ઉદયપુર રાજપરિવારમાં મિલકત વિવાદ: પદ્મજા કુમારીને હાઈકોર્ટનો ઝટકો, લક્ષ્યરાજ સિંહે કહ્યું- ‘સત્યનો વિજય થયો’
Udaipur Royal Property Dispute: ઉદયપુરના પૂર્વ રાજપરિવારમાં સંપત્તિને લઈને ચાલી રહેલા લાંબા સમયના વિવાદમાં મંગળવારે દિલ્હી હાઈકોર્ટે મહત્વનો ચુકાદો આપ્યો છે. આ વિવાદ પૂર્વ રાજપરિવારના સભ્ય લક્ષ્યરાજ સિંહ મેવાડ અને તેમની બહેન પદ્મજા કુમારી પરમાર વચ્ચે છે. હાઈકોર્ટે પદ્મજા કુમારીની અરજી ફગાવી દેતા લક્ષ્યરાજ સિંહના પક્ષમાં રાહત મળી છે.
શું હતો સમગ્ર મામલો?
પદ્મજા કુમારીએ તેમના સ્વર્ગસ્થ પિતા અરવિંદ સિંહ મેવાડની સંપત્તિ માટે ‘લેટર્સ ઓફ એડમિનિસ્ટ્રેશન’ (વહીવટી પત્ર) ની માંગણી કરી હતી. પદ્મજાનો દાવો હતો કે તેમના પિતાનું અવસાન કોઈપણ વસિયતનામું (Will) બનાવ્યા વગર થયું છે.
હાઈકોર્ટનું અવલોકન
જસ્ટિસ સુબ્રમણ્યમ પ્રસાદે આ માંગણી ફગાવતા જણાવ્યું કે, જ્યાં સુધી ભાઈ (લક્ષ્યરાજ સિંહ) દ્વારા રજૂ કરવામાં આવેલા વસિયતનામા સંબંધિત દાવો કોર્ટમાં પેન્ડિંગ છે, ત્યાં સુધી ‘વસિયત વગર મૃત્યુ’ (Intestate) ના આધારે કોઈ કાનૂની કાર્યવાહી આગળ વધારી શકાય નહીં. હવે આ મામલે આગામી સુનાવણી 4 મે ના રોજ થશે.
લક્ષ્યરાજ સિંહની પ્રતિક્રિયા અને આતશબાજી
કોર્ટના નિર્ણય બાદ ઉદયપુરના સિટી પેલેસના જગદીશ ચોક ગેટ બહાર શહેરના લોકોએ ફટાકડા ફોડીને ખુશી મનાવી હતી. લક્ષ્યરાજ સિંહ મેવાડ પત્ની નિવૃત્તિ કુમારી અને બાળકો સાથે ચાલીને જગદીશ મંદિર પહોંચ્યા હતા અને ભગવાનના આશીર્વાદ લીધા હતા. દર્શન બાદ લક્ષ્યરાજ સિંહે કહ્યું, “સત્ય સામે આવ્યું છે. આખો પરિવાર ભારે મુશ્કેલીઓમાંથી પસાર થયો છે. પિતાજી માટે જે શબ્દોનો ઉપયોગ કરવામાં આવ્યો તેનાથી મને આઘાત લાગ્યો હતો, પરંતુ આજે સત્યનો વિજય થયો છે.”
શું હતો વિવાદ?
આ કાનૂની લડાઈ 16 માર્ચ 2025 ના રોજ અવસાન પામેલા અરવિંદ સિંહ મેવાડની સંપત્તિ સાથે જોડાયેલી છે. ઉદયપુરના રાજપરિવારમાં મિલકતનો વિવાદ પેઢીઓથી ચાલી રહ્યો છે:
- 1983 થી શરૂઆત: ભગવત સિંહ મેવાડના બે પુત્રો મહેન્દ્ર સિંહ અને અરવિંદ સિંહ વચ્ચે વિવાદ શરૂ થયો હતો.
- 2020 નો ચુકાદો: 37 વર્ષની લડાઈ બાદ ઉદયપુર જિલ્લા અદાલતે મિલકતને 4 ભાગમાં વહેંચવાનો આદેશ આપ્યો હતો.
- તાજો વિવાદ: હવે અરવિંદ સિંહ મેવાડના સંતાનો લક્ષ્યરાજ અને પદ્મજા વચ્ચે સિટી પેલેસ અને HRH હોટલ ગ્રુપ જેવી અબજોની સંપત્તિ પરના હકને લઈને કાનૂની જંગ જારી છે.
આ પણ વાંચોઃ IPL 2026: સંજુ સેમસન હવે CSK ની જર્સીમાં દેખાશે, રાજસ્થાન રોયલ્સ છોડવા પાછળનું સાચું કારણ જણાવ્યું
અમારી WhatsApp ચેનલમાં જોડાવા આ લિંક પર ક્લીક કરો
