પોલીસે હત્યાના સીસીટીવીને આધારે આગળની તપાસ શરૂ કરી છે.