CM કેજરીવાલને એક જ દિવસમાં બે ઝટકાઃ સુપ્રીમ કોર્ટ બાદ હવે રાઉઝ એવન્યુ કોર્ટે 23 એપ્રિલ સુધી કસ્ટડી વધારી

• દિલ્હી સીએમ અરવિંદ કેજરીવાલની મુશ્કેલીનો ન આવ્યો અંત
• સુપ્રીમ કોર્ટ બાદ હવે રાઉઝ એવન્યુ કોર્ટે કેજરીવાલની ન્યાયિક કસ્ટડી વધારી

દિલ્હી, 15 એપ્રિલ: દિલ્હી શરાબ કૌભાંડમાં સીએમ અરવિંદ કેજરીવાલની મુશ્કેલીઓ ઓછી થવાના કોઈ સંકેત દેખાઈ રહ્યા નથી. આજે (15 એપ્રિલ) સોમવારે રાઉઝ એવન્યુ કોર્ટે અરવિંદ કેજરીવાલની ન્યાયિક કસ્ટડી 23 એપ્રિલ સુધી લંબાવી છે. કેજરીવાલની 15 દિવસની ન્યાયિક કસ્ટડી સોમવારે સમાપ્ત થઈ રહી હતી, ત્યારબાદ કેજરીવાલ આજે તિહાર જેલમાંથી વીડિયો કોન્ફરન્સિંગ દ્વારા રાઉઝ એવન્યુ કોર્ટમાં હાજર થયા હતા. જ્યાં કોર્ટે હવે તેમને 23 એપ્રિલ સુધી ન્યાયિક કસ્ટડીમાં મોકલી દીધો છે. આજે રાઉઝ એવન્યુ કોર્ટે દિલ્હી દારૂ કૌભાંડમાં સહ-આરોપી કવિતાની ન્યાયિક કસ્ટડી પણ 23 એપ્રિલ સુધી લંબાવી છે.

કેજરીવાલની દિલ્હી દારૂ કૌભાંડ કેસમાં ધરપકડ કરવામાં આવી હતી

આમ આદમી પાર્ટીના સંયોજક અરવિંદ કેજરીવાલની દિલ્હી દારૂ કૌભાંડ કેસમાં પૂછપરછ બાદ ED દ્વારા ધરપકડ કરવામાં આવી હતી અને તિહાર જેલમાં મોકલી દેવામાં આવ્યા હતા. દિલ્હી હાઈકોર્ટે તેમને શિક્ષાત્મક કાર્યવાહીથી રક્ષણ આપવાનો ઇનકાર કર્યા પછી કેજરીવાલને 21 માર્ચની રાત્રે ED દ્વારા તેમના ઘરેથી ધરપકડ કરવામાં આવી હતી.

આ પહેલા દિવસે સુપ્રીમ કોર્ટમાં અરવિંદ કેજરીવાલની ધરપકડ સામે દાખલ કરવામાં આવેલી અરજી પર સુનાવણી હાથ ધરવામાં આવી હતી. જેમાં કોર્ટે ED પાસે જવાબ માંગ્યો છે. જસ્ટિસ સંજીવ ખન્ના અને જસ્ટિસ દીપાંકર દત્તાની સર્વોચ્ચ અદાલતની બેન્ચે EDને આ મામલે 24 એપ્રિલ સુધીમાં જવાબ આપવા જણાવ્યું હતું અને કહ્યું હતું કે આ કેસની સુનાવણી 29 એપ્રિલથી શરૂ થતા સપ્તાહમાં કરવામાં આવશે.

આ પણ વાંચો: જે બંધારણ બદલવાનો પ્રયાસ કરશે, પ્રજા તેમની આંખો કાઢી લેશેઃ લાલુ પ્રસાદ યાદવ