દુનિયાની સૌથી મોટી ઓઈલ ડીલનો ટ્રમ્પનો દાવો, વેનેઝુએલાના 65 અબજ બેરલ તેલ પર અમેરિકાનો કંટ્રોલ
Trump claims world’s biggest oil deal: અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે વેનેઝુએલા સાથે દુનિયાના ઈતિહાસની સૌથી મોટી ઓઈલ ડીલ કરવાનો દાવો કર્યો છે. ટ્રમ્પે કહ્યું કે આ કરારથી અમેરિકાની ક્રૂડ ઓઈલ સુધી પહોંચ વધશે, સપ્લાયમાં વધારો થશે અને અંતે પેટ્રોલના ભાવ ઘટાડવામાં મદદ મળશે.
અમારી WhatsApp ચેનલમાં જોડાવા આ લિંક પર ક્લીક કરો
ટ્રમ્પના જણાવ્યા અનુસાર, આ કરાર અમેરિકાની એનર્જી સપ્લાય માટે ખૂબ ફાયદાકારક સાબિત થશે. તેમણે એવો પણ દાવો કર્યો કે આ ડીલથી અમેરિકાના ઓઈલ ભંડારમાં બે ગણાથી વધુ વધારો થશે અને ગેસના ભાવ ઘટાડવામાં મદદ મળશે.
65 અબજ બેરલથી વધુ પ્રમાણિત ઓઈલ
ટ્રમ્પે ટ્રુથ સોશિયલ પર લખ્યું કે તેમના નિર્દેશ બાદ સેક્રેટરી ઓફ સ્ટેટ માર્કો રૂબિયો અને સેક્રેટરી ઓફ વોર પીટ હેગસેથએ વેનેઝુએલાના વચગાળાના રાષ્ટ્રપતિ ડેલ્સી રોડ્રિગેઝ તથા ખાનગી કંપનીઓ સાથે મળીને વેનેઝુએલાના 65 અબજ બેરલથી વધુ પ્રમાણિત ઓઈલ ભંડાર પર અમેરિકાનો મોટાભાગનો કંટ્રોલ મેળવ્યો છે. ટ્રમ્પે દાવો કર્યો કે આ માટે અમેરિકન કરદાતાઓના પૈસાનો ઉપયોગ થયો નથી.
ટ્રમ્પે આ કરારને દુનિયાના ઈતિહાસની સૌથી મોટી ઓઈલ ડીલ ગણાવી છે. આ જાહેરાત એવા સમયે થઈ છે જ્યારે વેનેઝુએલાને લઈને અમેરિકાની નીતિમાં મોટા ફેરફારો જોવા મળી રહ્યા છે.
અમેરિકામાં ગેસના ઊંચા ભાવને લઈને ટ્રમ્પ સરકાર પર દબાણ વધી રહ્યું છે. ઈરાન સાથે ચાલી રહેલા યુદ્ધને છ મહિના થઈ ગયા છે અને વૈશ્વિક એનર્જી માર્કેટ પર તેની અસર જોવા મળી રહી છે. અમેરિકાએ પોતાના સ્ટ્રેટેજિક પેટ્રોલિયમ રિઝર્વનો પણ ઉપયોગ કર્યો છે.
ટ્રમ્પનો વેનેઝુએલા પર આરોપ
જાન્યુઆરીમાં નિકોલસ માદુરો સત્તા પરથી હટ્યા બાદ ટ્રમ્પે અમેરિકન ઓઈલ કંપનીઓને ફરી વેનેઝુએલામાં પરત લાવવાની અને ત્યાંના ઓઈલ ભંડારનો ઉપયોગ કરવાની વાત કરી હતી.
ટ્રમ્પનો આરોપ છે કે વેનેઝુએલાએ અમેરિકાનું તેલ ચોર્યું હતું. તેમનો દાવો ભૂતપૂર્વ રાષ્ટ્રપતિ હ્યુગો શાવેઝના શાસન દરમિયાન કરવામાં આવેલા રાષ્ટ્રીયકરણ સાથે જોડાયેલો છે. તે સમયે અમેરિકન ઓઈલ કંપનીઓ સહિત અનેક વિદેશી સંપત્તિઓનું રાષ્ટ્રીયકરણ કરવામાં આવ્યું હતું.
વેનેઝુએલા પાસે કેટલું તેલ છે
વેનેઝુએલા પાસે દુનિયાના સૌથી મોટા ઓઈલ ભંડારોમાંનું એક છે. અમેરિકન એનર્જી ઇન્ફોર્મેશન એડમિનિસ્ટ્રેશન અનુસાર, દેશમાં અંદાજે 303 અબજ બેરલ ક્રૂડ ઓઈલનો ભંડાર છે. આ વૈશ્વિક કુલ ભંડારના આશરે 17 ટકા જેટલો હિસ્સો છે.
નિષ્ણાતોના જણાવ્યા અનુસાર વેનેઝુએલાના જમીન નીચે રહેલા ઓઈલ ભંડારોની મોટાભાગની માહિતી પહેલેથી જ ઉપલબ્ધ છે. જોકે નબળા ઈન્ફ્રાસ્ટ્રક્ચરને કારણે આટલા મોટા ભંડાર હોવા છતાં વેનેઝુએલા વિશ્વના કુલ ઓઈલ ઉત્પાદનનો માત્ર આશરે 1 ટકા હિસ્સો જ ઉત્પન્ન કરે છે.
આ પણ વાંચો : નેપાળે વિદેશી મદદ ક્યારેય નકારી નથી, ભ્રામક પ્રચાર ન કરવા PM બાલેન શાહની અપીલ
