ઉષા દેવી ચૂંટણી સમયે ખોટું બોલ્યા, હવે ભાંડો ફૂટી જતાં ખુરશી ગઈ

• બિહારના સીતામઢી જિલ્લાની સુરસંદ નગર પંચાયતના ઉષા દેવી ત્રણ બાળકો હોવાની હકીકત છુપાનીને નગર પંચાયતની ચૂંટણીમાં ખોટું સોગંદનામું રજૂ કરી ચૂંટણી તો જીતી તો ગયા પણ પછી…

બિહાર, 03 જૂન: બિહારના સીતામઢી જિલ્લાના સુરસંદ નગર પંચાયતના વોર્ડ નંબર 11ની ઉષા દેવીએ વોર્ડ કાઉન્સિલરની ખુરશી ચૂંટણીમાં જીત મેળવ્યા પછી પણ ગુમાવી દીધી છે. ચૂંટણી લડતી વખતે તે ત્રણ બાળકોની માતા હતા પરંતુ તેમણે આ સત્ય છુપાવ્યું હતું. નોમિનેશન દરમિયાન પેપરમાં માત્ર બે બાળકોનો ઉલ્લેખ કર્યો હતો પરંતુ હવે તેમને વોર્ડ કાઉન્સિલરનું પદ ગુમાવવું પડ્યું હોવાનું પ્રકાશમાં આવ્યું છે. રાજ્ય ચૂંટણી પંચને ઉષા દેવી વિરુદ્ધ ફરિયાદ મળી હતી. સુનાવણી બાદ ફરિયાદને સાચી માનીને રાજ્યના ચૂંટણી કમિશનર ડૉ.દીપક પ્રસાદે ઉષા દેવીને બરતરફ કરી દીધા હતા. હકીકત છુપાવીને ચૂંટણી લડવા બદલ ઉષા દેવી સામે કાયદેસરની કાર્યવાહી કરવા જિલ્લા ચૂંટણી અધિકારી ડીએમને કહેવામાં આવ્યું છે.

ફરિયાદ થતા કાર્યવાહી હાથ ધરવામાં આવી

સુરસંદ ઉત્તર પંચાયતના વોર્ડ 14માં રહેતા રામનરેશ બારિકે ચૂંટણી પંચને ફરિયાદ કરી હતી કે ઉષા દેવીને 4 એપ્રિલ, 2008 પછી ત્રણ બાળકો થયા હતા અને ત્રણ બાળકો ધરાવતા ઉમેદવારો ચૂંટણી લડી શકતા નથી. ઉષા દેવીએ આ હકીકત છુપાવી હતી. સુનાવણી દરમિયાન ડીપીઆરઓ ઉપેન્દ્ર પંડિતે જિલ્લા વહીવટીતંત્ર વતી હકીકતો રજૂ કરી હતી. રામનરેશ બારિકના એડવોકેટે પંચને જણાવ્યું હતું કે ચૂંટણી દરમિયાન આ અંગે માહિતી આપવા છતાં રિટર્નિંગ ઓફિસર દ્વારા કોઈ નોંધ લેવામાં આવી નથી.

રાજ્ય ચૂંટણી પંચે ગેરલાયક ઠેરવ્યું

ઉષા દેવીની પુત્રી સોની કુમારી અને પુત્ર આયુષ કુમારનો જન્મ 4 એપ્રિલ 2008 પછી થયો હતો. આના પુરાવા તરીકે આધાર કાર્ડ રજૂ કરવામાં આવ્યું હતું, જેમાં સોનીની જન્મ તારીખ 30 ઓગસ્ટ 2017 અને આયુષની જન્મ તારીખ 29 માર્ચ 2019 દર્શાવવામાં આવી છે. રામનરેશ બારિક વતી બંને બાળકોના જન્મના દસ્તાવેજો પણ પીએચસીમાં રજૂ કરાયા હતા. પીએચસીના દસ્તાવેજો અને આધાર કાર્ડમાં જન્મ તારીખ એક જ હોવાનું જાણવા મળ્યું હતું. ત્રીજું બાળક લાલ મોહન છે જેની જન્મ તારીખ 11 જાન્યુઆરી 2016 છે. એવું કહેવામાં આવ્યું છે કે ઉષા દેવી વિરુદ્ધ કલમ 477 અને અન્ય સંબંધિત કલમો હેઠળ ખોટું સોગંદનામું દાખલ કરવા અને તથ્યો છુપાવવા બદલ કાર્યવાહી કરવામાં આવશે.

આ પણ વાંચો: ગુજરાતમાં જડબેસલાક સુરક્ષા વચ્ચે આવતીકાલે મતગણતરી, જાણો તમારા વિસ્તારમાં ક્યાં થશે